டெல்லி: இந்தியாவின் மிகப் பெரிய லைஃப் இன்ஷூரன்ஸ் நிறுவனமான லைஃப் இன்ஷூரன்ஸ் கார்ப்பரேஷன் நிறுவனத்தின் துணை நிறுவனமான LIC Housing நிறுவனம் வீட்டுக் கடன் கொடுக்கும் தொழிலில் இருக்கிறது. அந்த நிறுவனத்தின் மார்ச் 2019 காலாண்டு முடிவுகள் வெளியாகி இருக்கின்றன.
LIC Housing நிறுவனத்தின் மார்ச் 2019 காலாண்டில் 694 கோடி ரூபாயை நிகர லாபமாக ஈட்டி இருக்கிறது. கடந்த மார்ச் 2018-ல் LIC Housing நிறுவனம் 594 கோடி ரூபாய் ஈட்டி இருந்தது.
மார்ச் 2018 நிகர லாபத்தை மார்ச் 2019 நிகர லாபத்துடன் ஒப்பிடும் போது, மார்ச் 2019-ல் சுமார் 17 சதவிகிதம் நிகர லாபம் அதிகரித்திருக்கிறது.
வட்டி வருமானம்
நிகர வட்டி வருமானம் கடந்த மார்ச் 2018-ல் ஈட்டிய 989 கோடி ரூபாயில் இருந்து மார்ச் 2019-ல் 1,201 கோடி ரூபாயாக அதிகரித்திருக்கிறது. அதே போல நிகர வட்டி மார்ஜினும் மார்ச் 2018-ல் 2.44 சதவிகிதத்தில் இருந்து மார்ச் 2019-ல் 2.54 சதவிகிதமாக அதிகரித்திருக்கிறது.
வாராக் கடன்கள்
மார்ச் 2019 காலாண்டில் LIC Housing நிறுவனம் கொடுத்திருக்கும் மொத்தக் கடனில் 1.53 சதவிகிதம் தோராய வாராக் கடன்களாக இருக்கின்றனவாம். இந்த தோராய வாராக் கடன் கடந்த மார்ச் 2018-ல் வெறும் 0.78 சதவிகிதமாக இருந்தது கவனிக்கத் தக்கது. அதே போல மார்ச் 2019 காலாண்டில் LIC Housing நிறுவனத்தின் நிகர வாராக் கடன்கள் 1.07 சதவிகிதமாக உயர்ந்திருக்கிறது. மார்ச் 2018-ல் இந்த நிகர வாராக் கடன் வெறும் 0.43 சதவிகிதமாக இருந்தது குறிப்பிடத்தக்கது.
கடன் வளர்ச்சி
ஒரு பக்கம் பிரச்னைகள் இருந்தாலும், மறு பக்கம் வியாபாரம் நன்றாக அதிகரித்திருக்கிறது. மார்ச் 2019 நிலவரப்படி LIC Housing நிறுவனம் 18,649 கோடி ரூபாயைக் கடனாகக் கொடுத்திருக்கிறார்கள். இது மார்ச் 2018-ல் கொடுத்த 17,402 கோடி ரூபாயை விட சுமார் 7 சதவிகிதம் அதிகம்.
தனி நபர் கடன்
LIC Housing நிறுவனம் மார்ச் 2019-ல் கொடுத்த 18,649 கோடி ரூபாய் கடனில் 12,448 கோடி ரூபாய் கடன் தனி நபர்களுக்கு (தனி நபர்கள் வீடு கட்ட) கொடுத்திருக்கிறார்களாம். மார்ச் 2018-ல் தனி நபர்களுக்கு கொடுத்திருக்கும் கடனான 10,541 கோடி ரூபாய் உடன் ஒப்பிட்டால், மார்ச் 2019-ல் 18 சதவிகித வளர்ச்சி.