அகவிலைப்படி 50 சதவீதமாக உயர்வு.. மத்திய அரசு ஊழியர்களின் சம்பளம் எவ்வளவு உயரும் தெரியுமா..?

சென்னை: பொது தேர்தல் நெருங்கும் நேரத்தில் மத்திய அரசு ஊழியர்களுக்கு வியாழக்கிழமை மத்திய அமைச்சரவை இன்ப அதிர்ச்சி அளித்துள்ளது. மத்திய அரசு ஊழியர்களுக்கு அடிப்படை சம்பளத்தில் 4 சதவீதம் அகவிலைப்படி (DA) உயர்த்தி வழங்க ஒப்புதல் அளித்துள்ளது.

இதன் மூலம் அகவிலைப்படி 50 சதவீதமாக உயர உள்ளது, மேலும் இந்த 4 சதவீத அகவிலைப்படி உயர்வு ஜனவரி 1, 2024 முதல் நடைமுறைக்கு வரும் என்றும் மத்திய அரசு தரப்பில் விளக்கம் கொடுக்கப்பட்டு உள்ளது.

மோடி அரசின் இந்த அறிவிப்பின் மூலம் ஒரு கோடிக்கும் மேற்பட்ட மத்திய அரசு ஊழியர்கள் மற்றும் ஓய்வூதியர்கள் பயனடைவார்கள். இதுமட்டுமின்றி, ஊழியர்களுக்கான வீட்டு வாடகை கொடுப்பனவு (HRA) உயர்வு குறித்தும் அறிவிக்கப்பட்டுள்ளது.

மத்திய அரசின் பணிகளில் பணியாற்றி வரும் 49.18 லட்சம் ஊழியர்கள் மற்றும் 67.95 லட்சம் ஓய்வூதியதாரர்கள் பயனடையும் வகையில், நாட்டின் பணவீக்க அளவீட்டை ஒப்பிட்டு மத்திய அமைச்சரவை அகவிலைப்படி மற்றும் அகவிலை நிவாரணத்தின் தற்போதைய 46 சதவீதத்தை 4% அதிகரித்து இனி 50 சதவீதமாக இருக்கும் என தெரிவித்துள்ளது. இந்த உயர்வால் மத்திய அரசுக்கு வருடம் 12,868.72 கோடி ரூபாய் கூடுதல் செலவாகும் என கணக்கிடப்பட்டு உள்ளது.

பொதுவாக ஜனவரி மற்றும் ஜூலை என ஆண்டிற்கு இரண்டு முறை அகவிலைப்படி மற்றும் அகவிலை நிவாரணம் உயர்த்தப்படும். இதில் அகவிலைப்படி என்பது மத்திய அரசு ஊழியர்களுக்கானது, அகவிலை நிவாரணம் என்பது மத்திய அரசு பணியில் இருந்து ஓய்வு பெற்றவர்களுக்கானது.

மத்திய அரசு ஊழியர்களின் சம்பள உயர்வு எவ்வளவு?: இந்த 4 சதவீதம் அகவிலைப்படி உயர்வு மூலம் மத்திய அரசு ஊழியர் ஒருவரது மாத சம்பளம் ரூ.50,000 என்றும், அடிப்படை சம்பளம் ரூ.15,000 என்றும் இருந்தால், தற்போது அவர் அடிப்படை சம்பளத்தில் 46 சதவீதத்தில் ரூ.6,900 அகவிலைபடியாக பெறுகிறார்.

தற்போதைய 4 சதவீத உயர்வுக்குப் பிறகு, ஊழியர் மாதத்திற்கு ரூ.7,500 பெறுவார், இது முந்தைய ரூ.6,900 உடன் ஒப்பிடும்போது ரூ.600 அதிகம். எனவே, ஒருவருக்கு மாத சம்பளம் ரூ.50,000, அடிப்படை சம்பளம் ரூ.15,000 இருந்தால், அவரது சம்பளம் மாதத்திற்கு ரூ.600 உயரும்.

கடந்த அக்டோபர் 2023 இல் அறிவிக்கப்பட்ட அகவிலைப்படி உயர்வில், அரசு அகவிலைப்படி மற்றும் ஓய்வூதிய ஈட்டை 4 சதவீதம் உயர்த்தி 46 சதவீதமாக அறிவித்திருந்தது குறிப்பிடத்தக்கது.