போட்டி

போட்டிகள் நிறைந்த இன்றைய வியாபார உலகில் தங்கள் நிறுவன பொருட்கள் மக்களுக்கு அதிக அளவில் சென்றடைய வேண்டும் என்ற போட்டி மனப்பான்மையில் லாபத்தை எந்த அளவுக்கு குறைக்க முடியுமோ அவ்வளவு குறைத்து பொருட்களை விற்பனை செய்து மக்களை கவர்ந்து வருகின்றன. அதிலும், இன்றைக்கு ஆன்லைன் விற்பனை என்ற தொழில்நுட்பம் வந்துவிட்டதால் பெரும்பாலான நிறுவனங்கள் ஃபிளிப்கார்ட், அமேசான், இ-பே போன்ற ஆன்லைன் நிறுவனங்களுடன் ஒப்பந்தம் செய்துகொண்டு தங்கள் பொருட்களை விற்பனை செய்வதை அவர்களிடம் ஒப்படைத்துவிட்டு ஒதுங்கிக் கொள்கின்றன.

ஆன்லைன்

ஆன்லைன் விற்பனை நிறுவனங்களும் ஆன்லைன் விற்பனையில் யார் முதலிடம் பிடிப்பது என்ற போட்டி மனப்பான்மையில் விலை, தரம், லாபம் என எதைப் பற்றியும் கவலைப்படாமல் வந்ததை வரவில் வைப்போம் என்ற பெயரில், பொருட்களை விற்பனை செய்துவருகின்றன. அதிலும் குறிப்பாக திருவிழா சலுகை விடுமுறை நாள் சலுகை பிரைம் டே சலுகை என சலுகை விலையில் பொருட்களை விற்பனை செய்து வாடிக்கையாளர்களை கவர்வதில் போட்டி போட்டு வருகின்றன.

முன்னணி

அதிலும், முன்னணி ஆன்லைன் விற்பனை நிறுவனமான அமேசான், இதில் கொஞ்சம் ஓவராக விற்பனை செய்வது போல் தெரிகிறது. கடந்த வாரத்தில் சுமார் 9 லட்சம் ரூபாய் மதிப்புள்ள கேமராவை 6500 ரூபாய்க்கு விற்பனை செய்து சமூக வலைதளங்களின் கிண்டலுக்கு ஆளாகியுள்ளது தற்போது தெரியவந்துள்ளது. அமேசான் நிறுவனம் ஒவ்வொரு ஆண்டும் பிரைம் டே சலுகை என்ற பெயரில் பொருட்களை விற்பனை செய்துவருவது அனைவரும் அறிந்ததே. அதிலும் அமெசான் பிரைம் குழுவில் இணைந்துள்ள வாடிக்கையாளர்களுக்கு 60 சதவிகிதம் வரை சலுகை விலையில் பொருட்களை விற்பனை செய்வது வழக்கம். அதே போல் இந்த ஆண்டும் கடந்த ஜூலை 15 மற்றும் 16ஆம் தேதிகளில் பிரைம் டே சலுகையில் வீட்டு உபயோகப் பொருட்கள் முதல் டிவி, கேமரா, ஃபிரிட்ஜ், ஏசி, வாஷிங் மெஷின் வரை மின்னணு சாதனங்கள் அனைத்தும் விற்பனை செய்யப்பட்டன.

6500 ரூபாய்

இதில் தவறுதலாக சுமார் 9 லட்சம் ரூபாய் மதிப்புடைய உயர் ரக கேமராக்கள் சில வெறும் 6500 ரூபாய்க்கு விற்பனை செய்யப்பட்டுள்ளது தற்போது தெரியவந்துள்ளது. இது வேண்டுமென்றே விற்பனை செய்திருக்க முடியாது. குறிப்பிட்ட நாட்களுக்குள் விற்க வேண்டும் என்ற அவசரத்தில் தவறுதலாக விற்பனை செய்திருக்கக்கூடும் என்று அந்த கேமராக்களை வாங்கிய வாடிக்கையாளர்கள் சிலர் தெரிவித்தனர். நம்ம ஆட்கள் தான் சலுகை விலையில் விற்பனை செய்தால் சயனைடு விஷத்தை கூட போட்டி போட்டு வாங்குபவர்கள் ஆயிற்றே. விடுவார்களா என்ன, வந்த வரை லாபம் என்று சொல்லி, சுமார் 9 லட்சம் ரூபாய் மதிப்புள்ள கேமராக்கள் 6500 ரூபாய்க்கு வாங்கிய வாடிக்கையாளர்கள் தங்கள் நண்பர்களுக்கும் பரிந்துரை செய்து வாங்கிக் கொடுத்தனர். இதனால் குறைந்த அளவிலேயே இருந்து கேமராக்கள் உடனுக்குடன் விற்றுத் தீர்ந்தன. ஆனால், இது பற்றி அமேசான் நிறுவனம் எந்தவிதமான உறுதியான தகவலோ விளக்கமோ அளிக்கவில்லை.