பங்குகளை விற்க தயாராகும் பாலாஜி வேஃபர்ஸ்.. வாங்க ஆர்வம் காட்டும் பெரிய நிறுவனங்கள்.!!

ஹல்டிராம்ஸ் நிறுவனத்தைத் தொடர்ந்து, தற்போது பாலாஜி வேஃபர்ஸிலும் பல பெரிய நிறுவனங்கள் முதலீடு செய்ய ஆர்வம் காட்டி வருகின்றன. ஐ.டி.சி., பெப்சிகோ போன்ற உணவுத் துறை ஜாம்பவான்கள் இந்நிறுவனத்தில் 10 சதவீத பங்குகளை வாங்க கடும் போட்டி போட்டு வருகின்றன.

மேலும், டி.பி.ஜி. போன்ற தனியார் பங்கு முதலீட்டு நிறுவனங்களும், சிங்கப்பூரின் அரசு முதலீட்டு நிறுவனமான டெமாசெக்கும் இந்தப் போட்டியில் களமிறங்கியுள்ளன. ஹல்டிராம்ஸில் முதலீடு செய்த டெமாசெக், இப்போது பாலாஜி வேஃபர்ஸிலும் கணிசமான பங்குகளை வாங்க முயற்சிக்கிறது. பாலாஜி வேஃபர்ஸின் மதிப்பு சுமார் ரூ.40,000 கோடி என மதிப்பிடப்பட்டுள்ளது.

நவபாரத் டைம்ஸ் அறிக்கையின்படி, சில முன்னணி முதலீட்டாளர்களும், தனியார் பங்கு நிறுவனங்களும் பாலாஜி வேஃபர்ஸில் 20 சதவீத பங்குகளை வாங்க பேச்சுவார்த்தை நடத்தி வருகின்றன. இந்த பேச்சுவார்த்தைகள் ஆரம்ப கட்டத்தில் இருந்தாலும், இன்னும் எந்த உறுதியான ஒப்பந்தமும் கையெழுத்தாகவில்லை. பெப்சிகோ நிறுவனம், பாலாஜி வேஃபர்ஸில் பங்குகளை வாங்க இரண்டாவது முறையாக முயற்சிப்பது குறிப்பிடத்தக்கது.பாலாஜி வேஃபர்ஸ் நிறுவனம் மேற்கு மற்றும் மத்திய இந்திய சந்தைகளில் வலுவான ஆதிக்கத்தைச் செலுத்தி வருகிறது.

பெப்சிகோ இதற்கு முன்பும் பாலாஜி வேஃபர்ஸில் பங்குகளை வாங்க முயற்சித்தது. 2013-ல் இந்நிறுவனத்தில் 49-51 சதவீத பங்குகளை வாங்க பெப்சிகோ விரும்பியது. ஆனால், பாலாஜி வேஃபர்ஸின் உரிமையாளர்களான விரானி குடும்பத்தினர் இவ்வளவு பெரிய அளவிலான பங்குகளை விற்கத் தயாராக இல்லாததால், அந்த ஒப்பந்தம் அப்போது நிறைவடையவில்லை.

இந்திய சிற்றுண்டி சந்தையில் முதலீடு செய்ய உலகளாவிய நிறுவனங்கள் அதிக ஆர்வம் காட்டுகின்றன. ஹல்டிராம்ஸ் ஸ்நாக் ஃபுட்ஸில், ஐ.ஹெச்.சி., ஆல்ஃபா வேவ் குளோபல் மற்றும் சிங்கப்பூரின் டெமாசெக் ஆகியவை இணைந்து சுமார் 10 சதவீத பங்குகளை வாங்கின. அப்போது ஹல்டிராம்ஸின் மதிப்பு 10 பில்லியன் அமெரிக்க டாலருக்கும் அதிகமாக மதிப்பிடப்பட்டது. இது உள்நாட்டு தொகுக்கப்பட்ட உணவுத் துறையில் மிகப்பெரிய ஒப்பந்தமாக அமைந்தது.

பாலாஜி வேஃபர்ஸின் வருவாய் கடந்த ஆண்டு 11% அதிகரித்து ரூ.5,453.7 கோடியாக உயர்ந்துள்ளது. லாபம் 41% உயர்ந்து ரூ.578.8 கோடியாக எட்டியுள்ளது. இந்திய சிற்றுண்டிச் சந்தை வேகமாக வளர்ந்து வருவதையே இது காட்டுகிறது.

சந்தைப் பகுப்பாய்வு நிறுவனமான எமார்க் குரூப் தகவலின்படி, 2023-ல் இந்திய சிற்றுண்டி சந்தையின் மதிப்பு சுமார் ரூ.42,694.9 கோடியாக இருந்தது. இது 2032-க்குள் ரூ.95,521.8 கோடியைத் தாண்டும் என எதிர்பார்க்கப்படுகிறது.

சமீபத்திய தகவல்களின்படி, விரானி குடும்பத்தினர் நிறுவனத்தின் செயல்பாடுகளை சீரமைத்து, அன்றாட நிர்வாகத்தை தொழில்முறை மேலாளர்களிடம் ஒப்படைக்க திட்டமிட்டுள்ளனர்.