தூத்துக்குடி நிறுவனத்தை அலேக்கா வாங்கிய அதானி.. மாஸ்டர் பிளான் உடன் களமிறங்கிய கௌதம் அதானி..!!

இந்திய சிமெண்ட் துறையில் ஆதிக்க நிலையை அடைய வேண்டும் என்ற பெரும் கனவுடன் களமிறங்கியுள்ளது அதானி குழுமம். இதற்காக தனது கட்டுப்பாட்டில் இருக்கும் அம்புஜா சிமெண்ட்ஸ் குறிப்பிடத்தக்க வகையில் தமிழ்நாட்டில் ஒரு நிறுவனத்தை வாங்கியுள்ளது.

அதானி சிமெண்ட் வர்த்தகத்தில் அம்புஜா சிமெண்ட்ஸ் மற்றும் ஏசிசி ஆகிய இரண்டு பெரிய நிறுவனங்கள் இருந்தாலும், நாட்டின் பல மாநிலத்தில், பல சிமெண்ட் மற்றும் சிமெண்ட் உற்பத்தி சார்ந்த நிறுவனத்தில் முதலீடு செய்துள்ளது. இந்தியாவில் 2வது பெரிய சிமெண்ட் உற்பத்தி நிறுவனமாக இருக்கும் அதானி சிமெண்ட் தென்னிந்தியாவில் தனது வர்த்தகத்தை பலப்படுத்த தூத்துக்குடி நிறுவனத்தை சத்தமில்லாமல் வாங்கியுள்ளது.

தூத்துக்குடியில் அமைந்துள்ள 1.5 மில்லியன் டன் திறன் கொண்ட சிமெண்ட் உற்பத்திக்கு முக்கியமான கிரைண்டிங் ஆலையை ரூ.414 கோடிக்கு மை ஹோம் குழுமத்திடம் இருந்து கையகப்படுத்தியுள்ளது அம்புஜா சிமெண்ட்ஸ். இந்த கையகப்படுத்துதலின் மூலம், அதானி குழுமத்தின் மொத்த சிமெண்ட் உற்பத்தி திறன் தற்போது சுமார் 79 மில்லியன் டன்னாக உயர்ந்துள்ளது.

தென்னிந்திய சந்தையில் வலுவாக கால்பதிக்கும் திட்டத்துடன் தூத்துக்குடியில் உள்ள இந்த சிமெண்ட் கிரைண்டிங் ஆலையை கையகப்படுத்தியது மூலம் ஆம்புஜா சிமெண்ட்ஸின் வளர்ச்சி பாதையை வலுப்படுத்தியுள்ளது. தென்னிந்தியாவில் அதிகரித்து வரும் சிமெண்ட் தேவையில் பெரும் வர்த்தகத்தை கைப்பற்றவே தூத்துக்குடி நிறுவனம் கைப்பற்றப்பட்டு உள்ளது.

மேலும் ஆம்புஜா சிமெண்ட்ஸில் அதானி குழுமத்தின் பங்கு இருப்பை அதிகரிக்க இந்நிறுவனம் வெளியிட்ட வாரண்ட்டுகளை முழுமையாக வாங்க முடிவு செய்து சுமார் ரூ.8,339 கோடி முதலீடு செய்துள்ளது. இதன் மூலம், ஆம்புஜா சிமெண்ட்ஸ் நிறுவனத்தில் அதானி குழுமத்தின் பங்கு இருப்பு 63.2 சதவீதத்திலிருந்து 70.3 சதவீதமாக உயர்ந்துள்ளது.

2022 ஆம் ஆண்டில் ரூ.5,000 கோடியும், இந்த ஆண்டு மார்ச் மாதத்தில் ரூ.6,661 கோடியும் என முன்னதாக முதலீடு செய்த தொகையுடன் சேர்த்து, மொத்த முதலீடு ரூ.20,000 கோடியாக உயர்ந்துள்ளது. இந்த நிதியுதவி கொண்டு சிமெண்ட் நிறுவனங்களால் 2028 ஆம் ஆண்டுக்குள் ஆண்டு திறனை 140 மில்லியன் டன்னாக என தற்போதைய நிலையை காட்டிலும் இரட்டிப்பாக்க திட்டமிட்டுள்ளது.