பங்குச்சந்தை 48% சரிவு.. ரத்தக்களரி ஆன அர்ஜென்டீனா..!

அர்ஜென்டீனா அதிபர் மொரிசியோ மேக்ரி எதிர்பார்க்காத வகையில் தேர்தலில் தோல்வி அடைந்த நிலையில் உள்நாட்டு மற்றும் வெளிநாட்டு முதலீட்டாளர்கள் அரசு பத்திரம் மற்றும் பங்குகளில் செய்திருந்த முதலீட்டை அதிரடியாகவும், அவசர அவசரமாகவும் வெளியேற்றியதால் அர்ஜென்டீனா அரசுடன் அந்நாட்டுப் பொருளாதாரமும் வரலாறு காணாத வீழ்ச்சி அடைந்துள்ளது.

அதிபரின் அதிர்ச்சி தோல்வியால் திங்கட்கிழமை ஒரு நாள் வர்த்தகத்தில் மட்டும் இந்நாட்டின் பங்குச்சந்தையின் முக்கியக் குறியீடான merval சுமார் 48 சதவீதம் (டாலர் மதிப்பில்) சரிந்துள்ளது.

18 வருட வீழ்ச்சி

இது கடந்த 18 வருடத்தில் காணாத ஒரு வீழ்ச்சி என்றும் அர்ஜென்டீனா பொருளாதாரச் சந்தையில் பேசப்படுகிறது. இதோடு அதிபரின் தோல்வியின் எதிரொலியாக அதிகளவிலான அன்னிய முதலீடு வெளியேறிய காரணத்தால் இந்நாட்டின் நாணயமான பிசோ மதிப்பு 30 சதவீதம் வரையில் சரிந்து அர்ஜென்டீனா மக்களை அதிர்ச்சிக்குள்ளாக்கியது.

ஆனால் ஆண்டவன் (ஆழ்வார்பேட்டை ஆண்டவன் இல்லை) புண்ணியத்தில் திங்கட்கிழமை வர்த்தக முடிவில் இதன் சரிவு அளவீடு 15 சதவீதமாகக் குறைந்தது.

 

அரசு பத்திரங்கள்

பங்குச்சந்தை மற்றும் நாணய மதிப்பு சரிவின் காரணமாக இந்நாட்டின் அரசு பத்திரங்களின் மதிப்பு 25 சதவீதம் வரையில் குறைந்துள்ளது. இதிலிருந்து மீண்டு வர அர்ஜென்டீனா-விற்கு மிகவும் கடினம்.

 

 

பணிநீக்கம், பணவீக்கம்

இதுமட்டும் அல்லாமல் அர்ஜென்டீனா-வில் தற்போது அதிகளவில் வேலைவாய்ப்பு இழப்பு ஏற்பட்டு வருகிறது. அதோடு முதல் 6 மாதத்தில் மட்டும் இந்நாட்டின் பணவீக்கம் 22 சதவீதம் என்பது குறிப்பிடத்தக்கது. இதே நிலை தொடர்ந்தால் அர்ஜென்டீனா-வை யாராலும் காப்பாற்ற முடியாது.

மொரிசியோ மேக்ரி 2018இல் பீசோ மதிப்பின் வீழ்ச்சியைச் சரி செய்யச் சர்வதேச நாணய நிதியத்திடம் சுமார் 55 பில்லியன் டாலர் மதிப்பிலான ஒப்பந்தம் செய்தார். ஆனால் அது எவ்விதமான பயனும் அளிக்கவில்லை.

 

2வது இடம்

1989இல் இலங்கையில் போர் வெடித்த போது இலங்கை பங்குச்சந்தை சுமார் 62 சதவீதம் வரையில் சரிந்தது. இதுதான் சர்வதேச பங்குச்சந்தையில் மோசமான சரிவாகப் பார்க்கப்பட்டது. இதைத் தொடர்ந்து தற்போது அர்ஜென்டீனா-வின் 48 சதவீதம் வீழ்ச்சியைத் தான் மாபெரும் வீழ்ச்சியாகப் பார்க்கப்படுகிறது.