ஜூன் மாதத்தில் 10 நாட்கள் வங்கி விடுமுறை.. ஊழியர்களுக்கு குஷி!

சென்னை: ரிசர்வ் வங்கியின் (RBI) விடுமுறைப் பட்டியலின்படி, ஜூன் 2024-இல், இந்தியா முழுவதும் உள்ள வங்கிகள் மொத்தம் 10 விடுமுறை நாட்களைக் கொண்டுள்ளது. இந்த விடுமுறைகளில் மாநில வாரியான விடுமுறைகள், இரண்டாவது மற்றும் நான்காவது சனிக்கிழமைகள் மற்றும் அனைத்து ஞாயிற்றுக்கிழமைகளும் அடங்கும். இந்த ஜூன் மாதம் 5 ஞாயிற்றுக்கிழமைகளைக் கொண்டிருப்பது குறிப்பிடத்தக்கது. இதனால் இந்த மாதத்தில் அதிக அளவிலான வங்கி விடுமுறைகள் இருக்கும் என எதிர்பார்க்கப்படுகிறது.

எந்தெந்த தேதிகளில் வங்கிகளுக்கு விடுமுறை என்று தெரிந்து வைத்துக் கொள்வது அவசியமான ஒன்று. அப்பொழுது தான் தெரியாமல் விடுமுறை நாட்களில் வங்கிக்கு செல்வதைத் தவிர்க்க முடியும். நம்மில் பலர் இந்தத் தவறை, இதற்கு முன்பு பலமுறை செய்திருப்போம். அன்று விடுமுறை என்பது தெரியாமல் வங்கிக்கு சென்று நீண்ட நேரம் ஆன பின்பு விடுமுறை என்று தெரிந்து கொண்டு வீட்டிற்கு வந்த கதைகள் பல இருக்கும். எனவே, ஒவ்வொரு மாதமும் வங்கி விடுமுறைகள் மற்றும் பொது விடுமுறைகளைப் பற்றி தெரிந்து வைத்திருப்பது முக்கியமே. வரும் ஜூன் மாதத்திற்கான வங்கி விடுமுறை நாட்கள் கீழே கொடுக்கப்பட்டுள்ளன.

மாநில வாரியான விடுமுறைகள்:

ஜூன் 15, 2024: மிசோரம் மாநிலத்தில் குறிப்பிடத்தக்க கலாச்சார கொண்டாட்டமான YMA தினத்தை முன்னிட்டு வங்கிகளுக்கு அன்று விடுமுறை. அதேபோல ஒடிசாவில் பருவமழையின் தொடக்கத்தைக் குறிக்கும் முக்கியமான விவசாயத் திருவிழாவான ராஜ சங்கராந்திக்கு வங்கிகள் மூடப்படும்.

ஜூன் 17, 2024: பக்ரித் என்று சொல்லப்படும் இஸ்லாமிய பண்டிகைக்காக மிசோரம், சிக்கிம் மற்றும் அருணாச்சல பிரதேசம் ஆகிய மாநிலங்களைத் தவிர இந்தியா முழுவதும் உள்ள வங்கிகள் மூடப்படும்.

ஜூன் 18, 2024: ஜம்மு மற்றும் ஸ்ரீநகரில் பக்ரித் பண்டிகை கொண்டாட வங்கிகள் மூடப்படும்.

வார இறுதி வங்கி விடுமுறை நாட்கள்

ஜூன் 8: மாதத்தின் இரண்டாவது சனிக்கிழமை, அனைத்து வங்கிகளும் மூடப்படும்.
ஜூன் 9: ஞாயிற்றுக் கிழமை, வங்கிகளுக்கு வழக்கமான வார விடுமுறை.
ஜூன் 22: நான்காவது சனிக்கிழமை, அனைத்து வங்கிகளுக்கும் விடுமுறை.
ஜூன் 23: ஞாயிற்றுக் கிழமை வங்கிகளுக்கு வழக்கமான வார விடுமுறை.
ஜூன் 30: ஞாயிற்றுக் கிழமை வங்கிகளுக்கு வழக்கமான வார விடுமுறை.

வங்கிச் சேவைகளில் ஜூன் 2024ஆம் மாதத்திற்கான தாக்கம்: மேலே குறிப்பிட்டுள்ள, இந்த தேதிகளில் வங்கிகளின் கிளைகள் மூடப்படும். அதே வேளையில், வாடிக்கையாளர்கள் ஆன்லைன் தளங்கள் மூலம் பலவிதமான வங்கிச் சேவைகளை தொடர்ந்து பெறலாம். ATM-கள், மொபைல் ஆப்-கள் மற்றும் வங்கி இணையதளங்கள் உள்ளிட்ட ஆன்லைன் வங்கிச் சேவைகள் 24/7 கிடைக்கும். விடுமுறை நாட்களில் தங்கள் வங்கித் தேவைகளுக்காக இந்த டிஜிட்டல் சேனல்களைப் பயன்படுத்த வாடிக்கையாளர்களுக்கு பரிந்துரைக்கப்படுகிறது.

வங்கி வருகைக்கான திட்டமிடல்: ஆன்லைனில் செய்ய முடியாத சேவைகளுக்காக வங்கிக் கிளைகளுக்குச் செல்ல வேண்டிய வாடிக்கையாளர்கள் இந்த விடுமுறை நாட்களில் இல்லாத வகையில் தங்கள் வருகைகளைத் திட்டமிட வேண்டும். மாநில வாரியான விடுமுறைகள் மாறுபடும் என்பதால் அவற்றைக் கருத்தில் கொண்டு முடிவெடுக்க வேண்டும்.