என்னது ஹவாய் செருப்பு 1 லட்சமா.. சவுதியில் செம டிரெண்டிங்..!

துபாய்: ஹவாய் செப்பல் 90ஸ் கிட்ஸ்களின் மறக்க முடியாத பொருட்களில் ஒன்று. நமது கிராமங்களிலும் நமது தாத்தா பாட்டி என பலரும் இந்த ஹவாய் செருப்பை அணிந்திருப்பதை பார்த்து தான் நாம் வளர்ந்து வந்திருக்கிறோம். ஏன் நாமே கூட சிறுவயதில் இந்த செருப்பை அணிந்திருக்கிறோம்.

தற்போது என்னதான் புதுப்புது மாடல்களில் புதுப்புது நிறுவனங்களின் செருப்பு, ஷூ உள்ளிட்டவை வந்திருந்தாலும் இத்தகைய ஹவாய் செருப்பினை பார்க்கும்போது நம்மை அறியாமலேயே நமக்கு பழைய நினைவுகள் ஏற்படும். அப்படித்தான் சமூக வலைத்தளங்களில் ஒரு வீடியோ வைரலாகி 90ஸ் கிட்ஸ் அனைவரையும் அதிர்ச்சியில் ஆழ்த்தியுள்ளது.

சவுதி அரேபியா நாட்டில் ஹவாய் செருப்பு ஒரு லட்சம் ரூபாய்க்கு விற்பனை செய்யப்பட்டு இருப்பதாக ஒரு வீடியோ சமூக வலைதளங்களில் பரவி வருகிறது. வெள்ளை நிறத்தில் ப்ளூ நிற ஸ்டிராப் கொண்ட இந்த செருப்பு இந்தியாவில் மிகவும் புகழ்பெற்றது.

இந்திய சந்தைகளில் இது குறைந்த விலையிலேயே கிடைக்கும் சூழலில் சவுதி அரேபியாவில் 4,500 ரியால் அதாவது இந்திய ரூபாயில் சுமார் ஒரு லட்சம் ரூபாய்க்கு விற்பனை செய்யப்படுகிறதாம். இந்த வீடியோ சமூக வலைத்தளங்களில் வைரல் ஆகி வருவதை அடுத்து ஏராளமானவர்கள் தங்களுடைய நினைவுகளையும் இதில் தற்போது உள்ள தொழில் வாய்ப்பு குறித்தும் கருத்து தெரிவித்து வருகின்றனர்.

இந்தியர்கள் இந்த தொழில் வாய்ப்பை பயன்படுத்திக் கொண்டு 100 ரூபாய்க்கு இங்கே செருப்பினை வாங்கி அதனை சவுதியில் கொண்டு சென்று விற்பனை செய்யலாம். இதன் மூலம் நாம் செய்யும் 100 ரூபாய் முதலீடுக்கு ஆயிரம் மடங்கு லாபம் கிடைக்கும் என ஒரு பயனாளர் தெரிவித்துள்ளார். பலரும் ஹவாய் செருப்பு குறித்த தங்களுடைய வாழ்க்கை அனுபவங்களையும் பின்னூட்டங்களாக பதிவு செய்து வருகின்றனர்.

ஒரு நபர் சிறிய வயதில் என்னை அடிக்க அம்மா பயன்படுத்திய ஆயுதமே இந்த செருப்பு தான் எனக் கூறியுள்ளார். தற்போது இந்த செருப்பினை யாரும் பயன்படுத்துவதே இல்லை என சிலர் தெரிவிக்கின்றனர்.

ஒரு பயனாளர் என்னுடைய குழந்தை பருவத்தில் ஷூ வாங்க முடியாத காலத்தில் நான் ஹவாய் செருப்பினை அணிந்து கொண்டு தான் பள்ளிக்கு சென்று வந்தேன் என கூறியுள்ளார். பலரும் தங்களுடைய வாழ்க்கை அனுபவங்களையும் ஹவாய் செருப்பு உடனான தங்களுடைய நினைவுகளையும் பகிர்ந்து வருகின்றனர்.

Story written by: Devika