இதுல மட்டும் முதலீடு செய்திருந்தால்..வரி சேமிப்புடன் 25%க்கு மேல் லாபம் கிடைத்திருக்கும்..!

சிலர் வருமான வரி விலக்கு பெறும் நோக்கில் சேமிப்பு திட்டங்களில் முதலீடு செய்வது வாடிக்கை. அப்படிப்பட்ட சேமிப்பு திட்டங்களில் ஒன்றுதான் ஈக்விட்டியுடன் இணைக்கப்பட்ட சேமிப்பு திட்டங்கள் (ELSS). இது ஒரு மியூச்சுவல் பண்டு திட்டமாகும்.

பொதுவாக இஎல்எஸ்எஸ் திட்டங்களுக்கு 3 ஆண்டுகள் லாக் இன் காலம் உள்ளது. இஎல்எஸ்எஸ் திட்டத்தில் முதலீடு செய்தால், ரூ.1.50 லட்சம் வரை வருமான வரி விலக்கு பெற முடியும். இந்த திட்டங்களில் மூலம் திரட்டப்படும் நிதியில் 80 சதவீதத்தை பங்கு தொடர்பான திட்டங்களில் மியூச்சுவல் பண்டுகள் முதலீடு செய்கின்றன.

இந்த இஎல்எஸ்எஸ் மியூச்சுவல் பண்டுகள் பங்குச் சந்தையுடன் இணைக்கப்பட்டுள்ளதால் மற்ற முதலீட்டு வாய்ப்புகளுடன் ஒப்பிடுகையில் அதிக வருமானத்தை வழங்குகின்றன. இருப்பினும் அதே அளவுக்கு மற்ற முதலீட்டு வாய்ப்புகளை காட்டிலும் அதிக ரிஸ்க்கும் உள்ளது என்பதும் நிதர்சனம்.

இஎல்எஸ்எஸ் பிரிவில் சுமார் 38 திட்டங்கள் தற்போது நடைமுறையில் உள்ளன. இதில், 12 திட்டங்கள் 2023ல் 25 சதவீதத்துக்கு மேல் ஆதாயம் அளித்துள்ளன. இந்த ஆண்டில் அதிகபட்சமாக SBI Long Term Equity Fund 33.99 சதவீதம் ஆதாயம் அளித்துள்ளது.

2023ம் ஆண்டின் டாப் 12 இஎல்எஸ்எஸ் பண்டுகள்

1.SBI Long Term Equity Fund இந்த ஆண்டில் 33.99 சதவீதம் ஆதாயம் அளித்துள்ளது.
2.Motilal Oswal ELSS Tax Saver Fund இதுவரை 32.76 சதவீதம் லாபம் அளித்துள்ளது.
3.ITI ELSS Tax Saver Fund தற்போது 31.54 சதவீதம் உயர்ந்துள்ளது.
4.Bank of India Tax Advantage Fund-ல் மேற்கொண்ட முதலீடு 30.49 சதவீதம் வளர்ச்சி கண்டுள்ளது.
5.HDFC ELSS Tax saver இந்த ஆண்டில் 29.62 சதவீதம் ஆதாயம் கொடுத்துள்ளது.
6.Samco ELSS Tax Saver Fund இந்த ஆண்டில் இதுவரை 28.81 சதவீதம் அதிகரித்துள்ளது.
7.WOC ELSS Tax Saver Fund இதுவரை 28.74 சதவீதம் ரிட்டர்ன் கொடுத்துள்ளது.
8.JM ELSS Tax Saver Fund தற்போது வரை 27.68 சதவீதம் லாபம் கொடுத்துள்ளது.
9.Franklin India Taxshield பண்டு 26.87 சதவீதம் ஆதாயம் கொடுத்துள்ளது.
10.Baroda BNP Paribas ELSS Tax Saver Fund-ல் மேற்கொண்ட முதலீடு தற்போது 26.80 சதவீதம் வளர்ச்சி கண்டுள்ளது.
11.Invesco India ELSS Tax Saver Fund இந்த ஆண்டில் 26.54 சதவீதம் ஆதாயம் கொடுத்துள்ளது.
12.DSP ELSS Tax Saver Fund இதுவரை 25.69 சதவீதம் ரிட்டர்ன் வழங்கியுள்ளது.

இந்திய பரஸ்பர நிதி நிறுவனங்கள் சங்கத்தின் தரவுகளின்படி, இந்த ஆண்டில் முதலீட்டாளர்கள் இஎல்எஸ்எஸ் மியூச்சுவல் பண்டு திட்டங்களில் ரூ.3,773.46 கோடி முதலீடு செய்துள்ளனர். 2023 நவம்பர் 30ம் தேதி நிலவரப்படி, இஎல்எஸ்எஸ் பிரிவில் நிர்வகிக்கப்படும் சொத்து மதிப்பு ரூ.1.88 லட்சம் கோடியாக உள்ளது. இது கடந்த ஜனவரியில் ரூ.1.51 லட்சம் கோடியாக இருந்தது. இந்த ஆண்டில் இஎல்எஸ்எஸ் பிரிவில் நிர்வகிக்கப்படும் சொத்து மதிப்பு 24.39 சதவீதம் அதிகரித்துள்ளது.