5 வருடத்தில் 529% லாபம்.. வாங்கலேன்னா வாங்கி போடுங்க - திரிவேணி டர்பைன்

திரிவேணி டர்பைன் லிமிடெட் நிறுவனம் மின்உற்பத்தி உபகரணங்கள் உற்பத்தி மற்றும் சப்ளை செய்வதில் ஈடுபட்டுள்ளது. மேலும் இந்நிறுவனம் நாட்டின் முன்னணி தொழில்துறை நீராவி டர்பைன் உற்பத்தியாளர் என்பது குறிப்பிடத்தக்கது. இந்நிறுவனம் நிலையான நிதி நிலை முடிவுகள் மற்றும் வர்த்தக வளர்ச்சியை கொண்டுள்ளது. இதனால் முதலீட்டாளர்கள் விரும்பும் பங்குகளில் ஒன்றாக இந்நிறுவனம் உள்ளது.

திரிவேணி டர்பைன் லிமிடெட் நிறுவனம் தொடர்ந்து லாபம் ஈட்டி வருகிறது. 2024 டிசம்பர் காலாண்டில் திரிவேணி டர்பைன் லிமிடெட் நிறுவனம் நிகர லாபமாக ரூ.92.4 கோடி ஈட்டியுள்ளது. இது முந்தைய ஆண்டின் காலாண்டைக் காட்டிலும் 35.5 சதவீதம் அதிகமாகும்.

2023 டிசம்பர் காலாண்டில் இந்நிறுவனம் நிகர லாபமாக ரூ.68.2 கோடி மட்டுமே ஈட்டியிருந்தது. 2024 டிசம்பர் காலாண்டில் இந்நிறுவனம் வருவாயாக ரூ.503.4 கோடி ஈட்டியுள்ளது. 2023 டிசம்பர் காலாண்டில் திரிவேணி டர்பைன் லிமிடெட் நிறுவனம் வருவாயாக ரூ.431.7 கோடி ஈட்டியிருந்தது.

நீண்ட கால அடிப்படையில் திரிவேணி டர்பைன் நிறுவன பங்கு முதலீட்டாளர்களுக்கு மல்டிபேக்கர் ஆதாயத்தை கொடுத்துள்ளது. கடந்த 5 ஆண்டுளில் இந்நிறுவன பங்கு முதலீட்டாளர்களின் பணத்தை 529 சதவீதம் அதிகரித்துள்ளது. 2020 பிப்ரவரி 6ம் தேதியன்று பங்குச் சந்தையில் இப்பங்கின் விலை ரூ.95ஆக இருந்தது.

இன்று மும்பை பங்குச் சந்தையில் வர்த்தகத்தின் இடையே இப்பங்கின் விலை அதிகபட்சமாக ரூ.598 வரை சென்றது. அதேவேளையில், கடந்த 5 ஆண்டுகளில் சென்செக்ஸ் 89.77 சதவீதம் மட்டுமே உயர்வு கண்டது.

கடந்த ஒரு வருடத்தில் திரிவேணி டர்பைன் நிறுவன பங்கின் விலை 23 சதவீதம் வளர்ச்சி கண்டது. அதேசமயம் கடந்த 3 ஆண்டுகளில் இப்பங்கின் விலை 179 சதவீதம் வளர்ச்சி கண்டுள்ளது. 2024 நவம்பர் 26ம் தேதியன்று இப்பங்கின் விலை புதிய 52 வார உச்சவிலையான ரூ.885ஐ எட்டியது.

தற்போது இப்பங்கின் விலை அதன் உச்ச விலையிலிருந்து 34 சதவீதம் குறைவாக உள்ளது. வரும் நாட்களில் இந்நிறுவன பங்கின் விலை உயரும் என கணிக்கப்பட்டுள்ளது. தரகு நிறுவனமான மிரே அசெட் ஷோ்கான் நிறுவனம், திரிவேணி டர்பைன் நிறுவன பங்கின் இலக்கு விலை ரூ.750ஆக நிர்ணயம் செய்துள்ளது.