தமிழகத்தின் கடன் தொகை 3.27 லட்சம் கோடி ரூபாய் (மார்ச் 2016 கணக்குப்படி)என கணக்குகள் வெளியாகி இருக்கின்றன. இதற்கே பரபரப்பானால் எப்படி, உண்மையாக தமிழகத்தின் கடன் தொகை மார்ச் 2018 கணக்குப்படி எவ்வளவு தெரியுமா..? 4.19 லட்சம் கோடி. இதை ஆர்பிஐ, தமிழகத்தின் பட்ஜெட் தரவுகளில் சொல்லப்பட்ட கணக்குகளைக் கொண்டு தொகுத்திருக்கிறது.

ஆனால் 2018 - 19 நிதியாண்டில் கடன் தொகை வெறும் 3.54 லட்சம் கோடி ரூபாய்க்குள் அடக்கிவிட்டதாகவும், எதிர் வரும் 2019 - 20 நிதியாண்டில் கூடுதலாக 43,000 கோடி ரூபாய் கடன் வாங்க இருப்பதால் 3.97 லட்சம் கோடி ரூபாயாக உயரும் எனவும் கணக்குச் சொல்லி இருகிறார் ஓபிஎஸ்.

மார்ச் 2018 கணக்குப்படி 4.29 லட்சம் கோடி ரூபாய் கடன்வாங்கி யோகி ஆதித்யநாத்தின் உத்திரப் பிரதேசம் முதலிடத்தில் இருக்கிறது. அம்மா வழியில் ஆட்சியை நடத்தும் ஈபிஎஸ், ஓபிஎஸ் அணியினர் ஆளும் தமிழகம் 4.19 லட்சம் கோடி கடன் வாங்கி இரண்டாவது இடத்தில் இருக்கிறது.

2015 - 16 நிதிஆண்டில் 6.30 லட்சம் கோடி கடனோடு முதலிடத்தில் இருந்த ராஜஸ்தான் மாநிலம் தற்போது 2.47 லட்சம் கோடியுடன் பின் தங்கி இருக்கிறது. ஆனால் அதே 2015 - 16 நிதி ஆண்டில் 3.27 லட்சம் கோடி ரூபாய் கடன் வைத்திருந்த தமிழகம் 4.19 லட்சம் கோடி கடன் வாங்கி முன்னேறி இருக்கிறது.