பேடிஎம் நிறுவனத்தில் 800 ஊழியர்கள் திடீர் பணியிட மாற்றம்.. என்ன காரணம்..?

800 ஊழியர்கள்

புதிதாகத் துவங்கப்பட்டுள்ள பேடிஎம் மால் நிறுவனத்தின் வர்த்தகத்தை உடனடியாக வளர்க்க வேண்மெனில் அதனை முழுமையாகப் புரிந்துகொண்ட, நிறுவனத்தின் வழக்கத்தை நன்கு தெரிந்த ஊழியர்களாலே செய்ய முடியும் என்பதைக் கருத்தில் கொண்டு.

பேடிஎம் நிறுவனத்தில் இருந்து சுமார் 800 ஊழியர்களைப் பேடிஎம் மால் நிறுவன பணிகளுக்கு மாற்றியுள்ளது இதன் நிர்வாகம்.

காலத் தாமதம்..

இதன் மூலம் புதிய பணியாளர்களைத் தேர்ந்தெடுத்து, அவர்களுக்குப் பயிற்சி அளிக்கும் காலம் முழுமையாகக் குறைக்கப்பட்டுள்ளது.

பணி மாற்றப்பட்டுள்ள ஊழியர்கள் அனைவரும் ஒன்97 கம்யூனிகேஷன்ஸ் நிறுவனத்தில் பல ஆண்டுகள் பணியாற்றியவர்கள் என்பது குறிப்பிடத்தக்கது.

2,000 ஊழியர்கள்

மேலும் இந்த ஈகாமர்ஸ் வர்த்தகத்திற்காக மட்டும் பேடிஎம் நிறுவனம் இன்னும் 2,000 ஊழியர்களைப் பணியில் அமர்த்த உள்ளதாகத் தெரிவித்துள்ளது.

இதன் மூலம் டெக்னாலஜி சந்தையில் புதிய வேலைவாய்ப்புகள் அதிகளவில் உருவாக வாய்ப்புகள் அதிகம்.

சுனில் கோயல்

2015ஆம் ஆண்டு நியர்.இன் நிறுவனத்தைப் பேடிஎம் கைப்பற்றிய பின் இதன் நிறுவனரான சுனில் கோயல் இந்நிறுவனத்திலேயே இணைந்தார்.

தற்போது பேடிஎம் மால் பிரிவின் வர்த்தகம் மற்றும் தொழில்நுட்பத்தை இவர் கவனித்துக்கொள்ள உள்ளார்.

அலிபாபா.காம்

கடந்த வருடம் அலிபாபா.காம் நிறுவனத்தின் முன்னாள் தலைவர் பூஷன் பாடில் பேடிஎம் நிறுவனத்தில் இணைந்தார், இவர் பேடிஎம் மால் நிறுவனத்தின் லாஜிஸ்டிக்ஸ் பணிகளைப் பெங்களுரூ அலுவலகத்தில் இருந்து கவனிக்க உள்ளார்.

மார்கெட்டிக் மற்றும் வாடிக்கையாளர் சேவை

பேடிஎம் மால் நிறுவனம் ஈகாமர்ஸ் சந்தையில் பிளிப்கார்ட் மற்றும் அமேசான் நிறுவனத்துடன் போட்டியாகக் களமிறங்கும் நிலையில் இந்நிறுவனத்தின் மார்கெட்டிக் பிரிவை சுவ்ரப் வஷிஷ்தா மற்றும் வாடிக்கையாளர் சேவை அமித் பகாரியா ஆகியோர் துணை தலைவர் பதவியுடன் பணிகளைச் செய்ய உள்ளனர்.

அதிரடி ஆஃபர்

சீனாவின் முன்னணி ஈகாமர்ஸ் நிறுவனமான அலிபாபா பல ஆண்டுகளுக்கு முன்பாகவே இந்திய சந்தையில் குதித்தாலும், முறையாகத் தற்போது தான் பேடிஎம் நிறுவனத்துடன் தனிப்பட்ட முறையில் ஈகாமர்ஸ் வர்த்தகத்தில் குதிக்கிறது.

மேலும் இதன் அறிமுகத்திற்காக முதல் வாடிக்கையாளர்களை ஈர்க்க பேடிஎம் மால் தளம் பல அதிரடி சலுகையை அளிக்க முடிவு செய்துள்ளது.