வீட்டு உபயோகத்திற்கான மானிய விலையில் சிலிண்டர்கள், ஆண்டிற்கு 6 மட்டுமே வழங்கப்படும் என்று மத்திய அரசு அறிவித்தது. இதையடுத்து ஏழை, எளிய மற்றும் நடுத்தர குடும்பங்கள் பாதிப்பு அடையும் நிலை ஏற்பட்டது. இதையடுத்து மத்திய அரசின் அறிவிப்பை எதிர்த்து ஆங்காங்கே போராட்டங்கள் நடைபெற்று வருகிறது.

இந்த நிலையில் மானிய விலை சிலிண்டர்களுக்கு விதிக்கப்பட்ட கட்டுப்பாட்டை எதிர்த்து, வரும் 1ம் தேதி முதல் நாடு தழுவிய வேலை நிறுத்தத்தில் ஈடுபட போவதாக சமையல் எரிவாயு விநியோகஸ்தர்கள் சங்கம் தெரிவித்துள்ளது.

இது குறித்து தேசிய சமையல் எரிவாயு விநியோகஸ்தர்கள் சங்கத்தின் பொது செயலாளர் பவன் சோனி கூறியதாவது,

கியாஸ் சிலிண்டர்கள் மானியம் குறித்த மத்திய அரசின் அறிவிப்பின் மூலம் நுகர்வோரும், விநியோகஸ்தர்களும் பாதிக்கப்படுவார்கள். எங்களுடன் எந்தவித பேச்சுவார்த்தையும் நடத்தாமல், மத்திய அரசு இது போன்ற தவறான முடிவு எடுத்துள்ளது. இதன்மூலம் கள்ள சந்தையில் சிலிண்டர்கள் விற்பனை அதிகரிக்க வாய்ப்புள்ளது. மேலும் முறைகேடான வர்த்தகத்திற்கு இந்த அறிவிப்பு வழிவகுக்கும்.

நாடு முழுவதும் 2 லட்சத்திற்கும் மேற்பட்ட டெலிவரி ஆட்கள் உள்ளனர். ஒரு சிலிண்டரில் இருந்து அரசிற்கு ரூ.8 வருமானம் மட்டுமே கிடைக்கிறது என்றார்.

ஆனால் இது குறித்த இறுதி முடிவை எடுக்க தேசிய சமையல் எரிவாயு விநியோகஸ்தர்கள் சங்கத்தின் ஆலோசனை கூட்டம் நாளை நடைபெற உள்ளது. இதில் நாடு முழுவதும் உள்ள சுமார் 1,200 விநியோகஸ்தர்கள் கலந்து கொள்வார்கள் என்று எதிர்பார்க்கப்படுகிறது.