டெல்லி: ரிலையன்ஸ் ஜியோ நிறுவனத்தின் 4ஜி சேவை கடந்த ஜூலை 2019-ல் முதல் இடம் பிடித்திருப்பதாக டிராய் அமைப்பு சொல்லி இருக்கிறது. ஜியோ நிறுவனத்தின் சராசரி இணைய டவுன்லோட் வேகம் 21 எம்பிபிஎஸ்-ஆக இருக்கிறதாம். 4ஜி சேவையில் அப்லோட் வேகத்தில் வொடாஃபோன் நிறுவனம் முதல் இடத்தில் இருக்கிறதாம்.

கடந்த ஜூன் 2019-ல் ரிலையன்ஸ் ஜியோ நிறுவனத்தின் இணைய வேகம் 17.6 எம் பி பி எஸ்-ஆக குறைந்தது. ஆனால் அடுத்த மாதமே தன் நெட்வொர்க் கவரேஜ்களின் தரத்தை மேம்படுத்தி ஜூலை 2019-ல் 21 எம் பி பி எஸ் வேகத்துக்கு கொண்டு வந்து இருக்கிறது ஜியோ.

இந்திய தொலைத்தொடர்பு ஒழுங்குமுறை ஆணையம் (TRAI - Telecom Regulatory Authority of India) அமைப்பு வெளியிட்ட இணைய வேகப் பட்டியலில், ஏர்டெல் நிறுவனத்தின் இணைய டவுன்லோட் வேகம் 8.8 எம் பி பி எஸ் ஆகவும், வோடாஃபோன் நிறுவனத்தின் இணைய டவுன்லோட் வேகம் 7.7 எம் பி பி எஸ் ஆகவும், ஐடியா செல்லூலர் நிறுவனத்தின் இணைய டவுன்லோட் வேகம் 6.6 எம் பி பி எஸ் ஆகவும் இருக்கிறதாம்.

4ஜி நெட்வொர்க்கில், இணைய அப்லோட் வேகத்தில் வொடாஃபோன் நிறுவனம் 5.8 எம் பி பிஎஸ் உடன் முதலிடத்தில் இருக்கிறதாம். அதற்கு அடுத்து ஐடியா செல்லூலர் நிறுவனம் 5.3 எம் பி பி எஸ் அப்லோட் வேகத்துடன் இரண்டாவது இடத்திலும், ரிலையன்ஸ் ஜியோ நிறுவனத்தின் அப்லோட் வேகம் 4.3 எம் பி பிஎஸ் உடன் மூன்றாவது இடத்திலும், 3.2 எம் பி பி எஸ் வேகத்துடன் ஏர்டெல் நான்காவது இடத்திலும் இருக்கிறதாம்.

மத்திய அரசின் நிர்வாகத்தின் கீழ் இயங்கும் பாரத் சஞ்சார் நிகாம் லிமிடெட் (பி எஸ் என் எல்) நிறுவனம் மூன்றாம் தலைமுறை அலைக்கற்றை நெட்வொர்க்குகளில் அதிவேகமானதாக இருக்கிறதாம். பி எஸ் என் எல் நிறுவனத்தின் 3ஜி இணைய டவுன்லோட் வேகம் 2.5 எம் பி பி எஸ் ஆகவும், ஐடியா நிறுவனத்தின் இணைய டவுன்லோட் வேகம் 2.0 எம் பி பி எஸ் ஆகவும், வொடாஃபோன் நிறுவனத்தின் இணைய டவுன்லோட் வேகம் 1.9 எம் பி பி எஸ் ஆகவும், ஏர்டெல் நிறுவனத்தின் இணைய டவுன்லோட் வேகம் 1.4 எம் பி பி எஸ் ஆகவும் இருப்பதாகச் சொல்கிறது டிராய்.