மாருதி சுசூகி

இந்தியாவின் மிகப் பெரிய கார் தயாரிப்பு நிறுவனமான மாருதி சுசூகி பிப்ரவரி மாதம் 1,49,824 கார்களை விற்றுள்ளது. இது 2017-ம் ஆண்டுப் பிப்ரவரி மாதம் விற்பனை செய்யப்பட்ட 1,30,280 கார்களுடன் ஒப்பிடும் போது 15 சதவீத உயர்வாகும். இந்தியாவில் மட்டும் 1,37,900 கார்களை மாருதி நிறுவனம் விற்பனை செய்துள்ளது. இதுவே சென்ற ஆண்டு இந்தியாவில் 1,20,599 கார்களை விற்பனை செய்து இருந்தது.

மகேந்திரா & மகேந்திரா

மகேந்திரா நிறுவனம் 2017 பிப்ரவரி மாதத்துடன் ஒப்பிடும் போது 19 சதவீதம் விற்பனை உயர்வைச் சந்தித்துள்ளது. 2017-ம் ஆண்டு 42,826 கார் விற்பனை செய்த நிலையில் 2018-ம் ஆண்டுப் பிப்ரவரி மாதம் 51,127 கார்களை மகேந்திரா விற்பனை செய்துள்ளது.

டாடா மோட்டார்ஸ்

டாடா மோட்டார்ஸ் நிறுவனம் அதிகபட்சமாக 38 சதவீத விற்பனை உயர்வை பிப்ரவரி மாதம் பெற்றுள்ளது. 2017 பிப்ரவரி மாதம் 42,679 கார்கள் விற்பனை செய்த டாடா மோட்டார்ஸ் நடப்பு ஆண்டில் பிப்ரவரி மாதம் 58,993 கார்களை விற்பனை செய்துள்ளது. யூவி கார் பிரிவு விற்பனையில் மட்டும் 165 சதவீதம் வரை விற்பனை அதிகரித்துள்ளதாக டாடா மோட்டார்ஸ் தெரிவித்துள்ளது.

டொயாட்டா இந்தியா

டொயாட்டா கிர்லோஸ்கர் மோட்டார் நிறுவனம் பிப்ரவரி மாதம் 12,705 கார்களை விற்பனை செய்துள்ளதாகவும் இதுவே சென்ற ஆண்டுப் பிப்ரவரியில் 12,113 கார்கள் விற்பனை செய்து இருந்ததும் குறிப்பிடத்தக்கது. டொயாட்டா இந்தியாவின் விற்பனை 4.88 சதவீதமாகப் பிப்ரவரி மாதம் அதிகரித்துள்ளது.

ஃபோர்டு இந்தியா

போர்டு இந்தியா நிறுவனத்திற்கு 2017 பிப்ரவரி மாதத்துடன் ஒப்பிடும் போது 2018-ம் ஆண்டு 1 சதவீதம் வரை விற்பனை சரிந்துள்ளது. சென்ற ஆண்டு 24,026 கார்களை விற்பனை செய்து ஃபோர்டு இந்தியா 2018 பிப்ரவரி மாதம் 23,965 கார்களை மட்டுமே விற்பனை செய்துள்ளது. உள்நாட்டு விற்பனை 8 சதவீதம் அதிகம் தான் என்றாலும் வெளிநாட்டிற்கு ஏற்றுமதி செய்ததில் தான் ஃபோர்டு நிறுவனம் சரிவை சந்தித்துள்ளது