இந்தியா மீது டிரம்ப் போட்ட வரி.. உடனே பிளானை மாற்றிய ஆப்பிள்.. கூடுதலாக 100 பில்லியன் டாலர் முதலீடு!

மொபைல் மற்றும் டெக் சாதனத் தயாரிப்பில் முன்னணியில் உள்ள ஆப்பிள் நிறுவனம், அடுத்த 4 ஆண்டுகளில் அமெரிக்காவில் கூடுதலாக 100 பில்லியன் அமெரிக்க டாலர் மதிப்பில் முதலீடு செய்ய இருப்பதாக அறிவித்துள்ளது. இந்த முதலீடு மூலம், அமெரிக்காவில் உள்ள உற்பத்தி அமைப்புகள் அதிகரிக்கப்படவுள்ளன. இதனால், வேலைவாய்ப்புகளும் புதிதாக உருவாக உள்ளன.

இந்த முடிவு, ஆப்பிள் தனது ஐபோன் உற்பத்தியை இந்தியாவுக்கு மாற்றியதை அடுத்து அதிபர் டொனால்ட் டிரம்ப் மற்றும் ஆப்பிள் நிறுவனத்துக்கு இடையே ஏற்பட்ட பிரச்சனையை தொடர்ந்து எடுக்கப்பட்டுள்ளது.

இதுகுறித்து பேசியுள்ள வெள்ளை மாளிகையின் செய்தித்தொடர்பாளர் டெய்லர் ரொஜர்ஸ், "ஆப்பிள் நிறுவனத்தின் இந்த அறிவிப்பு அமெரிக்க உற்பத்தி துறைக்கு மேலும் ஒரு வெற்றி. இது, முக்கியமான உற்பத்தி கூறுகளை மீண்டும் அமெரிக்காவிலேயே உருவாக்கும் முயற்சிக்கு ஆதரவு அளிக்கிறது. இதன் மூலம், அமெரிக்காவின் பொருளாதார மற்றும் தேசிய பாதுகாப்பு வலுப்பெறும்" என்று தெரிவித்துள்ளார்.

ஆப்பிள் நிறுவனத்தின் இந்த அறிவிப்பு மூலம் அமெரிக்காவில் ஆப்பிள் நிறுவனம் செய்யும் மொத்த முதலீட்டின் அளவு 600 பில்லியன் டாலராக உயர்கிறது. இதற்கு முன், 500 பில்லியன் டாலர் முதலீடு செய்யும் திட்டம் இருந்தது. இந்த அறிவிப்பு, டிரம்பின் விமர்சனங்களுக்குப் பிறகு வெளியாகியுள்ளது. இந்த ஆண்டின் தொடக்கத்தில் ஆப்பிள் நிறுவனம், இந்தியாவில் ஐபோன் உற்பத்தியை அதிகரிக்க முடிவு செய்தது.

இதுபற்றி பேசியிருந்த டிரம்ப், "இது ஒரு சிறிய பிரச்சனை. நாங்கள் உற்பத்தியை இந்தியாவுக்கு மாற்ற விரும்பவில்லை" என்றார். "நான் டிம் குக்கிடம் (Apple CEO) நேரில் கூறினேன். இந்தியாவில் உற்பத்தி செய்ய வேண்டும். நீங்கள் அமெரிக்காவில் தான் செய்ய வேண்டும்" என்று டிரம்ப் கூறியிருந்தார்.

அமெரிக்கா - இந்தியா இடையே வர்த்தக பதற்றம் இருந்து வரும் நிலையில், இந்தியாவில் இருந்து இறக்குமதி செய்யப்படும் பொருட்கள் மீது 25% வரியை டொனால்ட் டிரம்ப் விதித்துள்ளார். இது, இந்தியா ரஷியாவிடமிருந்து தொடர்ந்து எண்ணெய் இறக்குமதி செய்கிறது என்பதற்கான எதிர்வினையாக அமைகிறது.

இந்த புதிய வரி 21 நாட்களுக்குள் நடைமுறைக்கு வரும் என்று எதிர்பார்க்கப்படுகிறது. இதன் விளைவாக, இந்தியாவில் இருந்து அமெரிக்காவுக்கு செல்லும் பொருட்களுக்கு மொத்த வரி 50% வரை உயர வாய்ப்பு உள்ளது. இதே நாளில், ஆப்பிள் நிறுவனம் உள்நாட்டு உற்பத்தியில் அதிக கவனம் செலுத்தத் தொடங்கியுள்ளது. நிறுவனம் முற்றிலும் மௌனமாக இருந்தாலும், அதன் CEO டிம் குக் அண்மையில், "நாங்கள் அமெரிக்காவில் அதிகமாக செயல்பட ஆரம்பித்துள்ளோம். தற்போது ஏற்கனவே சுமார் 19 பில்லியன் சிப்கள் இங்கிருந்து தயாராகின்றன. இனியும் கூடுதலாக தயாரிக்கப்படும்" என்று தெரிவித்துள்ளார்.

ஆப்பிள் நிறுவனம், அமெரிக்காவில் மட்டுமே செயல்படும் MP Materials என்ற நிறுவனத்துடன் 500 மில்லியன் டாலர் ஒப்பந்தம் செய்துள்ளது. இந்த ஒப்பந்தத்தின் மூலம், டெக்சாஸில் உள்ள ஆப்பிள் தொழிற்சாலை விரிவாக்கம் செய்யப்படும். அங்கு, ஐபோன்களில் பயன்படுத்தப்படும் மறுசுழற்சி செய்யப்பட்ட மெக்னெட்டுகள் தயாரிக்கப்பட உள்ளன.

ஆப்பிள் நிறுவனத்தின் 500 மில்லியன் டாலர் அறிவிப்புக்குப் பின், ஆப்பிளின் பங்கு விலை புதன்கிழமை 6% வரை உயர்ந்தது. இருப்பினும், இந்த ஆண்டு இதுவரை ஆப்பிள் நிறுவனத்தின் பங்கு விலை 14% குறைந்துள்ளது. இதற்கு முக்கிய காரணம் ஏஐ தொழில்நுட்பத்தில் ஆப்பிள் நிறுவனம் மெதுவாகவே முன்னேறியிருப்பது தான்.