காப்பீடு மற்றும் சேமிப்பு

எண்டோவ்மென்ட் பாலிசி என்பது காலவரை ஈட்டுறுதி திட்டம் அல்லது கொடை காப்பீட்டுத் திட்டம் எனவும் அழைக்கப்படுகிறது. இத்திட்டம் ஆயுள் காப்பீடு மற்றும் சேமிப்பு என இரட்டை ஆதாயங்களைக் கொண்டதாகும்.

முதிர்வுத் தொகை

இத்திட்டத்தில் பாலிசிதாரர் ஒருவர் செலுத்தும் மாதாந்திர தொகை குறிப்பிட்ட காலங்கள் முடிந்தபின் அவர் செலுத்திய தொகை மற்றும் நிறுவனத்தால் வழங்கப்படும் போனஸ் இரண்டும் சேர்த்து முதிர்வுத் தொகையாக வழங்கப்படுவதாகும்.

பாலிசிதாரர் இறப்பு

பாலிசிதாரர் திடீரென இறக்க நேரிட்டால் நிறுவனம் வழங்குவதாக ஒப்புக்கொண்ட முதிர்வுத் தொகை அவரின் வாரிசுதாரர்களுக்கு வழங்கப்படும். அல்லது பாலிசி இடையில் முடித்துக் கொள்ளப்பட்டால் அதுவரை பாலிசிதாரர் செலுத்திய தொகை மற்றும் வட்டி ஆகியவை சேர்த்து நிர்வாகச் செலவினம் கழித்துக் கொள்ளப்பட்டு மீதமுள்ள தொகை பாலிசிதாரருக்கு காசோலையாகவோ அல்லது அவரது வங்கிக் கணக்கிலோ சேர்க்கப்படும்.

கல்வி முதல் வீடு வரை

எண்டோவ்மென்ட் பாலிசியானது பிள்ளைகளின் கல்வி, திருமணம், புதிய வீடு வாங்குதல் அல்லது கட்டுதல் ஆகியவற்றுக்கான திடங்களையும் உள்ளடக்கியதாகும். பாலிசிதாரர் திடீரென இறக்கும் நிகழ்வுகளில் அவரது குடும்பம் சந்திக்கக்கூடிய பொருளாதாரப் பிரச்சினைகளிலிருந்து விடுதலை அளிக்கக்கூடிய அருமருந்து இந்தக் காப்பீட்டுப் பாலிசிகள். சில நேரங்களில் பாலிசிதாரர் எதிர்பாராத விபத்துகளில் சிக்கி காயமடையும் நிகழ்வுகளில் பாதிப்புகளின் தன்மைக்கேற்ப சேமிப்பு மற்றும் காப்பீட்டுத் தொகை அவருக்கு வழங்கப்பட்டு அவருக்கு ஆறுதலும் இடைக்கால நிவாரணமும் அளிக்கப்படும்.

லாபம் மற்றும் லாபம் இல்லா வகை

எண்டோவ்மென்ட் பாலிசிகள் லாபத்துடன் கூடியவை மற்றும் லாபமில்லாதவை என இரு வகைப்படும். இவை மேலும் முழு ஆயுள் காப்பீடு, ஓய்வூதியம், பிள்ளைகளின் கல்வி எனப் பல உட்பிரிவுகளைக் கொண்டதாக விரிகிறது. ஒரு தனிப்பட்ட நபரின் விருப்பம், மாத வருமானம், தேவைகள், அப்போதைய வாழ்க்கை நிலை, ஆபத்துக்களை எதிர்கொள்ளும் நிலை ஆகியவற்றைப் பொறுத்துப் பாலிசிகள் பல்வேறு வகையாக உள்ளன. மேலும், மாதாந்திர பிரீமியம் மற்றும் பல்வேறு நிறுவனங்கள் வழங்கும் பல்வேறு அளவிலான போனஸ் ஆகியவற்றின் அடிப்படையிலும் பாலிசிகள் நுகர்வோரால் கொள்முதல் செய்யப்படுகின்றன.