டெல்லி: விஜய் மல்லையாவின் கிங்பிஷர் விமான நிறுவனத்துக்கு ஏற்பட்டுள்ள பெரும் சரிவை தனக்குச் சாதகமாக பயன்படுத்தி பெரும் வளர்ச்சியை எட்டியுள்ளது இன்டிகோ நிறுவனம்.
அதே நேரத்தில் ஜெட் ஏர்வேஸ் நிறுவனத்தை விட வேகமாக வளர்ச்சியை எட்டிக் காட்டியுள்ளது சிறிய, குறைந்த கட்டண விமான சேவை நிறுவனமான இன்டிகோ.
கடந்த மாதத்தில் ஜெட் ஏர்வேஸின் குறைந்த கட்டண சேவை நிறுவனமான ஜெட்லைட் விமானங்களில் பறந்த பயணிகள் எண்ணிக்கை 26.6 சதவீதமாகும். ஆனால், இன்டிகோவில் பறந்தவர்கள் 27 சதவீதம் ஆவர்.
கிங்பிஷர் நிறுவனம் தனது விமானங்களின் எண்ணிக்கையை குறைத்த அதே நேரத்தில் இன்டிகோ தனது விமான சேவைகளை அதிகரித்தது. குறிப்பாக கிங்பிஷர் திடீரென விமானங்களை நிறுத்திய இடங்களுக்கு எல்லாம் இன்டிகோ விமானங்கள் கூடுதலாக இயக்கப்பட்டன.
கடந்த ஆண்டு 42 ஏர்பஸ் விமானங்களுடன் நாட்டின் ஒட்டுமொத்த பயணிகள் சந்தையில் 19.2 சதவீதத்தை மட்டுமே தன் வசம் வைத்திருந்த இன்டிகோ இந்த ஆண்டு 58 விமானங்களை இயங்கி வருகிறது.
