தமிழ்நாடு டெக் ஸ்டார்ட்அப் நிறுவன முதலீடுகள் 85% சரிவு.. என்ன நடக்குது..?

தமிழ்நாடு டெக் 2023 தலைப்பில் டேட்டா நுண்ணறிவு துறை நிறுவனம் தமிழ்நாடு தொழில்நுட்ப துறையில் நிதி மற்றும் பிற முக்கிய முன்னேற்றங்கள் குறித்து முக்கியமான ஆய்வு செய்து அறிக்கை வெளியிட்டு உள்ளது.

டெக் துறையில் இந்தியாவில் அதிக முதலீடு பெறும் மாநிலங்களில் தமிழ்நாடு தொழில்நுட்பத் துறை ஆறாவது இடத்தில் உள்ளது. தமிழ்நாட்டின் டெக் ஸ்டார்ட்அப் துறை கடந்த ஐந்து ஆண்டுகளில் வென்சர் கேப்பிடல் முதலீட்டாளர்களிடம் இருந்து சுமார் $3.4 பில்லியன் திரட்டியுள்ளது.

தமிழ்நாடு டெக் எகோசிஸ்டம் அமைப்பு, 2023 ஆம் ஆண்டில் மொத்தம் 255 மில்லியன் டாலர் முதலீட்டை பெற்றுள்ளது. இது 2023 ஆம் ஆண்டில் கர்நாடகா, மகாராஷ்டிரா மற்றும் ஹரியானாவிற்குப் பிறகு நான்காவது அதிக முதலீடு பெற்ற மாநிலமாக உள்ளது என Tracxn ஆய்வில் தெரிய வந்துள்ளது.

இருப்பினும், மேக்ரோ பொருளாதாரக் காரணிகள், மந்தநிலை பிரச்சனைகள் மற்றும் அதிகரித்து வரும் வட்டி விகிதங்கள் ஆகியவற்றினால் முதலீட்டாளர்களின் தயக்கம் காரணமாக, 2022 முதல் 2023 வரை முதலீட்டு அளவில் பெரும் சரிவு ஏற்பட்டு உள்ளது.

டெக் ஸ்டார்ட்அப் நிறுவனங்களின் எண்ணிக்கையின் அடிப்படையில் தமிழ்நாடு நான்காவது இடத்தில் உள்ளது. மேலும், தமிழ்நாடு அரசு Startup and Innovation Policy 2023 ஐ வெளியிட்டுள்ளது, இதில் ஸ்டார்ட்அப் நிறுவனங்களின் சுற்றுச்சூழல் அமைப்பில் மாநிலத்தை முன்னணியில் கொண்டு செல்வதற்கான நடவடிக்கைக்கான பல பரிந்துரைகள் உள்ளன.

தமிழ்நாடு தொழில்நுட்ப துவக்க நிறுவனங்களின் சுற்றுச்சூழல் அமைப்பு 2023 இல் $255 மில்லியன் நிதியைப் பெற்றது, 2022 இல் திரட்டப்பட்ட $1.7 பில்லியனுடன் ஒப்பிடும்போது இது 85% சரிவாகும் மற்றும் 2021 இல் திரட்டப்பட்ட $598.4 மில்லியனிலிருந்து 57% சரிவாகும். கடந்த 10 ஆண்டுகளில் 2022 ஆம் ஆண்டில் அதிக முதலீடு பெற்ற ஆண்டாகும்.

ஸ்டார்ட்அப் நிறுவனங்களுக்கான ஆரம்ப-நிலை முதலீடு 2023ல் $32.6 மில்லியனாக இருந்தது, 2022 இல் திரட்டப்பட்ட $61.6 மில்லியனுடன் ஒப்பிடுகையில் இது 47% சரிவாகும். ஆரம்பக் கட்ட சுற்று (Early-stage rounds) முதலீடுகள் 2022 இல் $567 மில்லியனில் இருந்து 2023 இல் $77 மில்லியனாக 86% சரிந்தன.

லேட் ஸ்டேஜ் முதலீட்டுச் சுற்றில் இருக்கும் நிறுவனங்கள் 2023 இல் $145 மில்லியன் மதிப்புள்ள இறுதி கட்ட நிதியை ஈர்த்துள்ளன, இது 2022 இல் திரட்டப்பட்ட $1.1 பில்லியனுடன் ஒப்பிடுகையில் 87% வீழ்ச்சியாகும்.

2023 இல் தமிழ்நாடு தொழில்நுட்ப துவக்க நிறுவங்கள் சுற்றுச்சூழல் அமைப்பில் ஒரே ஒரு $100M+ முதலீட்டு சுற்று மட்டுமே காணப்பட்டது. TI கிளீன் மொபிலிட்டி எனும் ஒரு மின்சார மூன்று சக்கர வாகன உற்பத்தியாளர், மல்டிபிள்ஸ் ஆல்டர்நேட் அசெட் மேனேஜ்மென்ட் மற்றும் ஸ்டேட் பாங்க் ஆஃப் இந்தியா தலைமையில் சீரியஸ் D நிதி சுற்றில் $145 மில்லியன் திரட்டியது.

போக்குவரத்து மற்றும் லாஜிஸ்டிக்ஸ் தொழில்நுட்பம், சுற்றுச்சூழல் தொழில்நுட்பம் மற்றும் ஆட்டோ தொழில்நுட்பம் ஆகியவையே அதிக நிதியளிக்கப்பட்ட பிரிவுகளாகும்.

போக்குவரத்து மற்றும் லாஜிஸ்டிக்ஸ் டெக்-இல் உள்ள நிறுவனங்கள் 2023 இல் $160 மில்லியனைத் திரட்டியது, இது 2022 இல் திரட்டப்பட்ட $511 மில்லியனுடன் ஒப்பிடும்போது 69% சரிவாகும்.

சுற்றுச்சூழல் தொழில்நுட்பத் துறையானது 2023 இல் $151 மில்லியன் மதிப்புள்ள முதலீடுகளை ஈர்த்தது, இது முந்தைய ஆண்டில் திரட்டப்பட்ட $501 மில்லியனிலிருந்து 70% வீழ்ச்சியாகும். ஆட்டோ டெக்கிற்கான நிதியுதவி 2022ல் $558 மில்லியனில் இருந்து 2023ல் $150 மில்லியனாகக் குறைந்தது.

ஒட்டுமொத்த தமிழ்நாடு டெக் ஸ்டார்ட்அப் நிறுவன துறை 2023 இல் எட்டு கையகப்படுத்தல் ஒப்பந்தங்கள் பதிவாகியுள்ளது. இது 2022 இல் ஐந்து கையகப்படுத்தல்களை விட ஒரு சிறிய முன்னேற்றமாகும். கோரமண்டல் இன்டர்நேஷனல் நிறுவனம் DUMS ஐ கையகப்படுத்தியது மற்றும் லென்ஸ்கார்ட் நிறுவனம் டேங்கோ-வை வாங்கியது ஆகியவை 2023 இன் முக்கிய ஒப்பந்தங்களில் சில.

தமிழ்நாட்டில் டெக் ஸ்டார்ட்அப் நிறுவனங்கள் திரட்டப்பட்ட மொத்த நிதியில் 97% பங்கை பெற்றுச் சென்னை அதிக நிதியுதவி பெறும் நகரமாக இருந்தது. சென்னையை இருப்பிடமாகக் கொண்ட நிறுவனங்கள் 2023 இல் $247 மில்லியனையும், கோயம்புத்தூரைச் சேர்ந்த நிறுவனங்கள் ($6 மில்லியன்) மற்றும் ராணிப்பேட்டையை சேர்ந்த நிறுவனங்கள் ($2 மில்லியன்) திரட்டியுள்ளன.

RTBI, தி சென்னை ஏஞ்சல்ஸ் மற்றும் சிராட்டே வென்ச்சர்ஸ் ஆகியவை இன்று வரை தமிழ்நாட்டில் மிகவும் ஆக்டிவாக இருக்கும் முதலீட்டாளர்களாக உள்ளனர். பீக் XV பார்ட்னர்கள், ஸ்பெஷலே இன்வெஸ்ட் மற்றும் ஜாவா கேபிட்டல் ஆகியவை 2023 ஆம் ஆண்டில் சிறந்த seed-stage முதலீட்டாளர்களாக இருந்தன.

அதே நேரத்தில் மேஃபீல்ட், செலஸ்டா கேபிட்டல் மற்றும் ராக்கெட்ஷிப் ஆகியவை 2023 ஆம் ஆண்டில் மிகவும் செயல்பாட்டில் உள்ள ஆரம்ப-நிலை முதலீட்டாளர்களாக இருந்தன.