மேட் இன் இந்தியா லேபிள் கொண்டு மோசடி செய்ததா Waaree Energy நிறுவனம்? அமெரிக்கா விசாரணை..

வாரீ எனர்ஜிஸ் (Waaree energies) நிறுவனத்தின் பங்குகள் செப்டம்பர் 26 தேதியான இன்று 7 சதவீதத்திற்கும் மேலாக சரிந்தன. ஒரு பங்கு சுமார் 3,202 ரூபாய்க்கு வர்த்தகமானது. அமெரிக்க சுங்க அதிகாரிகள் வாரீ எனர்ஜிஸ் அமெரிக்க அரசின் வரிகளை தவிர்க்க சீனாவில் தயாரிக்கப்பட்ட செல்கள் மற்றும் பேனல்களை இந்தியாவிலிருந்து தயாரிக்கப்பட்டதாக முத்திரை குத்தி இறக்குமதி செய்ததா என்று விசாரித்து வருகின்றனர். இந்த தகவலே பங்கு சரிவுக்கு காரணம்.

அமெரிக்காவிலிருந்து ராய்ட்டர்ஸ் மற்றும் ப்ளூம்பெர்க் வெளியிட்ட அறிக்கைகளின்படி, "அமெரிக்க சுங்க மற்றும் எல்லைப் பாதுகாப்புத் துறை வாரீ மற்றும் வாரீ சோலார் அமெரிக்காஸ் மீது முறையான விசாரணையைத் தொடங்கியுள்ளது. நிறுவனம் அமெரிக்காவிற்கு பொருட்களைக் கொண்டு வரும்போது வரிகளை ஏய்த்தது என்று நியாயமான சந்தேகம் இருப்பதால் விசாரணை முன்னெடுக்கப்பட்டுள்ளது" என கூறியுள்ளன.

சீனாவில் தயாரிக்கப்பட்ட சூரிய மின்கலங்களை இந்தியாவிலிருந்து வந்ததாகக் கூறி, அமெரிக்கா சீன சூரிய சாதனங்கள் மீது விதிக்கும் வரிகளைத் தவிர்த்ததாக வாரீ நிறுவனம் மீது குற்றம் சாட்டப்பட்டுள்ளது. இந்த குற்றச்சாட்டு, அமெரிக்க அலையன்ஸ் ஃபார் சோலார் மேனுஃபேக்சரிங் டிரேட் கமிட்டியிடமிருந்து வந்துள்ளது. இந்தக் குழு, வெளிநாட்டு உற்பத்தியாளர்கள் முறைகேடு செய்வதாக நீண்ட காலமாக குற்றம் சாட்டி வருகிறது.

சீனா, சூரிய மின் உற்பத்தித் துறையில் மிகப்பெரிய நாடாக திகழ்கிறது. பெரிய அளவிலான உற்பத்தி மற்றும் அரசின் ஆதரவு காரணமாக, உலக சந்தைகளில் மலிவான பேனல்களை சீன நிறுவனங்கள் ஏராளமாக விநியோகித்து வருகின்றன. அமெரிக்க உற்பத்தியாளர்கள், இதற்கு கடும் எதிர்ப்பு தெரிவிக்கின்றனர். இந்நிலையில் தான் அமெரிக்க அரசு சீன சூரிய மின்கலங்களுக்கு அதிக வரி விதித்தது.

வாரீ நிறுவனம் இந்த தடைகளை மீறியது கண்டறியப்பட்டால், அதன் விளைவுகள் கடுமையானதாக இருக்கலாம். கடந்த மாதம், அமெரிக்க வர்த்தகத் துறை இந்தோனேசியா, லாவோஸ் மற்றும் இந்தியாவிலிருந்து வரும் தயாரிப்புகள் குறித்து மற்றொரு விசாரணையைத் தொடங்கியது. இந்த ஆண்டு தொடக்கத்தில், வியட்நாம், கம்போடியா, மலேசியா மற்றும் தாய்லாந்திலிருந்து வரும் ஏற்றுமதிகள் மீது கடுமையான வரிகள் விதிக்கப்பட்டன.

அக்டோபர் 2024 IPO-வில் பங்குச்சந்தையில் நுழைந்த இந்நிறுவனம், முதலீட்டாளர்களுக்கு இன்னும் லாபத்தை தான் தந்துள்ளது, ஏனெனில் பங்கு பட்டியலிடப்பட்டதிலிருந்து 47 சதவீதம் உயர்ந்துள்ளது. சமீப காலங்களில் வாரீ எனர்ஜிஸ் பங்குகளின் செயல்திறனைப் பார்ப்போம். பங்குகள் 3 மாதங்களில் 11 சதவீதத்திற்கும் அதிகமான வருமானத்தையும், 6 மாதங்களில் 35 சதவீத வளர்ச்சியையும் அளித்துள்ளன.

மும்பையைத் தலைமையிடமாகக் கொண்ட வாரீ எனர்ஜிஸ், இந்தியாவின் மிகப்பெரிய சூரிய மின்சக்தி மாடுல் தயாரிப்பாளர். இது பிவி மாடுல்களுக்கு 15 ஜிகாவாட் மற்றும் சூரிய மின்கலங்களுக்கு 5.4 ஜிகாவாட் உற்பத்தித் திறன் கொண்டது. குஜராத்தில் சூரத், தும்ப், நந்திகிராம், சிக்ளி ஆகிய இடங்களிலும், உத்தரபிரதேசத்தில் உள்ள நொய்டாவில் இண்டோசோலார் வசதியிலும் ஐந்து தொழிற்சாலைகளைக் கொண்டுள்ளது.

ஜூன் காலாண்டில் (Q1 FY26), இந்நிறுவனம் நிகர லாபத்தில் 93 சதவீதம் உயர்ந்து ரூ. 773 கோடியைப் பதிவு செய்தது, ஒரு வருடத்திற்கு முன்பு இது ரூ. 401 கோடியாக இருந்தது. வருவாயும் உயர்ந்தது, கடந்த ஆண்டு இதே காலகட்டத்தில் ரூ. 3,496.41 கோடியாக இருந்த நிலையில், தற்போது ரூ. 4,597.18 கோடியைத் தொட்டுள்ளது.

Disclaimer: இந்த செய்தியில் இருக்கும் கருத்துகள் மற்றும் பரிந்துரைகள் தனிப்பட்ட ஆய்வாளர்கள் அல்லது நிறுவனங்களின் சொந்த கருத்துகளாகும், இவை Goodreturns.in அல்லது Greynium Information Technologies Private Limited (இவை இரண்டும் "நாங்கள்" என குறிப்பிடப்படுகிறது) ஆகியவற்றின் கருத்துகளைப் பிரதிபலிக்கவில்லை. உள்ளடக்கத்தின் துல்லியம், முழுமை அல்லது நம்பகத்தன்மைக்கு நாங்கள் எந்தவொரு உத்தரவாதம் அளிக்கவோ, அங்கீகரிக்கவோ அல்லது பொறுப்பேற்கவோ மாட்டோம். மேலும், முதலீட்டு ஆலோசனை அல்லது பங்குகளை வாங்கவோ விற்கவோ எந்த வித தூண்டுதலையும், ஊக்கத்தையும் நாங்கள் வழங்கவில்லை. அனைத்து தகவல்களும் புரிதல் நோக்கங்களுக்காக மட்டுமே வழங்கப்படுகின்றன. எந்தவொரு முதலீட்டு முடிவுகளை எடுப்பதற்கு முன்பும், அங்கீகரிக்கப்பட்ட நிதி ஆலோசகர்களிடமிருந்து தனிப்பட்ட முறையில் சரிபார்க்கப்பட வேண்டும்.