அம்பானின்னா சும்மாவா.. 22 நாட்களில் 160% லாபம் தந்த ரிலையன்ஸ் சாக்லேட் நிறுவனம்..!

ரிலையன்ஸ் குழுமத்திற்கு சொந்தமான ஒரு ஸ்மால் கேப் நிறுவனத்தின் பங்கு தொடர்ந்து 22ஆவது நாளாக அப்பர் சர்க்யூட் நிலையை எட்டி இருக்கிறது. லோட்டஸ் சாக்லேட் கம்பெனி என்ற ஸ்மால் கேப் நிறுவனம் ரிலையன்ஸ் குழுமத்திற்கு சொந்தமானது.

இந்த நிறுவனத்தின் பங்கு மதிப்பு தொடர்ந்து 22ஆவது நாளாக ஒரு நாளைக்கு 5% என்ற அளவில் உயர்ந்து வருகிறது. அதுமட்டுமின்றின் இந்த பங்கு தொடர்ந்து 22ஆவது நாளாக அப்பர் சர்க்யூட் நிலையை எட்டி இருக்கிறது.

ஆகஸ்ட் 19ஆம் தேதி அன்று பங்குச்சந்தையில் இந்த நிறுவனத்தின் பங்கு மதிப்பு 2044 ரூபாய் என உயர்ந்தது. குறிப்பாக தன்னுடைய 52 வார காலம் உச்சத்தை இந்த பங்கு எட்டியது. கடந்த 22 நாட்களில் மட்டும் இந்த நிறுவனத்தின் பங்கு மதிப்பு 160 % உயர்ந்துள்ளதாக பங்குச்சந்தை நிபுணர்கள் கூறுகின்றனர்.

இந்த நிறுவனம் அண்மையில் ஜூன் மாதத்துடன் நிறைவடைந்த காலாண்டிற்கான தங்கள் நிறுவனத்தின் நிதிநிலை அறிக்கையை வெளியிட்டது. இதனை அடுத்து இந்த நிறுவனத்தின் பங்குகள் தொடர்ந்து ஏற்றத்திலேயே இருக்கின்றன ஏனெனில் இந்த நிறுவனத்தில் செயல்பாடுகள் மூலம் கிடைத்த நிகர வருமானம் இந்த ஓராண்டு காலத்தில் 333% அதிகரித்துள்ளது. நிறுவனத்தின் நிகர லாபமும் பல மடங்கு உயர்ந்துள்ளது. இந்த செய்தி வெளியானதில் இருந்தே லோட்டஸ் சாக்லேட் கம்பெனி பங்கு மதிப்பு கணிசமான அளவு வளர்ந்து வருகிறது.

மும்பை பங்குச்சந்தையில் பட்டியலிடப்பட்டுள்ள ஸ்மால் கேப் நிறுவனம் தான் லோட்டஸ் சாக்லேட் கம்பெனி. இந்த நிறுவனத்தை பொருத்தவரை இந்தியாவின் முன்னணி சாக்லேட் உற்பத்தி நிறுவனமாக செயல்பட்டு வருகிறது. 1988 ஆம் ஆண்டு இது நிறுவனமாக பதிவு செய்யப்பட்டு 1992 ஆம் ஆண்டு முதல் செயல்பட்டு வருகிறது. உள்நாட்டிலும் மற்றும் வெளிநாட்டுகளுக்கும் சாக்லேட் மற்றும் கோகோ பொருட்களை தயாரித்து விற்பனை செய்து வருகிறது.

கடந்த 2023 ஆம் ஆண்டு மே மாதம் ரிலையன்ஸ் கன்ஸ்யூமர் ப்ராடக்ட் நிறுவனம் லோட்டஸ் சாக்லேட் கம்பெனி நிறுவன பங்குகளில் சுமார் 51% வாங்கி நிறுவனத்தை கையகப்படுத்தியது தற்போது ரிலையன்ஸ் குழுமத்தின் துணை நிறுவனமாக லோட்டஸ் சாக்லேட் நிறுவனம் செயல்பட்டு வருகிறது. தற்போது லோட்டஸ் சாக்லேட் நிறுவனம் பிரிட்டானியா , நெஸ்லே உள்ளிட்ட பெரு நிறுவனங்களுடன் போட்டி போட்டு வருகிறது.

இந்நிறுவன சந்தை மூலதன மதிப்பு 2500 கோடி ரூபாய் ஆகும். இதன் புரமோட்டர்கள் 72 % பங்குகளையும் சில்லறை முதலீட்டாளர்கள் 28 % பங்குகளையும் கொண்டுள்ளனர். இந்த பங்கின் 52 வார கால குறைந்தபட்ச மதிப்பு 213 ரூபாய், அதிகபட்ச மதிப்பு 2044 ரூபாய் ஆகும்.

Story written by: Devika