உலக சந்தையில் பிளாக் மண்டே பதட்டம்.. வர்த்தகம் நிறுத்தம்.. அதிர்ச்சியில் ஜப்பான் பங்குச்சந்தை.!!

ஏப்ரல் 7, 2025 இன்று, ஜப்பானின் நிக்கெய் 225 மற்றும் டோபிக்ஸ் இன்டெக்ஸ்களின் ஃப்யூச்சர்ஸ் வர்த்தகம் தற்காலிகமாக நிறுத்தப்பட்டது. இது, அமெரிக்க அதிபர் டொனால்ட் ட்ரம்ப் அறிவித்த புதிய வரிகளால் உலகளாவிய சந்தைகளில் ஏற்பட்ட கடுமையான வீழ்ச்சியின் விளைவாகும். இதற்கான முக்கியக் காரணம் 'சர்க்யூட் பிரேக்கர்' எனப்படும் பாதுகாப்பு முறை செயல்படுத்தப்படுவதே ஆகும்.

சர்க்யூட் பிரேக்கர் என்றால் என்ன?: சர்க்யூட் பிரேக்கர் என்பது பங்குசந்தை கடுமையான ஏற்ற இறக்கங்களை சந்திக்கும்போது செயல்படுத்தப்படும் பாதுகாப்பு நடைமுறை ஆகும். எந்தவொரு பங்கு அல்லது குறியீட்டு மதிப்புகள் மிகவும் வேகமாக சரிவதையோ அல்லது உயர்வதையோ சந்தித்தால், வர்த்தகம் தற்காலிகமாக நிறுத்தப்படும். இது பங்கு முதலீட்டாளர்களுக்கும் நிறுவனங்களுக்கும் ஓர் 'கூலிங் ஆஃப் பீரியட்' என வழங்கப்படுகிறது. அதாவது பங்கு சந்தையில் உள்ள குழப்பங்களை குறைத்து, முதலீட்டாளர்கள் புத்திசாலித்தனமாக முடிவெடுக்க அனுமதிக்கப்படும்.

உலக சந்தையில் அதிர்ச்சி:ஜப்பானில் நடந்த இந்த சம்பவத்துக்கு காரணமாக அமெரிக்க பங்குசந்தை கடுமையாக பாதிக்கப்பட்டுள்ளது. டோ ஜோன்ஸ் மற்றும் எஸ் & பி 500 ஃப்யூச்சர்ஸ் தலா 4% வீழ்ச்சி கண்டுள்ளன. இது 'Black Monday' என அழைக்கப்படும் 1987-ம் ஆண்டு நிகழ்வை நினைவுபடுத்துகிறது. 2025 ஏப்ரல் 7 இன்று பங்குசந்தை மிக மோசமான நிலையை சந்திக்கப்போகும் என்ற அச்சம் முதலீட்டாளர்களிடையே உருவாகியுள்ளது.

டவ் ஜோன்ஸ் கடுமையான வீழ்ச்சி: கடந்த வெள்ளிக்கிழமை மட்டும் டவ் ஜோன்ஸ் 2,231 புள்ளிகள் வீழ்ந்துள்ளது. இரண்டாவது நாளாக 1,500 புள்ளிகளை மீறிய இழப்பை சந்தித்துள்ளது. இது வரலாற்றில் முதல் முறையாக நடந்த அதிர்ச்சி சம்பவமாக பதிவு செய்யப்பட்டுள்ளது.

ஏன் இந்த நிலை உருவானது?: இந்த பங்கு சந்தை வீழ்ச்சிக்கான முக்கிய காரணம் அமெரிக்க அதிபர் டொனால்ட் டிரம்ப் அறிவித்த புதிய வரிகள் தான். 'Liberation Day' என்ற பெயரில் இவர் எடுத்த இந்த நடவடிக்கை உலக சந்தைகளில் பெரும் பதற்றத்தை ஏற்படுத்தியது. இதன் விளைவாக பல முக்கிய பங்குசந்தைகள் கடுமையான வீழ்ச்சியை சந்தித்தன. சீனாவின் CSI300 ப்ளூ-சிப் குறியீடு 4.5% வீழ்ச்சியடைந்தது. ஹாங்காங்கின் ஹாங் செங் குறியீடு 8% வரை கீழே சரிந்தது. தென்கொரியாவின் செவுல் பங்குசந்தையில் கோஸ்பி குறியீடு 4.8% வீழ்ச்சி கண்டது. இத்துடன் ஜப்பானின் முக்கிய பங்குசந்தையான நிக்கெய் 225 குறியீடு 7.35% வீழ்ச்சியடைந்தது. இவை அனைத்தும் உலக பங்குசந்தை மீது பெரும் அழுத்தத்தையும், முதலீட்டாளர்களிடையே அச்சத்தையும் ஏற்படுத்தியது.

ஜிம் கிராமர் கூறியது: சந்தை நிபுணர் ஜிம் கிராமர், CNBC தொலைக்காட்சியில் பேசியபோது, 'Black Monday'-ஐ போல 1987-ம் ஆண்டு நிகழ்ந்த சந்தை வீழ்ச்சியை மீண்டும் சந்திக்க வாய்ப்பு இருப்பதாக எச்சரித்துள்ளார். "அமெரிக்க அதிபர் சரியான நடவடிக்கைகள் எடுக்கவில்லை என்றால், 1987-ல் நடந்தது போலவே சந்தை மூன்று நாட்கள் வீழ்ச்சியடைந்து, அதன் பின் ஒரே நாளில் 22% வீழ்ச்சி ஏற்படும் நிலை உருவாகலாம்." என்று கூறியுள்ளார்.

பங்கு முதலீட்டாளர்களுக்கு அறிவுரை: இதுபோன்ற சந்தை நிலைமை உருவாகும்போது முதலீட்டாளர்கள் பீதி அடையாமல், தங்கள் முதலீடுகளை சீராக மதிப்பாய்வு செய்து, அவசியம் தேவையான முன் எச்சரிக்கைகளை மேற்கொள்ள வேண்டும். சர்க்யூட் பிரேக்கர் என்பது சந்தையை முழுமையாக நெருக்கடிக்கு தள்ளாமல் தடுக்கும் ஒரு பாதுகாப்பு முறையாகும். உலக பங்குசந்தை கடுமையான அழுத்தத்தைக் காண்கிறது.

ஜப்பான், அமெரிக்கா, சீனா, ஹாங்காங் போன்ற முக்கிய சந்தைகள் வீழ்ச்சியடைந்துள்ளன. சர்க்யூட் பிரேக்கர் செயல்படுத்தப்படுவது பாதுகாப்பு நடவடிக்கையாகும். 'Black Monday' போன்ற பங்கு சந்தை மோசமான நிலை உருவாகும் அபாயம் உள்ளது. முதலீட்டாளர்கள் பீதி அடையாமல் சிந்தனையுடன் செயல்பட வேண்டியது அவசியம்.