உங்கள் எல்பிஜி சிலிண்டருக்கு ரூ.50 லட்சம் இலவச காப்பீடு இருக்கு தெரியுமா? எப்படி கிளைம் செய்வது..?

சிலிண்டர் விபத்துகள் எங்கு, எப்படி நடக்கும் என்று சொல்ல முடியாது. எவ்வளவு கவனமாக இருந்தாலும் ஒரு சிறு தவறு ஒருவரை அறியாமல் நடந்து விடும். சொத்து சேதத்துடன் உயிர் சேதமும் ஏற்படுகிறது. குறிப்பாக சமையலறையில் உள்ள எல்பிஜி சிலிண்டர் குறித்து, அதிக பாதுகாப்பு வழிமுறைகளை பின்பற்ற வேண்டும். எல்பிஜி விபத்துக்கள் காப்பீட்டின் கீழ் வரும் என்பது பெரும்பாலான மக்களுக்குத் தெரியாது. எல்பிஜி விபத்துகள் ஏற்பட்டால் ரூ.50 லட்சம் வரை காப்பீடு கோரலாம். இந்த காப்பீட்டை எப்படி கிளைம் செய்வது? எந்த விபத்துக்கு எவ்வளவு இழப்பீடு கிடைக்கும்? என்பதை இந்த பதிவில் தெரிந்துகொள்ளலாம்

சமீபகாலமாக கிராமப்புறங்களிலும் எல்பிஜி சிலிண்டர் பயன்படுத்துவோரின் எண்ணிக்கை அதிகரித்துள்ளது. இருப்பினும், எல்பிஜி சிலிண்டர்களைப் பயன்படுத்தும் போது பாதுகாப்பு நடவடிக்கைகளை கவனிக்காமல் இருக்க முடியாது. சில சமயங்களில் நமக்குத் தெரியாமல் விபத்துகள் நடக்கின்றன. இந்நிலையில், எரிவாயு நிறுவனங்களிடம் இருந்து காப்பீடு இழப்பீடு பெரும் தொகை கிடைப்பது பலருக்கு தெரியாது.

எல்பிஜி சிலிண்டர் வாடிக்கையாளர்கள் காப்பீட்டுக் கொள்கையை தனியாக வாங்க வேண்டியதில்லை. நீங்கள் இண்டேன், ஹெச்பி, பாரத் போன்ற அரசுக்கு சொந்தமான எரிவாயு நிறுவனங்களுடன் அதிகாரப்பூர்வமாக எல்பிஜி இணைப்பைப் பதிவு செய்திருந்தால், நீங்கள் பாதுகாக்கப்படுவீர்கள். இதற்கான பிரீமியம் நிறுவனங்களே செலுத்துகின்றன. வாடிக்கையாளர்கள் காப்பீட்டுக்காக தனி கட்டணம் எதுவும் செலுத்த வேண்டியதில்லை.

காப்பீட்டுத் தொகை எப்போது கிடைக்கும்?: எல்பிஜி காரணமாக விபத்து ஏற்பட்டால், சொத்து சேதம் அல்லது உயிர் இழப்பு ஏற்பட்டால், காப்பீடு கோரலாம். இருப்பினும், விபத்து சமையல் எரிவாயுவால் தான் என்பதை உறுதி செய்ய வேண்டும். வேறு ஏதேனும் காரணங்களால் விபத்து ஏற்பட்டால், காப்பீடு அதை ஈடுசெய்யாது.

எதற்கு எவ்வளவு இழப்பீடு கிடைக்கும்?: எல்பிஜி விபத்தில் மரணம் அடைந்தால் ஒருவருக்கு ரூ.6 லட்சம் வரை இழப்பீடு.
ஒரு விபத்துக்கு 30 லட்சம் ரூபாய் வரை மருத்துவக் காப்பீடு. தலா 2 லட்சமும், உடனடி மருத்துவ இழப்பீடாக ரூ.25 ஆயிரமும் வழங்கப்படும். அதிகாரப்பூர்வமாக பதிவு செய்யப்பட்ட வாடிக்கையாளர்களின் குடியிருப்பு வளாகத்தில் எல்பிஜியால் ஏற்படும் சொத்து சேதத்திற்கு அதிகபட்சம் ரூ.2 லட்சம் வரை இழப்பீடு கிடைக்கும்.

எப்படி கிளைம் செய்வது?: எல்பிஜி விபத்து ஏற்பட்டால் டீலர் அல்லது விநியோகஸ்தருக்கு எழுத்துப்பூர்வமாக தெரிவிக்க வேண்டும். மேலும், காவல் நிலையத்தில் புகார் அளிக்க வேண்டும். பின்னர் வட்டார அலுவலர் விசாரணை நடத்துவார். விபத்து LPG விபத்து என்றால், LPG விநியோக அமைப்பு / பகுதி அலுவலகம் காப்பீட்டு நிறுவனத்தின் உள்ளூர் அலுவலகத்திற்கு தெரிவிக்கும். பின்னர் சம்பந்தப்பட்ட காப்பீட்டு நிறுவனத்திடம் கோரிக்கை வைக்கப்படுகிறது. காப்பீட்டு கோரிக்கைகளை தாக்கல் செய்வதில் மக்களுக்கு உதவ எரிவாயு நிறுவனங்கள் உள்ளன.