9.51 லட்சம் பங்குகளை வாங்கிய பிரபல முதலீட்டாளர்.. அப்பர் சர்க்கியூட் அடித்த எஸ்ஜி ஃபின்சர்வ்

பங்குச் சந்தை ஒரு விசித்ரமான உலகம். பங்குச் சந்தையில் எப்போது ஒரு பங்கின் விலை உயரும் அல்லது வீழ்ச்சி காணும் என்று யாராலும் துல்லியமாக கூற முடியாது. அது போல் பங்கின் விலை எந்த காரணத்துக்காக அதிகரிக்கிறது அல்லது குறைகிறது என்பதும் சில சமயங்களில் மர்மமாகவே இருக்கும்.

பிரபலமான முதலீட்டாளர் ஒருவர் ஒரு குறிப்பிட்ட நிறுவன பங்கில் முதலீடு செய்துள்ளார் என்ற தகவல் வெளியானால், அந்த குறிப்பிட்ட பங்கில் பலரும் கண்ணை மூடிக் கொண்டு முதலீடு செய்வார்கள். இதனால் அந்த பங்கின் விலை விறுவிறுவென ஏற்றம் காணும். அதற்கு எடுத்துக்காட்டாக நேற்று பங்குச் சந்தையில் எஸ்ஜி ஃபின்சர்வ் லிமிடெட் பங்கு விலை உயர்ந்ததை சொல்லலாம்.

கடந்த திங்கட்கிழமையன்று பிரபல முதலீட்டாளர் மதுசூதன் முரளிதர் கேலா, எஸ்ஜி ஃபின்சர்வ் லிமிடெட் நிறுவனத்தின் 1.7 சதவீம் அல்லது 9.51 லட்சம் பங்குகளை வாங்கினார். ஒரு பங்கின் விலை ரூ.350.01 என்ற விலையில் 9.51 லட்சம் பங்குகளை வாங்கியுள்ளார் என தகவல்.

இதனையடுத்து மும்பை பங்குச் சந்தையில் நேற்று வர்த்தகத்தின் இடையே எஸ்ஜி ஃபின்சர்வ் லிமிடெட் நிறுவன பங்கின் விலை 20 சதவீதம் உயர்ந்து அப்பர் சர்க்கியூட் அடித்தது. இருப்பினும் வர்த்தகத்தின் முடிவில் இப்பங்கின் விலை முந்தைய வர்த்தக தினத்தை காட்டிலும் 14.14 சதவீதம் உயர்ந்து ரூ.411.55ல் முடிவுற்றது. மும்பை பங்குச் சந்தையில் இன்றும் பங்கு வர்த்தகத்தின் இடையே இப்பங்கின் விலை முந்தைய வர்த்தக தினத்தை காட்டிலும் 2.10 சதவீதம் உயர்ந்து ரூ.420.20ஆக இருந்தது.

எஸ்ஜி ஃபின்சர்வ் லிமிடெட் நிறுவனம் ரிசர்வ் வங்கியில் பதிவுசெய்யப்பட்ட வங்கி அல்லாத நிதி நிறுவனமாகும். இந்நிறுவனம் இந்திய நிறுவனங்களின் டீலர்கள், விநியோகஸ்தர்கள், சில்லரை விற்பனையாளர்கள், வாங்குபவர்கள், சப்ளையர்கள், டிரான்ஸ்போர்ட்டர்கள்/லாஜிஸ்டிக்ஸ் போன்ற சேனல் கூட்டாளர்களுக்கு தொழில்நுட்பத்தின் முழு அளவிலான பயன்பாட்டின் மூலம் உள்ளடக்கிய வணிக நிதி தீர்வுகளை வழங்குகிறது.

கடந்த 2023-24ம் நிதியாண்டில் எஸ்ஜி ஃபின்சர்வ் லிமிடெட் நிறுவனம் வருவாயாக ரூ.189.72 கோடியும், நிகர லாபமாக ரூ.78.59 கோடியும் ஈட்டியுள்ளது. மேலும் அந்த நிதியாண்டில் இந்நிறுவனத்தின் ஒரு பங்கு வாயிலான வருமானம் ரூ.15.72ஆக இருந்தது.

2024 டிசம்பர் காலாண்டில் எஸ்ஜி ஃபின்சர்வ் லிமிடெட் நிறுவனம் வருவாயாக ரூ.42.49 கோடி ஈட்டியுள்ளது. மேலும் அந்த காலாண்டில் இந்நிறுவனம் நிகர லாபமாக ரூ.23.69 கோடி ஈட்டியுள்ளது. மேலும் அந்த காலாண்டில் இந்நிறுவனத்தின் ஒரு பங்கு வாயிலான வருமானம் ரூ.4.24ஆக இருந்தது. கடந்த 12 மாதங்களில் இப்பங்கின் விலை 1.58 சதவீதம் வீழ்ச்சி கண்டது. அதேசமயம் இந்த ஆண்டில் இதுவரையிலான காலத்தில் இப்பங்கின் விலை 1.69 சதவீதம் ஏற்றம் கண்டுள்ளது. மும்பை பங்குச் சந்தையில் இன்று வர்த்தகத்தின் இடையே இந்நிறுவன பங்குகளின் மொத்த சந்தை மதிப்பு ரூ.2,333 கோடியாக இருந்தது.

Disclaimer: This article is strictly for informational purposes only. It is not a solicitation to buy, sell in precious metal products, commodities, securities or other financial instruments. Greynium Information Technologies Pvt Ltd, its subsidiaries, associates and the author of this article do not accept culpability for losses and/or damages arising based on information in this article.