100 முதல் 800 சதவீதம் வரை லாபம் கொடுத்த டாப் 10 பங்குகள்..!

நடப்பு 2024ம் ஆண்டின் முதல் அரையாண்டு இன்னும் சில தினங்களில் நிறைவடைய உள்ளது. இந்த முதல் அரையாண்டில் இந்திய பங்குச் சந்தைகளில் வர்த்தகத்தில் கடும் ஏற்ற இறக்கம் நிலவியது.

மக்களவை தேர்தல், அமெரிக்க ரிசர்வ் வங்கி வட்டி விகிதத்தை குறைக்கும் என்ற எதிர்பார்ப்பு, இஸ்ரேல்-ஹமாஸ் போர் போன்ற பல்வேறு காரணங்களால் இந்திய பங்குச் சந்தைகளில் வர்த்தகம் நிலையில்லாமல் இருந்தது. இருப்பினும் இந்த ஆண்டின் முதல் அரையாண்டில் பங்குச் சந்தைகள் ஏறுமுகத்தில் இருந்தது.

இந்த காலத்தில் தேசிய பங்குச் சந்தையின் குறியீட்டு எண் நிப்டி 9 சதவீதத்துக்கு மேல் உயர்ந்துள்ளது. அதேசமயம் நிப்டி ஸ்மால்கேப் மற்றும் மிட்கேப் இன்டெக்ஸ் தலா 20 சதவீதம் அதிகரித்துள்ளது.

2024ம் ஆண்டின் முதல் அரையாண்டில், பல நிறுவன பங்குகள் மல்டிபேக்கர் வருமானத்தை கொடுத்துள்ளன. குறிப்பாக, ரூ.1,000 கோடிக்கும் அதிக சந்தை மதிப்பு கொண்ட 85 நிறுவனங்கள் 100 சதவீதம் முதல் சுமார் 800 சதவீதம் வரை முதலீட்டாளர்களுக்கு ஆதாயத்தை கொடுத்துள்ளன.

இதில், ஐ.டி., டெலிகாம், டெக்ஸ்டைல், மின்சாரம், பொறியியல் சாதனங்கள், ரசானயங்கள், வேளாண் மற்றும் உள்கட்டமைப்பு உள்பட பல்வேறு துறைகளை சேர்ந்த நிறுவன பங்குகளும் இடம் பிடித்துள்ளன. அதில் அதிக ஆதாயம் கொடுத்த டாப் 10 நிறுவன பங்குகள் இதோ.

மார்சன்ஸ்: உள்நாட்டு நிறுவனமான மார்சன்ஸ் மின் மாற்றிகள் உள்ளிட்ட மின் உபகரணங்களை தயாரிப்பில் ஈடுபட்டுள்ளது. இந்நிறுவன பங்கு முதல் அரையாண்டில் இந்நிறுவன பங்கின் விலை 797.94 சதவீதம் உயர்ந்துள்ளது. மும்பை பங்குச் சந்தையில் இன்று வர்த்தகத்தின் இடையே இப்பங்கின் விலை ரூ.65.51ஆக இருந்தது.

டின்னா டிரேட்: பிரபலமான டின்னா குழுமத்தை சேர்ந்த நிறுவனம் டின்னா டிரேட். இந்நிறுவன பங்கு இந்த ஆண்டின் முதல் அரையாண்டில் முதலீட்டாளர்களின் பணத்தை 718.86 சதவீதம் அதிகரித்துள்ளது. மும்பை பங்குச் சந்தையில் இன்று வர்த்தகத்தின் இடையே இப்பங்கின் விலை ரூ.361.15ஆக இருந்தது.

டைமண்ட் பவர் இன்ப்ராஸ்ட்ரக்சர்: இந்நிறுவனம் மின் பரிமாற்ற உபகரணங்கள் தயாரிப்பில் ஈடுபட்டு வருகிறது. இந்நிறுவன பங்கு 673.91 சதவீதம் லாபம் கொடுத்துள்ளது. தேசிய பங்குச் சந்தையில் இன்று வர்த்தகத்தின் இடையே இப்பங்கின் விலை ரூ.1,269.25ஆக இருந்தது.

பொண்டாடா இன்ஜினியரிங்: தொலைத்தொடர்பு உள்கட்டமைப்பு துறையை சேர்ந்த இந்நிறுவன பங்கின் விலை இந்த ஆண்டின் முதல் பாதியில் 651.91 சதவீதம் உயர்ந்துள்ளது. மும்பை பங்குச் சந்தையில் இன்று வர்த்தகத்தின் இடையே இப்பங்கின் விலை ரூ.2,562.00ஆக இருந்தது.

ஏராயா லைப்ஸ்பேஸ்: ஸ்மால் கேப் பங்கான ஏராயா லைப்ஸ்பேஸ், இந்த ஆண்டின் முதல் அரையாண்டில் மல்டிபேக்கர் ஆதாயத்தை கொடுத்துள்ளது. முதலீட்டாளர்களுக்கு 573.89 சதவீதம் லாபம் கொடுத்துள்ளது. மும்பை பங்குச் சந்தையில் இன்று வர்த்தகத்தின் இடையே இந்நிறுவன பங்கின் விலை ரூ.800ஆக இருந்தது.

ஸ்ப்ரைட் அக்ரோ: மும்பை பங்குச் சந்தையில் இன்று வர்த்தகத்தின் இடையே இந்நிறுவன பங்கின் விலை ரூ.49.44ஆக இருந்தது. நடப்பு முதல் அரையாண்டில் இந்நிறுவன பங்கின் விலை 523.55 சதவீதம் உயர்ந்துள்ளது.

வசுபக்னானி இண்டஸ்ட்ரீஸ்: இந்நிறுவனம் படத் தயாரிப்பு மற்றும் அது சார்ந்த வர்த்தகத்தில் ஈடுபட்டு வருகிறது. இந்நிறுவன பங்கின் விலை 476.7 சதவீதம் உயர்ந்துள்ளது. மும்பை பங்குச் சந்தையில் இன்று வர்த்தகத்தின் இடையே இப்பங்கின் விலை ரூ.331.10ஆக இருந்தது.

கேசர் இந்தியா: கேசர் இந்தியா ரியல் எஸ்டேட் வர்த்தகத்தில் ஈடுபட்டுள்ளது. இந்த ஆண்டின் முதல் அரையாண்டில் இந்நிறுவன பங்கின் விலை 465.58 சதவீதம் ஏற்றம் கண்டுள்ளது. மும்பை பங்குச் சந்தையில் இன்று வர்த்தகத்தின் இடையே இப்பங்கின் விலை ரூ.820.00ஆக இருந்தது.

டால்பின் ஆஃப்ஷோர் என்டர்பிரைசஸ்: இந்திய எண்ணெய் மற்றும் எரிவாயு துறையை சேர்ந்த நிறுவனங்களுக்கு நீருக்கடியில் சேவைகளை வழங்குகிறது. இந்நிறுவன பங்கு கணக்கீடு காலத்தில் முதலீட்டாளர்களின் பணத்தை 463.5 சதவீதம் பெருக்கியுள்ளது. மும்பை பங்குச் சந்தையில் இன்று வர்த்தகத்தின் இடையே இப்பங்கின் விலை ரூ.700ஆக இருந்தது.

வாரீ ரீனியூவபிள் டெக்னாலஜிஸ்: மின் துறையை சேர்ந்த இந்நிறுவன பங்கின் விலை இந்த ஆண்டின் முதல் அரையாண்டில் 395.61 சதவீதம் உயர்ந்துள்ளது. மும்பை பங்குச் சந்தையில் இன்று வர்த்தகத்தின் இடையே இந்நிறுவன பங்கின் விலை ரூ.1,905.00ஆக இருந்தது.

Story written by: Subramanian