அமெரிக்க மத்திய வங்கியின் முடிவுகள்

அமெரிக்க மத்திய வங்கி (Federal bank) தனது கடன் பத்திரக் கொள்முதல் குறைப்புத் திட்டத்தைப் பற்றிய செய்தியோ அல்லது பேச்சு வெளிவரும்போது எல்லாம் உலகளவில், வளரும் நாடுகளின் நாணயச் சந்தைகள் தள்ளாட்டம் கண்டன. அவ்வாறு ஒரு நடவடிக்கை எடுக்கப்படுமெனில் உலகமெங்கும் பணப்புழக்க குறைபாடு ஏற்படும். ஏற்கனவே இந்தியா, இந்தோனேசியா, தென் ஆப்ரிக்கா போன்ற நாடுகளின் நாணய மதிப்பு வீழ்ந்து கிடக்கின்றன. செப்டம்பர் 19ஆம் தேதி அமெரிக்க மத்திய வங்கி எடுக்கும் கடன் பத்திரக் கொள்முதல் குறைப்புத் திட்டத்தின், எந்த ஒரு சிறு நடவடிக்கையும் உலகளாவிய சந்தைகளை கடுமையாக பாதிக்கும் என்பதில் எந்தவித ஐயமும் இல்லை.

வீழ்ந்துவரும் இந்திய பொருளாதாரம்

பணவீக்கம், மொத்த உள்நாட்டு உற்பத்தி, நடப்பு கணக்கு பற்றாக்குறை, ரூபாய் மதிப்பு என சகல திசைகளிலும் இந்தியாவிற்கு கடுமையான சாட்டையடி விழுந்து கொண்டிருக்கிறது. இந்தியப் பொருளாதாரத்தின் அடிப்படைகள் பலவீனமான நோயாளியைப் போன்றுள்ளது. சமிபத்தில் வெளியிடப்பட சேவைத்துறையின் (Service sector) செயல்பாட்டு புள்ளிவிவரங்கள் அத்துறை நான்கு ஆண்டுகளாக காணாத வீழ்ச்சியை இந்த ஆண்டு கண்டுள்ளது என தெரிவிக்கிறது. பணவீக்கமும் விலைவாசியும் விண்ணை முட்டும் அளவிற்கு உள்ளன. மொத்த உள்நாட்டு உற்பத்தியும் சுருங்கி வருகிறது.

சிரியாவை சூழும் போர்மேகம் ஆபத்தானது

சிரியா மீது அமெரிக்காவும் அதன் நட்பு நாடுகளும் உறுதியாக இராணுவத் தாக்குதலை மேற்கொள்ளும் என்று தெரிகிறது. நீண்ட நாட்களுக்கு தாக்குதல் நீடித்தால் கச்சா எண்ணெய் விலை உச்சத்தை தொடும். கச்சா எண்ணெய் விலை உயர்ந்தால் நடப்பு கணக்கு பற்றாக்குறை அதிகரிக்கும். ஆகமொத்தம் இது சந்தைக்கு நல்லதல்ல.

கவலை தரும் புறக்காரணிகள்

உயர்ந்து வரும் கச்சா எண்ணெய் விலையின் காரணமாக அதிகமான அன்னிய செலாவாணியை நாம் செலவழிக்க வேண்டியிருக்கும். அது ரூபாயின் மீதான சுமையை அதிகரிக்கும். அத்துடன் அமெரிக்க மத்திய வங்கியின் கடன் பத்திரக் கொள்முதல் குறைப்புத் திட்டமும் சேர்ந்துகொள்ளும் போது, நிலைமை நம் கட்டுப்பாட்டில் இல்லை எனவே தோன்றுகிறது.

இக்கரைக்கு அக்கரை பச்சை

அமெரிக்காவில் அதிகரித்து வரும் கடன் பத்திர வட்டி விகிதம் கிட்டத்தட்ட மூன்று சதவிதத்தை தொடும் நிலையில் உள்ளது. இச்செய்தி இந்தியச் சந்தையின் காதில் இரும்பை காய்ச்சி ஊற்றுவதைப் போன்று உள்ளது. அவ்வாறு வட்டி விகிதங்கள் உயரும் பட்சத்தில் இந்தியா போன்ற வளரும் நாடுகளின் சந்தைகளில் இருந்து முதலீடுகள் அமெரிக்காவை நோக்கி செல்லும்.