பட்ஜெட்டில் ரயில்வேக்கு கூடுதல் நிதி... இர்கான், ரயில் விகாஸ் பங்குகள் மீது ஒரு கண் வையுங்க..!!

மத்திய நிதியமைச்சர் நிர்மலா சீதாராமன் நாளை எதிர்வரும் 2025-26ம் நிதியாண்டுக்கான மத்திய பட்ஜெட்டை தாக்கல் செய்ய உள்ளார். எதிர்வரும் பட்ஜெட்டில், ரயில்வே மூலதன செலவினங்களுக்காக ரூ.3 லட்சம் கோடி வரை ஒதுக்கப்படும் என எதிர்பார்க்கப்படுகிறது. ரயில் சேவையை விரிவுப்படுத்துதல், ரயில்வேயின் உள்கட்டமைப்புகளை பலப்படுத்துதல் போன்ற காரணங்களுக்காக முந்தைய நிதியாண்டைக் காட்டிலும் கூடுதலாக நிதி ஒதுக்கும் என எதிர்பார்க்கப்படுகிறது. 2024-25ம் நிதியாண்டுக்கான பட்ஜெட்டில் ரயில்வேக்கு ரூ.2.62 லட்சம் கோடி ஒதுக்கப்பட்டது.

மத்திய பட்ஜெட்டில் ரயில்வே துறைக்கு கூடுதல் நிதி ஒதுக்கப்படும் என்ற எதிர்பார்ப்பு காரணமாக, அடுத்த 2 வர்த்தக தினங்களில், இர்கான் இன்டர்நேஷனல், ரயில் விகாஸ் நிகாம் லிமிடெட், ஆஐடிஇஎஸ் லிமிடெட், டெக்ஸ்மோகோ ரயில் கண்டெய்னர் கார்ப்பரேஷன் ஆஃப் இந்தியா போன்ற ரயில்வே துறை பங்குகள் மற்றும் எல் அண்ட் டி மற்றும் சீமென்ஸ் போன்ற ரயில்வே ஆர்டர் தொடர்பான நிறுவன பங்குகள் மீது முதலீட்டாளர்களின் கவனம் இருக்கும். அதேசமயம், வளர்ச்சி குறித்த கவலைகள் காரணமாக ஒரு டஜன் ரயில்வே பங்குகளின் விலை அதன் 52 உயர்விலிருந்து 19 முதல் 51 சதவீதம் குறைந்துள்ளன. தற்போது ரயில்வேக்கான மூலதன செலவினங்கள் அதிகரிப்பு என்ற செய்தி முதலீட்டாளர்கள் உணர்வை உயர்த்தும்.

ரயில் பெட்டிகள் தயாரிப்பில் ஈடுபட்டு வரும் ஜூபிடர் வேகன்ஸ் லிமிடெட் பங்கு விலை தற்போது அதன் 52 வார உச்சவிலையை காட்டிலும் 51.44 சதவீதம் குறைவாக உள்ளது. மும்பை பங்குச் சந்தையில் நேற்று வர்த்தகத்தின் முடிவில் இப்பங்கின் விலை ரூ.356.70ஆக இருந்தது. ரயில் பெட்டி உள்ளிட்டவைகளை தயாரித்து வரும் திதாகர் ரயில் நிறுவன பங்கு விலை தற்போது அதன் 52 வார உச்சவிலையை காட்டிலும் 50.04 சதவீதம் குறைவாக உள்ளது. மும்பை பங்குச் சந்தையில் நேற்று வர்த்தகத்தின் முடிவில் இப்பங்கின் விலை ரூ.960.40ஆக இருந்தது.

டெக்ஸ்மோகோ ரயில் அண்ட் என்ஜினீயரிங் லிமிடெட் பங்கு விலை தற்போது அதன் 52 வார உச்சவிலையை காட்டிலும் 38 சதவீதம் குறைவாக உள்ளது. மும்பை பங்குச் சந்தையில் நேற்று வர்த்தகத்தின் முடிவில் இப்பங்கின் விலை ரூ.189.90ஆக இருந்தது. இர்கான் இன்டர்நேஷனல் லிமிடெட், ஓரியண்டல் ரயில் இன்ஃப்ராஸ்ட்ரக்சர் லிமிடெட், ரயில்டெல் கார்ப்பரேஷன் ஆஷப் இந்தியா மற்றும் ரைட்ஸ் ஆகிய நிறுவன பங்குகளின் விலை தற்போது அவற்றின் 52 வார உச்சவிலையை காட்டிலும் 38-44 சதவீதம் வரை குறைவாக உள்ளது.

கண்டெய்னர் கார்ப்பரேஷன் ஆஃப் இந்தியா, பிஇஎம்எல் லிமிடெட், ரயில் விகாஸ் நிகாம் லிமிடெட். இந்தியன் ரயில்வே கேட்டரிங் அண்ட் டூரிசம் கார்ப்பரேஷன் லிமிடெட் மற்றும் கெர்னெக்ஸ் மைக்ரோசிஸ்டம்ஸ் லிமிடெட் ஆகிய நிறுவனங்களின் பங்கு விலை தற்போது அவற்றின் 52 வார உச்சவிலையை காட்டிலும் 19-38 சதவீதம் வரை சரிந்துள்ளது. வளர்ச்சி வாய்ப்புகளுக்காக நவீனமயமாக்கல், நிலைத்தன்மை மற்றும் சரக்கு தளவாடங்களில் ஈடுபட்டுள்ள நிறுவனங்களின் பங்குகளை வாங்குவதில் முதலீட்டாளர்கள் கவனம் செலுத்த வேண்டும் என்று நிபுணர்கள் வலியுறுத்தியுள்ளனர்.

Disclaimer: This article is strictly for informational purposes only. It is not a solicitation to buy, sell in precious metal products, commodities, securities or other financial instruments. Greynium Information Technologies Pvt Ltd, its subsidiaries, associates and the author of this article do not accept culpability for losses and/or damages arising based on information in this article.

story written by: Subramanian