பங்குச்சந்தை முதலீட்டாளர்களுக்கு மேலும் ஒரு ஜாக்பாட்!! வருகிறது PhonePe ஐபிஓ!!

செப்டம்பர் மாதத்தில் பல்வேறு நிறுவனங்களும் போட்டி போட்டு கொண்டு இந்திய சந்தையில் ஐபிஓ வெளியிட உள்ளன. இதில் ஃபோன்பே (PhonePe) நிறுவனத்தின் ஐபிஓ மிகுந்த எதிர்பார்ப்பை ஏற்படுத்தியுள்ளது.

வால்மார்ட்டின் ஆதரவு பெற்ற டிஜிட்டல் பணப் பரிவர்த்தனை நிறுவனமான ஃபோன்பே, தனது IPO வெளியீட்டுக்கான பணிகளை தொடங்கியுள்ளது. ரகசியமான முறையில் செப்டம்பர் மாத இறுதிக்குள் IPO-வுக்கான விண்ணப்பத்தைச் சமர்ப்பிக்க இந்த நிறுவனம் திட்டமிட்டுள்ளது.

சுமார் ரூ.10,000 முதல் ரூ.13,000 கோடி மதிப்பிலான IPO-வாக இது இருக்கலாம் என தகவல்கள் தெரிவிக்கின்றன. இதில் புதிய பங்குகளை வெளியிடுதல் மற்றும் தற்போதுள்ள பங்குகளை விற்பனை செய்தல் ஆகிய இரண்டும் அடங்கும். ஃபோன்பே-வின் தற்போதைய மதிப்பு $10 பில்லியன் முதல் $12 பில்லியன் வரை இருக்கும் என மதிப்பிடப்படுகிறது.

ஃபோன்பே-வின் முக்கியப் பங்குதாரரான வால்மார்ட், பெரிய அளவிலான பங்குகளை விற்பனை செய்யவில்லை, ஆனால் டைகர் குளோபல் மற்றும் ஜெனரல் அட்லாண்டிக் போன்ற சிறிய முதலீட்டாளர்கள், இந்த IPO மூலம் தங்கள் வசம் இருக்கும் பங்குகளை விற்பனை செய்ய இருப்பதாக சொல்லப்படுகிறது.

அமெரிக்காவைச் சேர்ந்த வால்மார்ட், ஃபோன்பே-வில் 70 சதவீதத்திற்கும் அதிகமான பங்குகளை வைத்துள்ளது. அதே சமயம் ஜெனரல் அட்லாண்டிக் மற்றும் டைகர் குளோபல் தலா 9 சதவீதத்திற்கும் குறைவான பங்குகளை வைத்துள்ளன.

UPI பணப் பரிவர்த்தனைகளில் 45 சதவீதத்திற்கும் அதிகமான சந்தைப் பங்கைக் கொண்டுள்ள ஃபோன்பே, QR குறியீடு அடிப்படையிலான பரிவர்த்தனைகளில் சந்தைத் தலைவராக விளங்குகிறது. மேலும், பேமெண்ட் கேட்வே சேவைகள், காப்பீடு மற்றும் கடன்கள் போன்ற நிதிச் சேவைகளையும் தனது செயலி மூலம் வழங்குகிறது.இந்த IPO-வை நிர்வகிக்க, ஜே.பி. மார்கன், மார்கன் ஸ்டான்லி, சிட்டிகுரூப் மற்றும் கோடக் மஹிந்திரா கேபிடல் போன்ற முதலீட்டு வங்கிகள் நியமிக்கப்பட்டுள்ளன.

ஃபோன்பே நிறுவனம், முதலில் ஃபிளிப்கார்ட்டின் துணை நிறுவனமாக டிசம்பர் 2015-ல் தொடங்கப்பட்டது. பின்னர், வால்மார்ட் ஃபிளிப்கார்ட்டில் முதலீடு செய்த பிறகு, ஃபோன்பே-வின் உரிமை வால்மார்ட்டிடம் மாறியது. டிசம்பர் 2020-ல், வால்மார்ட் ஃபோன்பே-வை தனது நேரடித் துணை நிறுவனமாக மறுசீரமைத்தது, இதன் மூலம் ஃபிளிப்கார்ட்டில் இருந்து அதைத் தனியாகப் பிரித்தது.

Disclaimer: இந்த செய்தியில் இருக்கும் கருத்துகள் மற்றும் பரிந்துரைகள் தனிப்பட்ட ஆய்வாளர்கள் அல்லது நிறுவனங்களின் சொந்த கருத்துகளாகும், இவை Goodreturns.in அல்லது Greynium Information Technologies Private Limited (இவை இரண்டும் "நாங்கள்" என குறிப்பிடப்படுகிறது) ஆகியவற்றின் கருத்துகளைப் பிரதிபலிக்கவில்லை. உள்ளடக்கத்தின் துல்லியம், முழுமை அல்லது நம்பகத்தன்மைக்கு நாங்கள் எந்தவொரு உத்தரவாதம் அளிக்கவோ, அங்கீகரிக்கவோ அல்லது பொறுப்பேற்கவோ மாட்டோம். மேலும், முதலீட்டு ஆலோசனை அல்லது பங்குகளை வாங்கவோ விற்கவோ எந்த வித தூண்டுதலையும், ஊக்கத்தையும் நாங்கள் வழங்கவில்லை. அனைத்து தகவல்களும் புரிதல் நோக்கங்களுக்காக மட்டுமே வழங்கப்படுகின்றன. எந்தவொரு முதலீட்டு முடிவுகளை எடுப்பதற்கு முன்பும், அங்கீகரிக்கப்பட்ட நிதி ஆலோசகர்களிடமிருந்து தனிப்பட்ட முறையில் சரிபார்க்கப்பட வேண்டும்.