புதிய சேவை வரப்போகுது.. இனி பிளிப்கார்ட்டிலும் ஃபுட் ஆர்டர் செய்யலாம்!

சென்னை: பிளிப்கார்ட் (Flipkart) வாடிக்கையாளர்கள், விரைவில் ONDC மூலம் உணவு ஆர்டர் செய்யலாம். பிளிப்கார்ட் என்ற இ-காமர்ஸ் நிறுவனம், Open Network for Digital Commerce (ONDC) என்ற தளத்துடன் இணைந்து உணவு டெலிவரி சேவையை வழங்க திட்டமிட்டுள்ளது. இதன் மூலம், பிளிப்கார்டில் மொபைல் போன்கள், ஆடைகள் போன்ற பொருட்களை வாங்குவது மட்டுமல்லாமல், உணவகங்கள், ஃபாஸ்ட் ஃபுட் கடைகளில் இருந்தும் உணவை ஆர்டர் செய்யும் வசதி கிடைக்கும்.

பிளிப்கார்ட் ஆப் மூலம் டோமினோஸ் (Dominos) மற்றும் மெக்டொனால்ட்ஸ் (McDonalds) போன்ற உணவகங்கள் மற்றும் துரித உணவு விற்பனை நிலையங்களில் இருந்து ஆர்டர் செய்ய முடியும். இதற்காக, பிளிப்கார்ட், ONDC உடன் தீவிரமாக விவாதித்து வருவதாக எக்கனாமிக் டைம்ஸ் அறிக்கை தெரிவித்துள்ளது.

இதன் மூலம், வாடிக்கையாளர்கள் பல்வேறு விற்பனையாளர்களிடமிருந்து நேரடியாக பொருட்களை வாங்க முடியும். பிளிப்கார்ட், ONDC உடன் இணைவதன் மூலம், வாடிக்கையாளர்களுக்கு அதிக தேர்வுகளும், போட்டித்திறன் மிக்க விலைகளிலும் உணவுகள் கிடைக்கும் என்று எதிர்பார்க்கப்படுகிறது.

பிளிப்கார்ட்-இல் ஃபேஷன் மற்றும் ஆடைகளைத் தேடும் போது பயனர்கள் உணவை ஆர்டர் செய்யலாம்.

2021ஆம் ஆண்டில் தொழில்துறை மற்றும் உள்நாட்டு வர்த்தகத்தை மேம்படுத்துவதற்காக ONDC தொடங்கப்பட்டது. தொடங்கப்பட்டதில் இருந்து, பல ஸ்டார்ட்அப்கள் மற்றும் பெரிய நிறுவனங்கள் தங்கள் வணிக செயல்பாடுகளை மேம்படுத்த ONDC நெட்வொர்க்கில் இணைந்துள்ளன.

ONDC தளத்தைப் பயன்படுத்தி, ஏப்ரல் மாதத்தில், ஓலா (OLA) அதன் ஆப் மூலம் பயனர்கள் மளிகை பொருட்கள் மற்றும் ஆடைகளை வாங்கும் அம்சத்தை உருவாக்கி வருகிறது. இதேபோல், ONDC வழியாக உணவு விநியோகம் மற்றும் டிக்கெட் முன்பதிவு போன்ற சேவைகளை PhonePe அறிமுகப்படுத்தியது.

டெல்லிவரி, உபெர், IDFC வங்கி, கோடக், டன்சோ மற்றும் டாடா நியூ போன்ற நிறுவனங்களும் தங்களின் சில சேவைகளை ONDC மூலம் பெறுகின்றன. கூடுதலாக, கௌதம் அதானி தலைமையிலான அதானி குழுமம் ONDC தளத்தைப் பயன்படுத்தி வணிகம் மற்றும் ஃபின்டெக் துறைகளில் நுழைவதைப் பரிசீலித்து வருவதாகக் கூறப்படுகிறது.

Flipkart நிறுவனம் ONDC உடன் இணைவதற்கான பேச்சுவார்த்தைகள் நடந்து வருகின்றன. Flipkart மட்டுமல்லாமல், Amazon போன்ற பிற முன்னணி இ-காமர்ஸ் நிறுவனங்களும் ONDC உடன் இணைவதற்கான ஆலோசனையில் இருப்பதாக தகவல்கள் வெளியாகியுள்ளன.

ONDC மூலம் உணவு ஆர்டர் செய்வதன் சில நன்மைகள்: Flipkart மொபைல் அப்ளிகேஷனில் இருந்தே பல்வேறு உணவகங்கள் மற்றும் ஃபாஸ்ட் ஃபுட் கடைகளில் இருந்து உணவை ஆர்டர் செய்ய முடியும். ONDC மூலம் சிறிய உணவகங்களும் தங்கள் உணவை ஆன்லைனில் விற்பனை செய்ய பெரிய வாய்ப்பு கிடைக்கும் என்று எதிர்பார்க்கப்படுகிறது.