மத்தியப் பிரதேசம்

மத்தியப் பிரதேசத்தில் சத்னா மாவட்டத்தைச் சேர்ந்தவர் ராகேஷ் குப்தா. இவர் கடந்த அக்டோபர் 25, 2019, வெள்ளிக்கிழமை தந்தேரா பண்டிகையை முன்னிட்டு ஒரு புதிய ஹோண்டா ஆக்டிவா வாகனத்தை, கிருஷ்ணா ஹோண்டா ஷோரூமில் வாங்க, நான்கு பைகளோடு ஆட்டோவில் சென்று இருக்கிறார். ஆட்டோவில் இருந்து நான்கு பைகளோடு இறங்கிய ராகேஷ் குப்தாவை, கிருஷ்ணா ஷோரூம் ஊழியர்கள் வழக்கம் போல வரவேற்கிறார்கள்.

வாகனம் தேர்வு

கடையில் இருந்தவர்களிடம், ஒவ்வொரு வாகனமாக எல்லா விவரங்களையும் கேட்கிறார் ராகேஷ் குப்தா. கடைசியாக ஒரு 125 சிசி இன்ஜின் கொண்ட ஹோண்டா ஆக்டிவா பாரத் ஸ்டேஜ் 6 ரக வாகனத்தை வாங்கிக் கொள்வதாகச் சொல்லி இருக்கிறார் ராகேஷ் குப்தா. வரும் ஏப்ரல் 01, 2020 முதல் இந்தியாவில் பாரத் ஸ்டேஜ் 4 ரக வாகனங்களை விற்கக்கூடாது என்பதை இங்கு மீண்டும் நினைவு படுத்திக் கொள்ளலாம்.

காசு தான்

கடைக்காரர்களும், ராகேஷ் குப்தா தேர்ந்தெடுத்த வாகனத்துக்கு 83,000 ரூபாய் விலை சொல்லி இருக்கிறார்கள். நம் ராகேஷ் குப்தா, கிருஷ்ணா ஷோரூமுக்கு வரும் போதே நான்கு பைகளையும் கையில் எடுத்துச் சென்று இருக்கிறார் எனச் சொன்னோம் இல்லையா..? அப்போது கடைக்காரர்கள் ஏதோ பண்டிகை கால பர்சேஸ் போல என கண்டு கொள்ளவில்லை. ஷோரூம் ஊழியர்கள் அதிகம் கவனம் கொடுக்காத அந்த நான்கு பைகளையும் பில் கவுண்டரில் கொடுத்து இருக்கிறார் ராகேஷ் குப்தா.

பேமெண்ட்

என்ன சார் இது என ஊழியர்கள் கேட்டு இருக்கிறார்கள். அதற்கு 83,000 ரூபாய் பணம் எனச் சொல்லி அனைவரையும் ஆச்சர்யத்தில் ஆழ்த்தி இருக்கிறார். என்னங்க எல்லாம் காசுகளாக (காயின்) இருக்கிறதே என்ன செய்ய..? என ஷோரூம் ஊழியர்கள் அனைவரும் திகைத்துப் போய் நின்று இருக்கிறார்கள். கிருஷ்ணா ஷோரூம் மேலாளர் அனுபம் மிஸ்ரா, ஷோரூம் முதலாளி ஆஷிஷ் பூரிக்கு விஷயத்தை தெரியப்படுத்துகிறார்.

ஏமாற்ற வேண்டாம்

கிருஷ்ணா ஷோரூம் உரிமையாளரான ஆஷிஷ் பூரியோ, நம்பி வந்த வாடிக்கையாளரை ஏமாற்ற வேண்டாம், அவர் வாங்கி இருக்கும் ஷோண்டா ஆக்டிவா பாரத் ஸ்டேஜ் 6 வாகனத்தை மகிழ்ச்சியாக கொடுத்து அனுப்புங்கள். அவர் கொடுத்த நான்கு பை நிறைய இருக்கும் காசுகளை பொறுமையாக எண்ணிக் கொள்ளலாம் எனச் சொல்லி இருக்கிறார். ஷோரூம் முதலாளி அனுமதி கொடுத்ததின் பேரில் ராகேஷ் குப்தாவிடம் வாகனத்தைக் கொடுத்து அனுப்புகிறார்கள். நம் ராகேஷ் குப்தாவும் ஜாலியாக ஓட்டுக் கொண்டு வீட்டுக்கு வந்துவிட்டார்.

எண்ணுங்க

நம் ராகேஷ் குப்தா கொடுத்த 83,000 ரூபாய் பணத்தை, 3 ஊழியர்களை வைத்து சுமார் 4 மணி நேரம் எண்ணி இருக்கிறார்களாம். நம் ராகேஷ் குப்தா நல்ல வேளையாக 5 ரூபாய் மற்றும் 10 ரூபாய் காசுகளாக கொடுத்தார். இதுவே, ஒரு ரூபாய் மற்றும் இரண்டு ரூபாய் காசுகளாக கொடுத்து இருந்தால், காசு எண்ணும் வேலை இன்னும் அதிக நேரம் எடுத்து இருக்கும். ராகேஷ் சார் வண்டி வாங்குறப்ப இப்படியா ஷோரூம் ஊழியர்களை கொடுமைப் படுத்துவது..? கொஞ்சம் பாத்து பண்ணுங்க சார்.

குட்டி கணக்கு

83,000 ரூபாய் முழுக்க முழுக்க 10 ரூபாய் காசுகளாக இருந்து இருந்தால் 8,300 காசுகளை எண்ணி இருப்பார்கள். 83,000 ரூபாயை முழுக்க முழுக்க 05 ரூபாய் காசுகளாக கொடுத்து இருந்தால் 16,600 காசுகளை எண்ண வேண்டும். ஆக, நம் கிருஷ்ணா ஷோரூம் வாடிக்கையாளர்கள், குறைந்தபட்சம் 8,300 காசுகள், அதிகபட்சம் 16,600 காசுகளை எண்ணி இருப்பார்கள். பாவம் ஷோரூம் ஊழியர்களை சில மணி நேரம், திருப்பதி உண்டியல் காணிக்கையை எண்ணும் பக்தர்களாக மாற்றி விட்டார் ராகேஷ் குப்தா.