சர்வதேச கச்சா எண்ணெய் சந்தையில் உற்பத்தி அதிகரித்துள்ள நிலையில் தற்போது தேவைக்கும் அதிகமான அளவில் கச்சா எண்ணெய் உள்ள காரணத்தால் கடந்த சில நாட்களாக அதன் விலை தொடர்ந்து குறைந்து வருகிறது.
இதன் எதிரொலியாக இன்று பிரென்ட் கச்சா எண்ணெய் விலை 70 டாலர் வரையில் குறைந்துள்ளது, இது இந்தியா போன்ற கச்சா எண்ணெய் அதிகம் இறக்குமதி செய்யும் நாடுகளுக்கு மகிழ்ச்சியான செய்தியாக அமைந்துள்ளது. ஆனால் இத்துறை முதலீட்டாளர்களுக்கு இது மகிழ்ச்சி அளிக்கவில்லை என்பதையும் நாம் கவனிக்க வேண்டும்.
கச்சா எண்ணெய் உற்பத்தி
ஏப்ரல் மாதம் முதல் தொடர்ந்து உயர்ந்து வந்த கச்சா எண்ணெய் விலை அக்டோபர் மாதத்தில் அதன் உச்ச விலையை அடைந்தது.
இந்நிலையில் தற்போது கச்சா எண்ணெய் உற்பத்தி அதிகரித்துள்ள நிலையில் தற்போது 18 சதவீதம் வரையில் விலை குறைந்து ஒரு பேரல் பிரென்ட் கச்சா எண்ணெய் 70 டாலருக்கு விற்பனை செய்யப்படுகிறது.
69.70 டாலர்
இன்று கச்சா எண்ணெய் சந்தை வர்த்தகத்தில் பிரென்ட் கச்சா எண்ணெய் 95 சென்டுகள் குறைந்து 69.70 டாலருக்கு விற்பனை செய்யப்பட்டது.
அமெரிக்கா
இந்தத் திடீர் சரிவிற்கு முக்கியக் காரணமாக அமெரிக்கக் கச்சா எண்ணெய் சந்தை விளங்குகிறது. அமெரிக்கா லைட் க்ரூட் 8 மாத சரிவில் ஒரு பேரல் கச்சா எண்ணெய் விலை 60 டாலராகக் குறைந்துள்ளது. இது அக்டோபர் மாத உயர்வை ஒப்பிடுகையில் 20 சதவீதம் சரிவாகும். இதன் மூலம் அமெரிக்கா கச்சா எண்ணெய் சந்தை தற்போது மோசமான நிலையை அடைந்துள்ளது.
விலை சரிவு
இந்த விலை சரிவு பலனை அப்படியே இந்திய எண்ணெய் நிறுவனங்கள் இந்திய மக்களுக்குக் கொடுத்தால் லிட்டருக்கு 1.50 ரூபாய் முதல் 2 ரூபாய் வரையில் பெட்ரோல் டீசல் விலை சரியும்.