ஆகஸ்ட் மாதம் உணவு பொருட்கள் மற்றும் காய்கறிகளின் விலை உயர்வால் மொத்த விலை பணவீக்கத்தின் அளவு 3.24 சதவீதம் வரை உயர்ந்து 4 மாத உயர்வை எட்டியுள்ளது. ஜூலை மாதத்தில் இதன் அளவு 1.88 சதவீதமாக இருந்தது குறிப்பிடத்தக்கது.
பணவீக்கத்தை அளவீடும் பட்டியலில் இருக்கும் முக்கிய பொருட்களின் (Primary Articles) பணவீக்கம் ஆகஸ்ட் மாதத்தில் 2.66 சதவீதமாக உயர்ந்துள்ளது. கடந்த மாதம் இது வெறும் 0.46 சதவீதமாக இருந்தது குறிப்பிடத்தக்கது.
இக்காலக்கட்டத்தில் உற்பத்தி பொருட்கள் மீதான பணவீக்கம் 0.2 சதவீதம் அளவிற்கு உயர்ந்துள்ளது.
அதேபோல் எரிபொருள் மற்றும் மின்சாரத்தின் பணவீக்கம் 4.37 சதவீதத்தில் இருந்து 9.99 சதவீதமாக உயர்ந்து மொத்த விலை பணவீக்கத்தை 4 மாத உயர்விற்கு கொண்டு சென்றது.
புயல் காராணமாக அமெரிக்காவில் சுத்திகரிப்பு பணிகள் முழுமையாக முடக்கப்பட்டுள்ள நிலையில் சர்வதேச சந்தையில் கச்சா எண்ணெய் விலை கணிசமாக உயர்ந்துள்ளது. இதன் காரணமாக இந்தியாவில் பல இடங்களில் பெட்ரோல் மற்றும் டீசல் விலை 3 வருட உயர்வை அடைந்து, பொதுமக்களை வாட்டிவதைக்கிறது.