தவறான வங்கி கணக்கிற்கு பணம் அனுப்பிவிட்டீர்களா? உடனடியாக இந்த 2 விஷயத்தை செய்யுங்க!

இன்றைய வேகமான உலகில் UPI பணப் பரிவர்த்தனைகள் மற்றும் இன்டர்நெட் பேங்கிங் சேவைகள் பரிவர்த்தனையை மிகவும் எளிமையாக்கியுள்ளன. ஷாப்பிங் செய்தாலும் சரி டிக்கெட்கள் முன்பதிவு செய்தாலும் சரி அனைவரும் யுபிஐ மூலம் தான் பணம் செலுத்தி வருகிறோம். இருப்பினும் பல நேரங்களில் அவசரத்தில் பணம் அனுப்பும்போது, பணம் தவறான கணக்கிற்கு சென்று விட்டால் என்ன செய்வது? இது போன்ற சம்பவம் உங்களுக்கு நடந்தால் பீதியடைய வேண்டாம். அதற்கு ஆர்பிஐ சில வழிகாட்டுதல்களை வழங்கியுள்ளது. இதன் மூலம் உங்கள் பணத்தை எளிதில் திரும்பப் பெறலாம்.

ரிசர்வ் பேங்க் ஆப் இந்தியா வழிகாட்டுதல்களின்படி நீங்கள் தவறுதலாக வேறு UPI கணக்கிற்கு அல்லது வேறு இன்டர்நெட் பேங்கிங் கணக்கிற்கு பணம் அனுப்பி விட்டால் உடனடியாக 18001201740 என்ற கட்டணமில்லா எண்ணை தொடர்பு கொள்ளலாம். இந்த நம்பரை அழைத்து உங்கள் புகாரை பதிவு செய்யலாம்.

அதன் பிறகு பணம் செலுத்தப்பட்ட கணக்கு எண் மற்றும் பரிவர்த்தனை நேரம் உட்பட சில விவரங்களை வழங்க வேண்டும். நீங்கள் உங்கள் பிரச்சனை குறித்து வாடிக்கையாளர் சேவைக்கு தெரிவிக்கலாம். தகவல் சரிபார்க்கப்பட்டால் உங்களுடைய பணம் 48 மணி நேரத்திற்குள் உங்கள் கணக்கிற்கு திருப்பி அனுப்பி வைக்கப்படும்.

வங்கி கிளையைத் தொடர்பு கொள்ளலாம்: UPI அல்லது இன்டர்நெட் பேங்கிங் சேவை மூலம் தவறாக பணம் செலுத்தி விட்டால் உங்கள் வங்கிக் கிளையைத் தொடர்பு கொண்டு புகாரை பதிவு செய்யலாம். தவறான ஆன்லைன் கட்டணத்தின் விவரங்களை வழங்குவதற்கு படிவத்தை நிரப்ப வேண்டும். அதன் பின்னர் அந்த படிவத்தில் பரிவர்த்தனை தொடர்பான விவரங்களை வழங்க வேண்டும்.

குறிப்பாக பரிவர்த்தனை எண், தேதி, தொகை மற்றும் பணம் அனுப்பப்பட்ட தவறான கணக்கு விவரங்கள் உள்ளிட்ட அனைத்து விவரங்களையும் வழங்க வேண்டும். வங்கி ஒத்துழைக்கவில்லை அல்லது உதவ முன்வரவில்லை என்றால் bankingombudsman.rbi.org.in என்ற முகவரியிலும் புகாரை பதிவு செய்யலாம். ஆர்பிஐ வழிகாட்டுதல்களின் படி நீங்கள் புகாரை பதிவு செய்து விட்டால் 48 மணி நேரத்திற்குள் பணத்தை திருப்பி வழங்குவது வங்கியின் பொறுப்பாகும்.