நட்டக் கணக்கு

கடந்த மார்ச் 2019 காலாண்டில் இதே Vodafone Idea நிறுவனம் சுமார் 4,927 கோடி ரூபாயை நிகர நட்டமாகக் காட்டியது. அதற்கு முந்தைய டிசம்பர் 2018 காலாண்டில் 5,033 கோடி ரூபாயை நிகர நட்டமாகக் காட்டியது. அதர்கு முந்தைய செப்டம்பர் 2018 காலாண்டில் 4,988 கோடி ரூபாயை நிகர நட்டமாகக் காட்டியது குறிப்பிடத்தக்கது. ஆக எப்படியும் காலாண்டுக்கு சுமார் 5,000 கோடி ரூபாய் நிகர நட்டம் காட்டுவது Vodafone Idea நிறுவனத்துக்கு வாடிக்கையாகிவிட்டது.

இணைப்பு

கடந்த ஜூன் 2018 காலாண்டில் நிகர லாபம் 577 கோடியாக இருந்தது குறிப்பிடத்தக்கது. ஆக ஜூன் 2018 நிகர லாபத்தை ஜூன் 2019 நிகர நட்டத்தோடு ஒப்பிட்டால் சுமார் 970 சதவிகிதம் நட்டம் அதிகரித்திருப்பதை அமைதியாகச் சொல்கிறது Moneycontrol வலைதளம். ஆனால் கடந்த ஆகஸ்ட் 2018-ல் தான் Vodafone Idea நிறுவனம் ஒன்றாக முழுமையாக இணைக்கப்பட்டது என்பதையும் இங்கு கவனிக்க வேண்டி இருக்கிறது.

பெத்த வருவாய்

கடந்த டிசம்பர் 2018 காலாண்டு தொடங்கி ஜூன் 2019 காலாண்டு வரை வருவாய் ஒவ்வொரு காலாண்டும் சுமார் 11,200 - 11,600 கோடி ரூபாயை ஈட்டிக் கொண்டு தான் இருக்கிறது. ஆனால் லாபம் தான் அதிகரிக்கவில்லை. வருவாயில் கவனிக்க வேண்டிய முக்கியமான விஷயம், கடந்த ஜூன் 2018 காலாண்டில் 5,804 கோடி ரூபாய் வருவாய் ஈட்டும் போது 577 கோடி ரூபாய் நிகர லாபம் ஈட்டிய நிறுவனம், இன்று 11,200 கோடி ரூபாய் வருவாய் ஈட்டும் போது கூட தன் பழைய 577 கோடி ரூபாய் லாபம் கூட ஈட்ட முடியாமல் தவிக்கிறது என்பது குறிப்பிடத்தக்கது.

வாடிக்கையாளர் இழப்பு

மேலே சொன்ன வருவாய் இழப்பு கணக்கை எல்லாம் ஒரு பக்கம் வைத்துவிட்டுப் பார்த்தால், இன்னொரு பிரச்னையில் சிக்கி இருக்கிறது Vodafone Idea. கடந்த ஏப்ரல் - ஜூன் 2019 காலாண்டில் சுமார் 14 லட்சம் வாடிக்கையாளர்களை இழந்திருக்கிறது Vodafone Idea. காரணம் குறைந்தபட்ச கட்டாய ரீசார்ஜ் என்கிறார்கள் டெலிகாம் அனலிஸ்டுகள். அதோடு இன்று காலை Vodafone Idea நிறுவனத்தின் காலாண்டு முடிவுகள் வெளியான உடனேயே பங்குச் சந்தையில் Vodafone Idea நிறுவன பங்கின் விலை சுமார் 24% சரிந்து விற்பனையாகி வருகிறது.