மகாபிரபு இங்கயும் வந்துட்டீங்களா!! விமான உற்பத்தி துறையில் கால் பதிக்கும் அதானி குழுமம்!!

கௌதம் அதானி தலைமையிலான அதானி குழுமம், பிரேசிலின் எம்ப்ரேயர் நிறுவனத்துடன் இணைந்து இந்தியாவில் பிராந்திய போக்குவரத்து விமானங்களுக்கான ஒரு புதிய திட்டத்தை அமைக்க செவ்வாய்க்கிழமை ஒரு முக்கிய கூட்டாண்மையை அறிவித்துள்ளது. இந்த ஒப்பந்தம் நாட்டின் விமானப் போக்குவரத்துத் துறையில் ஒரு குறிப்பிடத்தக்க மைல்கல்லாகப் பார்க்கப்படுகிறது.

அதானி ஏர்போர்ட் ஹோல்டிங்ஸ் லிமிடெட் இயக்குநரான ஜீத் அதானி, இந்த கூட்டணி தனித்துவமான விமானப் போக்குவரத்துக் கட்டமைப்பை நிறுவும் என்று ஊடகங்களிடம் தெரிவித்தார். இத்திட்டம் இந்தியாவின் விமானப் போக்குவரத்து எதிர்காலப் போக்கை மாற்றியமைக்கும் என்று அவர் குறிப்பிட்டார். “உலகின் தலைசிறந்த விமான உற்பத்தி நிறுவனங்களில் ஒன்றான எம்ப்ரேயருடன் அதானி டிஃபென்ஸ் ஒரு முக்கிய கூட்டாண்மையில் இணைவதை மிகுந்த பெருமையுடன் அறிவிக்கிறேன்,” என்று ஜீத் அதானி கூறினார். இந்த இணக்கத்தின் மூலம் தங்கள் நாட்டின் விமானப் போக்குவரத்துத் துறை புதிய உயரங்களை எட்டும் என அவர் நம்பிக்கை தெரிவித்தார்.

"நாம் இணைந்து இந்தியாவில் ஒரு பிராந்திய விமான உற்பத்தி வசதியையும், அதனுடன் ஒரு தனித்துவமான விமானப் போக்குவரத்துச் சூழலியலையும் உருவாக்குவோம். இது நமது நாட்டின் விமானப் போக்குவரத்து எதிர்காலத்தை மறுவரையறை செய்யும் ஒரு திட்டமாகும்," என்று ஜீத் அதானி விளக்கினார்.

இந்த ஒப்பந்தத்தின் மூலம் அதானி குழுமம் விமான உற்பத்தித் துறையில் நுழைந்துள்ளது. உற்பத்தி, ஒருங்கிணைப்பு மற்றும் உள்நாட்டுமயமாக்கல் முயற்சிகளை அதிகரிப்பது போன்ற திட்டங்களை இந்த கூட்டாண்மை உள்ளடக்கியுள்ளது. இது இந்தியாவின் தற்சார்பு இலக்குக்கு உத்வேகம் அளிக்கும் என எதிர்பார்க்கப்படுகிறது.

போயிங் மற்றும் ஏர்பஸ்ஸுக்குப் பிறகு மூன்றாவது பெரிய சிவில் விமானத் தயாரிப்பாளரான எம்ப்ரேயர், பிராந்திய ஜெட் மற்றும் மத்திய தூர பயணிகள் விமானங்களை உற்பத்தி செய்கிறது. மேலும், தனி விமானங்கள, பாதுகாப்பு விமானங்கள் மற்றும் விவசாயத்தில் பயன்படுத்தப்படும் விமானங்களையும் தயாரிக்கிறது.

இந்தக் கூட்டாண்மை ஒரு வணிக ஒப்பந்தத்தை விட மேலானது என ஜீத் அதானி வலியுறுத்தினார். “இது ஒரு தொலைநோக்கு பார்வை நிறைவேறும் தருணம். இது தற்சார்பு இந்தியா என்ற தேசிய இலக்குடன் இணைந்து, நமது மண்ணில் உலகத் தரம் வாய்ந்த விமானப் போக்குவரத்துத் திறன்களைக் கட்டமைப்பதற்கான இந்தியாவின் உறுதியைப் பிரதிபலிக்கிறது,” என்று அவர் குறிப்பிட்டார்.

இந்த இரண்டு நிறுவனங்களும் இணைந்து, எம்ப்ரேயர் பிராந்திய விமானங்களுக்கான இறுதி ஒருங்கிணைப்புத் தொழிற்சாலையை (FAL) நாட்டிலேயே அமைக்கவுள்ளன. இருப்பினும், இந்த வசதிக்கான முதலீடுகள் மற்றும் அதன் இருப்பிடம் குறித்த விவரங்கள் உடனடியாக வெளியிடப்படவில்லை.அதானி டிஃபென்ஸ் அண்ட் ஏரோஸ்பேஸ் மற்றும் எம்ப்ரேயர் இடையேயான புரிந்துணர்வு ஒப்பந்தம் கையெழுத்தான நிகழ்வில் பாதுகாப்புத்துறை செயலாளர் ராஜேஷ் குமார் சிங் பங்கேற்றார்.