சென்னை: பெட்ரோல், டீசல் விலையில் தொடர்ந்து மாற்றம் இல்லை. லோக்சபா தேர்தல் காலம் இது என்பதால் விலையில் கை வைக்காமல் உள்ளன எண்ணெய் நிறுவனங்கள்.

எண்ணெய் நிறுவனங்கள் முன்பெல்லாம் மாதம் இருமுறை விலையை நிர்ணயம் செய்து வந்தன. ஆனால் கடந்த சில ஆண்டுகளுக்கு முறை இம்முறை கைவிடப்பட்டது. தற்போது நாள்தோறும் டீசல், பெட்ரோல் விலை நிர்ணயிக்கும் முறை அமலுக்கு வந்தது. எரிபொருட்களின் விலை மாற்றத்தை பொருத்து இங்கு பெட்ரோல் டீசல் விலை நிர்ணயம் செய்யப்படுகிறது.

இந்த நிலையில் கடந்த 10 நாட்களாக பெரிய அளவில் மாற்றமே இல்லாமல் இருக்கிறது. டீசல் விலையிலும், பெட்ரோல் விலையிலும் பெரிய மாற்றங்கள் இல்லை. காரணம், லோக்சபா தேர்தல். நாடு முழுவதும் தேர்தல் ஜூரம் பற்றிக் கொண்டுள்ளது. மக்கள் மத்திய அரசின் பல்வேறு கொள்கைகளால் குறிப்பாக ஜிஎஸ்டி போன்றவற்றால் கடும் அதிருப்தியில் உள்ளதாக கூறப்படுகிறது.

வேலையில்லாத் திண்டாட்டமும் முன்னெப்போதும் இல்லாத வகையில் தலை விரித்தாடுவதாக புள்ளிவிவரங்கள் தெரிவிக்கின்றன. விலைவாசி உயர்வு மறுபக்கம். இப்படி பல்வேறு எதிர் பிரச்சினைகள் அதிகமாக இருப்பதால் பெட்ரோல், டீசல் விலையை உயர்த்தாமல் அடக்கி வாசிப்பதாக கருதப்படுகிறது.

சென்னையில் நேற்றைய விலையில் மாற்றமின்றி பெட்ரோல் லிட்டருக்கு ரூ.75.67 ஆகவும், டீசல் விலை ரூ.70.26 ஆகவும் இன்று விற்பனை செய்யப்படுகிறது. மார்ச் 17ம் தேதி டீசல் விலை லிட்டருக்கு ரூ. 70.87 ஆக இருந்தது. பெட்ரோல் விலை 17ம் தேதி 75.52 ஆக இருந்தது.