Freelancerஆக வேலை செய்பவர்கள் எப்படி வருமான வரி கணக்கை தாக்கல் செய்ய வேண்டும்?

வருமான வரி கணக்கினை தாக்கல் செய்வதற்கான ஆன்லைன் படிவங்கள் வருமானவரித்துறையால் அதிகாரப்பூர்வமாக வெளியிடப்பட்டிருக்கின்றன. சம்பளக்காரர்கள் ,மூத்த குடிமக்கள் ,தொழில் புரிபவர்கள் என அனைவருமே தங்களுடைய வருமான வரி கணக்கினை கட்டாயம் தாக்கல் செய்தாக வேண்டும்.

வருமான வரி கணக்கு: வருமானவரி கணக்கினை தாக்கல் செய்பவர்கள் தங்களுக்காக உகந்த படிவம் எது என்பதை தேர்வு செய்து அதன் அடிப்படையில் கணக்கு தாக்கல் செய்ய வேண்டும். இந்த கட்டுரையில் நாம் Freelancerஆக பணிபுரிபவர்கள் வருமான வரி கணக்கினை தாக்கல் செய்யும்போது என்னென்ன விஷயங்களை கவனத்தில் கொள்ள வேண்டும் என்பது குறித்து விரிவாக தெரிந்து கொள்ள போகிறோம்.

படிவம் 16: பொதுவாக ஒரு நிறுவனத்தில் ஊழியராக சம்பளத்திற்கு வேலை பார்க்கிறோம் என்றால் அந்த நிறுவனமே நமக்கு படிவம் 16 வழங்கும். அந்த படிவம் 16 ஐ கொண்டு நாம் வருமானவரி கணக்கினை எளிதாக தாக்கல் செய்து கொள்ளலாம். ஆனால் Freelancerஆக பணிபுரிபவர்களுக்கு இது மிகப்பெரிய பிரச்சினையாக இருக்கிறது. ஏனெனில் பல்வேறு நிறுவனங்களுக்கு ப்ராஜெக்ட் அடிப்படையில் இவர்கள் வேலை செய்து கொடுத்திருப்பார்கள். எனவே நிறுவனங்கள் இவர்களுக்கு ப்ராஜெக்ட்டிற்காக வழங்கக்கூடிய சம்பளத்தில் 10% சதவீதம் தொகையை டிடிஎஸ் ஆக பிடித்தம் செய்து இவர்களுடைய பான் நம்பருக்கு எதிராக வருமானவரித்துரையிடம் டெபாசிட் செய்திருக்கும்.

ஐடிஆர் -3ஐ பயன்படுத்த வேண்டும்: Freelancer பணியில் இருப்பவர்கள் வருமான வரி கணக்கு செய்தால் மட்டுமே அந்த டிடிஎஸ் பணத்தை திரும்ப பெற்றுக் கொள்ள முடியும். எனவே Freelancerஆக பணிபுரிபவர்கள் மிக கவனமாக தங்களுடைய வருமானவரி கணக்கினை தாக்கல் செய்தாக வேண்டி இருக்கிறது. இவர்கள் வருமான வரி கணக்கை தாக்கல் செய்ய ஐடிஆர் -3ஐ பயன்படுத்த வேண்டும்.

அனைத்து ரசீதுகளும் அவசியம்: Presumptive Taxation Scheme முறையில் வருமான வரி கணக்கை தாக்கல் செய்பவர்கள் ஐடிஆர்-4ஐ பயன்படுத்தி கொள்ளலாம். பழைய வரி நடைமுறையில் கணக்கு தாக்கல் செய்பவராக இருந்தால் வருங்கால வைப்பு நிதி டெபாசிட்டுகள், வரி சேமிப்புக்கான மியூச்சுவல் ஃபண்டுகள், காப்பீட்டு பிரீமியம் ஆகியவற்றை குறிப்பிட்டு வரி விலக்கு பெறலாம். ஆனால் அதற்கான ரசீதுகளை முறையாக சேமித்தாக வேண்டும். புதிய வரி முறையில் கணக்கு தாக்கல் செய்பவர்களுக்கு இது பொருந்தாது.

இன்வாய்ஸ்: அதேபோல தாங்கள் பெற்ற ஊதியங்களுக்கான அனைத்து இன்வாய்ஸ்களையும், ரசீதுகளையும் கட்டாயம் வைத்திருக்க வேண்டும்.அந்த நிதியாண்டில் பெற்ற சம்பளம் அதற்கான இன்வாய்ஸ்களை கணக்கிட்டு வருமான வரி கணக்கு தாக்கல் செய்ய வேண்டும். சில சமயங்களில் இவர்கள் பிராஜெக்ட் செய்து கொடுத்த நிறுவனங்களே படிவம் 16ஐ வழங்கும். ஆனால் பல நிறுவனங்கள் வழங்கிய படிவம் 16 இருக்கும் என்பதால் அதனை கவனமாக கையாள வேண்டும்.

படிவம் 26 AS- ஐ பயன்படுத்தலாம்: Freelancerஆக வேலை செய்யக் கூடிய நபர்கள் தங்கள் பெயரில் எவ்வளவு டிடிஎஸ் டெபாசிட் செய்யப்பட்டிருக்கிறது என்பதை படிவம் 26 AS- ஐ பயன்படுத்தி தெரிந்து கொள்ளலாம். வருமான வரித்துறை அலுவலகத்திலேயே இது கிடைத்துவிடும். எந்த நிதியாண்டு என்பதை தேர்வு செய்து இந்த ஆவணத்தை பதிவிறக்கி, எந்தெந்த நிறுவனங்கள் நம் பெயரில் எவ்வளவு தொகையை டிடிஎஸ் டெபாசிட் செய்துள்ளன என தெரிந்து கொள்ளலாம்.