ஆக்சிஸ் வங்கி

இவ்வங்கியின் நிர்வாக இயக்குனர் மற்றும் தலைமை நிர்வாக அதிகாரியாகக் கடந்த 2009ஆம் ஆண்டு முதல் இருக்கும் ஷிக்கா சர்மா-வின் 4வது 3 ஆண்டுக் காலப் பணிக்கு ஆக்சிஸ் வங்கி நிர்வாகத்தால் ஒப்புதல் அளிக்கப்பட்ட நிலையில், ரிசர்வ் வங்கி ஷிக்காவின் பதவிக்காலத்தைப் பரிசீலனை செய்ய உத்தரவிட்டது.

4வது 3 ஆண்டுக் காலப் பணி

ஷிக்கா சர்மாவின் 4வது 3 ஆண்டுக் காலப் பணி வருகிற ஜூலை 2018 முதல் துவங்க உள்ள நிலையில், ஆக்சிஸ் வங்கியின் உயர்மட்ட நிர்வாகக் குழு ரிசர்வ் வங்கியின் உத்தரவை பரிசீலனை செய்யத் துவங்கியது.

முக்கிய அறிவிப்பு

ஆர்பிஐ உத்தரவை ஏற்ற ஆக்சிஸ் வங்கி நிர்வாகம் 3 ஆண்டுக் காலப் பணியை வெறும் 6 மாதமாகக் குறைந்து, ஜூன் 1, 2018 முதல் டிசம்பர் 31, 2018 வரையில் மட்டும் ஷிக்கா சர்மா ஆக்சிஸ் வங்கியின் நிர்வாக இயக்குனர் மற்றும் சிஇஓவாக இருப்பார் என ஆக்சிஸ் வங்கி தெரிவித்துள்ளது.

காரணம்

ஷிக்கா சர்மா வெளியேற்றப்பட்டதற்கான காரணம் முழுமையாகத் தெரியாத நிலையில், ரிசர்வ் வங்கியின் உத்தரவிற்காகவே ஆக்சிஸ் வங்கி இந்த முடிவை எடுத்துள்ளதாகத் தகவல் வெளியாகியுள்ளது.

5 கோடி அபராதம்

2016ஆம் நிதியாண்டில் Income Recognition and Asset Classification (IRAC) பிரிவின் தலைவர்கள் விதிமுறைகளைச் சரியாகப் பின்பற்றாத காரணத்திற்காக ரிசர்வ் வங்கி ஆக்சிஸ் வங்கி மீது 5 கோடி ரூபாய் அபராதத்தைக் கடந்த மாதம் விதித்தது.

வராக்கடன்

இந்தியாவில் இருக்கும் பல வங்கிகள் வராக்கடன் அளவுகளைச் சரியான முறையில் காட்டாமல் இருக்கிறது, இதில் ஆக்சிஸ் வங்கியும் அடக்கம். சமீபத்தில் ஆக்சிஸ் வங்கியின் வராக்கடன் அளவுகளை ரிசர்வ் வங்கி ஆய்வு செய்தபோது, ஆக்சிஸ் வங்கி 2016ஆம் நிதியாண்டுக்கான மொத்த வராக்கடன் அளவைக் காட்டியதை விடவும் சுமார் 152 சதவீதம் அதிகமாக இருந்துள்ளது.