9 குழந்தை போதாது.. 12 ராசிகளுக்கும் 12 குழந்தை வேணும்.. அடம்பிடிக்கும் சிஇஓ மனைவி..!

சீன நாட்டை சேர்ந்த ஒரு தம்பதி ஏற்கனவே 9 குழந்தைகளை பெற்றுள்ள நிலையில் 12 ராசிகளையும் பிரதிபலிக்கும் வகையில் இன்னும் மூன்று குழந்தைகளை பெற்றெடுக்க வேண்டும் என விருப்பம் தெரிவித்திருப்பது பெரிய விவாதத்தை ஏற்படுத்தி உள்ளது.

கிழக்குச் சீன பகுதியை சேர்ந்த 33 வயதான பெண்தான் டியான். இவருடைய கணவர் சாவோ வான்லாங். இவர்கள் 2008 ஆம் ஆண்டு சந்தித்து காதல் வசப்பட்டனர் . பின்னர் 2010ஆம் ஆண்டு இருவரும் திருமணம் செய்து கொண்டனர். இவர்களில் கணவர் சாவோ வான்லாங் மின்சாரம் தயாரித்து வழங்கக்கூடிய ஒரு நிறுவனத்தின் தலைமை செயல் அதிகாரியாக செயல்பட்டு வருகிறார். மனைவி டியான் ஒரு நிறுவனத்தின் பொது மேலாளராக பணியாற்றி வருகிறார். இருவரும் ஆண்டுக்கு 464 கோடி ரூபாயை வருமானமாக ஈட்டுகின்றனர்.

இவர்களுக்கு 2010 ஆம் ஆண்டு சீன முறைப்படி புலிகளின் ஆண்டில் ஒரு பெண் குழந்தை பிறந்தது. முதல் பெண் குழந்தை பிறந்ததை அடுத்து அவர்கள் அடுத்தடுத்த ஆண்டுகளில் 8 குழந்தைகளை பெற்றெடுத்தனர். இதில் இரண்டு இரட்டையர்களும் அடங்குவர். 2022 ஆம் ஆண்டு இவர்களது இளைய மகன் பிறந்தான். தற்போது இவர்களுக்கு ஐந்து மகன்களும், நான்கு மகள்களும் இருக்கின்றனர். இவர்களின் பிள்ளைகளுக்கு சீன முறைப்படி ஏழு ராசிகளும் இருக்கின்றனவாம்.

பாம்பு, குதிரை, ஆடு, முயல் மற்றும் எருது ஆகிய ராசியில் மட்டும் இன்னும் இவர்களுக்கு குழந்தை பிறக்கவில்லையாம். எனவே இவர்கள் அனைத்து ராசியிலும் குழந்தை பெற்றுக்கொள்ள வேண்டும் என விரும்புகிறார்களாம். 9 குழந்தைகளோடு நாங்கள் நிறுத்திக் கொள்ளப் போவதில்லை 12 குழந்தைகள் பெற்றுக் கொள்வதே எங்களுடைய விருப்பம் என டியான் கூறியுள்ளார். என்னுடைய கணவரின் ஜீன் நல்ல ஜீனாக இருப்பதால் அதை ஏன் வீண் செய்ய வேண்டும் என டியான் ஒரு இதழுக்கு அளித்த பேட்டியில் கூறியுள்ளார்.

கூடிய விரைவில் மற்றொரு குழந்தையை இவர்கள் பெற்றெடுக்க போவதாகவும் தெரிவித்துள்ளனர். இவ்விருவரும் ஒரு ஆண்டுக்கு 464 கோடி ரூபாயை வருமானமாக ஈட்டுகின்றனர். 2000 சதுர மீட்டர் பரப்பளவு கொண்ட வீட்டில் இவர்கள் வசிக்கின்றனர். குழந்தைகளை பார்த்துக் கொள்வதற்கு ஒவ்வொரு குழந்தைக்கு ஒரு பணியாளர், ஒரு ஊட்டச்சத்து நிபுணர் என இவர்கள் பணியமர்த்தியுள்ளனர்.
இதே போல 12 குழந்தைகளை பெற்றெடுப்பர் என நம்புவதாக கூறிய டியான், அதற்கு ஏற்ற வகையில் தங்களின் வீட்டினை விரிவாக்கம் செய்ய போவதாக கூறியுள்ளார்.