சின்ன பச்சன் செய்த பெரிய வேலை.. ஒரே கல்லில் 6 மாங்காய்..!!

பாலிவுட் பிரபலங்களும், முன்னணி தொழிலதிபர்களும் கடந்த ஒரு வருடமாக அதிகளவிலான பணத்தை ரியல் எஸ்டேட் துறையில் முதலீடு செய்து வருகின்றனர். பொதுவாக பெரும் பணக்காரர்கள் பங்குச்சந்தையிலும், ஆடம்பர பொருட்களில் அதிகம் முதலீடு செய்வது வழக்கம், ஆனால் தற்போது ரியல் எஸ்டேட் மோகத்தில் உள்ளனர்.

இந்த நிலையில் பாலிவுட் சினிமாவின் முடிசூடா மன்னனாக இருக்கும் அமிதாப் பச்சனின் மகனும், நடிகருமான அபிஷேக் பச்சன், மும்பையின் போர்விலி பகுதியில் உள்ள ஓபராய் ஸ்கை சிட்டியில் ஆடம்பரமான ஆறு அப்பார்ட்மென்ட்-களை சுமார் ரூ.15.42 கோடிக்கு வாங்கியுள்ளதாகத் தகவல் வெளியாகியுள்ளது.

ஓன்று, ரெண்டு அப்பார்ட்மென்ட் வாங்குவதை தாண்டி தற்போது பெரும் பணக்காரர்கள் கொத்துக் கொத்தாக வீடுகளை வாங்கி வருகின்றனர். அபிஷேக் பச்சன் வாங்கிய இந்த 6 ஆடம்பர வீடுகள் மொத்தம் 4,894 சதுர அடி பரப்பளவு கொண்டது.

மேலும் ஒரு சதுர அடி ரூ.31,498 என்ற விலையில் விற்பனை செய்யப்பட்டுள்ளன. மே 5, 2024 அன்று விற்பனை ஒப்பந்தம் கையெழுத்தாகியுள்ளதாக Zapkey நிறுவனம் தகவல் பெற்றுள்ளதாகத் தெரிவித்துள்ளது.

1,101 சதுர அடி கார்பெட் பரப்பளவு கொண்ட முதல் அப்பார்ட்மென்ட் ரூ.3.42 கோடிக்கும், தலா 252 சதுர அடி பரப்பளவு கொண்ட இரண்டாவது மற்றும் மூன்றாவது அப்பார்ட்மென்ட் தலா ரூ.79 லட்சத்திற்கும் விற்பனை செய்யப்பட்டுள்ளன. 1,101 சதுர அடி மற்றும் 1,094 சதுர அடி கார்பெட் ஏரியா கொண்ட நான்காவது மற்றும் ஐந்தாவது அப்பார்ட்மென்ட் முறையே ரூ.3.52 கோடி மற்றும் ரூ.3.39 கோடிக்கும் விற்பனை செய்யப்பட்டுள்ளன. ஆறாவது அடுக்குமாடி குடியிருப்பும் ரூ.3.39 கோடிக்கு விற்பனை செய்யப்பட்டுள்ளது.

போர்விலி கிழக்கில் அமைந்துள்ள 25 ஏக்கர் பரப்பளவு கொண்ட ஒருங்கிணைந்த குடியிருப்பு அப்பார்ட்மென்ட் திட்டம் தான் இந்த ஓபராய் ஸ்கை சிட்டி. இதில் எட்டு ஆடம்பரமான குடியிருப்பு டவர்கள் மற்றும் 15 லட்சம் சதுர அடி பரப்பளவு கொண்ட ஸ்கை சிட்டி மால் ஆகியவை அடங்கும்.