டாடா ஸ்டீல் நிறுவனத்தின் மொத்த லாபம் 68% சரிவு!!

மும்பை: நாட்டின் முன்னணி ஸ்டீல் உற்பத்தி நிறுவனமான டாடா ஸ்டீல் நிறுவனம் நடப்பு நிதியாண்டில் டிசம்பர் மாதத்துடன் முடிவடைந்த 3வது காலாண்டில் இந்நிறுவனத்தின் மொத்த லாபம் 68 சதவீதம் சரிந்து 157 கோடியாக உள்ளது.

இந்நிறுவனத்தின் வளர்ச்சி உருக்கு பொருட்களில் விலை சரிவு, சீன உற்பத்தி மற்றும் ஏற்றுமதியின் அதிகாரிப்பு மற்றும் உள்நாட்டு தேவையில் குறைவு ஆகியவற்றின் காரணமாக கடுமையாக பாதித்தது.

மேலும் இக்காலகட்டத்தில் இந்நிறுவனத்தின் மொத்த விற்றுமுதல் 8 சதவீதம் அதிகரித்து 33,633 கோடி ரூபாயாக உள்ளது.

இந்தியாவில் இந்நிறுவனத்தின் விநியோகம் 2.13 மில்லியன் டன்னாக உயர்ந்தாலும், மொத்த வருவாய் அளவில் 881 கோடி ரூபாய் நஷ்டத்தை அடைந்தது.

மேலும் ஐரோப்பிய சந்தையில் இந்நிறுவனத்தின் வர்த்தகம் மற்றும் நிறுவனத்தின் மறுசீரமைப்பு நடவடிக்கைகள் இந்நிறுவனத்தின் லாப அளவிற்கு அதிகளவில் கைகொடுத்தது என இந்நிறுவனத்தின் நிர்வாக இயக்குனரான கெளசிக் சட்டர்ஜி தெரிவித்தார். பங்குச்சந்தையில் இந்நிறுவனத்தின் பங்குகள் 2.67 சதவீதம் சரிந்து 396.30 ரூபாயாக வர்த்தகம் செய்யப்படுகிறது.