MRF: ஒரு பங்கு விலை 1 லட்சமாம்.. வரலாற்று சாதனை படைத்த சென்னை நிறுவனம்..!

இந்தியாவின் முன்னணி மற்றும் பிரபலமான டயர் தயாரிப்பு நிறுவனமான எம்ஆர்எஃப் பங்குகளின் விலை முதல் முறையாக 1,00,000 ரூபாய் அளவை எட்டி புதிய சாதனை படைத்துள்ளது. MRF நிறுவனத்தின் வரலாற்றில் ஒரு முக்கிய மைல்கல்லைத் தொட்டுள்ளது.

மெட்ராஸ் ரப்பர் ஃபேக்டரி என்பது தான் MRF என்பதன் விரிவாக்கம், MRF நிறுவனம் MRF டயர்ஸ் என்றும் அழைக்கப்படுகிறது. இது இந்தியாவை குறிப்பாக சென்னையை தலைமையிடமாக கொண்டு இயங்கும் பன்னாட்டு டயர் உற்பத்தி நிறுவனமாகும். இதுமட்டும் அல்லாமல் இந்தியாவின் மிகப்பெரிய டயர் உற்பத்தி நிறுவனமாகவும் உள்ளது.

MRF நிறுவனம் டயர்கள், டிரெட்ஸ், டியூப்கள் மற்றும் கன்வேயர் பெல்ட்கள், பெயிண்ட் மற்றும் பொம்மை உள்ளிட்ட பல ரப்பர் சார்ந்த பொருட்களை உற்பத்தி செய்கிறது. MRF லிமிடெட் AAA- பிராண்ட் தரத்துடன் உலகின் இரண்டாவது வலிமையான டயர் தயாரிப்பாளராக உள்ளது குறிப்பிடத்தக்கது.

இந்திய பங்குச்சந்தையில் MRF பங்குகள் தான் இப்போது மிகவும் விலையுயர்ந்த பங்குகளாக உள்ளது. MRF நிறுவனத்தை தொடர்ந்து பேஜ் இண்டஸ்ட்ரீஸ், ஹனிவெல் ஆட்டோமேஷன், ஸ்ரீ சிமெண்ட், 3எம், ABBOT, நெஸ்லே போன்றவை விலையுயர்ந்த பங்குகள் பட்டியலில் உள்ளது.

MRF பங்குகள் இன்று மும்பை பங்குச்சந்தையில் முதல் முறையாக 1 லட்சம் ரூபாய் அளவீட்டை தொட்டுள்ளது மட்டும் அல்லாமல், அதன் 52 வார உச்ச அளவீட்டை 1,00,300 ரூபாயாக உயர்த்தியுள்ளது. இதன் மூலம் MRF நிறுவனத்தின் சந்தை மதிப்பு 42,328 கோடி ரூபாயாக உயர்ந்துள்ளது.

MRF பங்குகள் மும்பை பங்குச்சந்தையில் திங்கட்கிழமை வர்த்தக முடிவில் 98,939.70 ரூபாயாக முடிந்தது, இன்று காலை 99500 ரூபாய் விலையில் துவங்கி அதிகப்படியாக 1,00,300 ரூபாய் வரையில் உயர்ந்து புதிய 52 வார உயர்வு அளவீட்டை தொட்டு உள்ளது.

2023 ஆம் ஆண்டில் MRF பங்குகள் 13.31 சதவீதம் வளர்ச்சி அடைந்து அசத்தியுள்ளது, இதேபோல் கடந்த ஒரு வருடத்தில் 45.57 சதவீதமும், 5 வருடத்தில் 32.28 சதவீதம் வளர்ச்சி அடைந்துள்ளது. 1996ல் பங்குச்சந்தையில் 2500 ரூபாய்க்கு பட்டியலிடப்பட்ட MRF பங்குகள் சுமார் 3,844.86 சதவீதம் வளர்ச்சி அடைந்துள்ளது.