பெரிய தலைகள் ரெண்டும் ஒன்னா சேர்ந்திருக்கு.. இனி ஆட்டம் வேற லெவல்.. அதானி-அம்பானி புதிய கூட்டணி..!!

இந்தியாவின் இருபெரும் தொழில்துறை ஜாம்பவான்களான அதானி குழுமம் மற்றும் ரிலையன்ஸ் இண்டஸ்ட்ரீஸ் ஆகியவை எரிபொருள் விநியோகம் தொடர்பாக ஒரு புதிய மற்றும் வரலாற்றுச் சிறப்புமிக்கக் கூட்டாணியை அறிவித்துள்ளன.

இந்த ஒப்பந்தத்தின்படி, அதானி குழுமத்தின் துணை நிறுவனமான அதானி டோட்டல் கேஸின் (Adani Total Gas) தேர்ந்தெடுக்கப்பட்ட விற்பனை நிலையங்கள், ஜியோ-பிபி (Jio-BP) நிறுவனத்தின் பெட்ரோல் மற்றும் டீசலை விற்பனை செய்யும். அதே நேரத்தில், சில ஜியோ-பிபி நிலையங்களில், அதானி டோட்டல் நிறுவனத்தின் சிஎன்ஜி (CNG) விநியோக அலகுகள் நிறுவப்படும்.

முக்கியத்துவம் வாய்ந்த இரண்டாவது கூட்டணி: இது முகேஷ் அம்பானியின் ரிலையன்ஸ் இண்டஸ்ட்ரீஸுக்கும், அதானி குழுமத்திற்கும் இடையிலான இரண்டாவது பெரிய ஒத்துழைப்பாகும். முன்னதாக, கடந்த ஆண்டு மார்ச் மாதம், ரிலையன்ஸ் இண்டஸ்ட்ரீஸ், அதானி பவர் (Adani Power) நிறுவனத்தின் மஹான் எனர்ஜென் லிமிடெட்டில் (Mahan Energen Limited) 26% பங்குகளை ரூ.50 கோடிக்கு வாங்கியது. இந்த ஒப்பந்தத்தின் மூலம், மத்தியப் பிரதேசத்தில் உள்ள 600 மெகாவாட் மின் உற்பத்தி ஆலையிலிருந்து 20 ஆண்டு ஒப்பந்தத்தின் கீழ், 500 மெகாவாட் மின்சாரத்தை ரிலையன்ஸ் பெற்றது குறிப்பிடத்தக்கது.

கூட்டணி நோக்கம் மற்றும் பயன்கள்: தற்போது, அதானி டோட்டல் சுமார் 650 சிஎன்ஜி நிலையங்களை நிர்வகிக்கும் அதே வேளையில், ஜியோ-பிபி சுமார் 2,000 சில்லறை விற்பனை நிலையங்களை இயக்குகிறது. இந்த புதிய கூட்டணி, இரு நிறுவனங்களும் தங்களது உள்கட்டமைப்பை மேம்படுத்திக் கொள்ள உதவும் என எதிர்பார்க்கப்படுகிறது. இதன் மூலம், வாடிக்கையாளர்களுக்கு உயர்தர எரிபொருட்களின் முழுமையான வரம்பையும், மேம்பட்ட அனுபவத்தையும் வழங்க முடியும். இந்தக் கூட்டணிக்கு தற்போதுள்ள மற்றும் எதிர்கால சில்லறை விற்பனை நிலையங்களுக்கும் பொருந்தும் என்று தெரிவிக்கப்பட்டுள்ளது.

அதானி டோட்டல் கேஸின் தலைமை நிர்வாக அதிகாரி சுரேஷ் பி மங்லானி இது குறித்துப் கூறுகையில், எங்கள் விற்பனை நிலையங்களில் உயர்தர எரிபொருட்களின் முழுமையான வரம்பை வழங்குவதே எங்கள் பொதுவான தொலைநோக்குப் பார்வை. இந்த கூட்டணி ஒருவருக்கொருவர் உள்கட்டமைப்பைப் பயன்படுத்திக் கொள்ள உதவும், இதனால் வாடிக்கையாளர் அனுபவத்தையும் சலுகைகளையும் மேம்படுத்தும் என்று கூறினார்.

அதானி டோட்டல் கேஸின் விரிவான சேவை: அதானி மற்றும் டோட்டல் எனர்ஜிஸின் (TotalEnergies) இயற்கை எரிவாயு விநியோகக் கூட்டு முயற்சியான அதானி டோட்டல், அகமதாபாத், வதோதரா, ஃபரிதாபாத், குர்ஜா மற்றும் அசாம், சத்தீஸ்கர், மத்தியப் பிரதேசம் போன்ற பல மாவட்டங்களில் வலுவான இருப்பைக் கொண்ட நாட்டின் முன்னணி எரிவாயு விநியோக நிறுவனமாகும். அதானி டோட்டல் தற்போது 34 புவியியல் பகுதிகளைச் சென்றடைகிறது.

மேலும், இந்தியன் ஆயில் அதானி கேஸ் பிரைவேட் லிமிடெட் (Indian Oil Adani Gas Private Limited - IOAGPL), அதாவது இந்தியன் ஆயில் மற்றும் அதானி டோட்டல் இடையேயான 50:50 கூட்டு முயற்சி மூலம் மேலும் 19 பகுதிகள் சேவை வரம்புக்குள் கொண்டுவரப்பட்டுள்ளன. இந்த புதிய எரிபொருள் விநியோக ஒப்பந்தம், இரு நிறுவனங்களின் சந்தைப் பரப்பளவை மேலும் விரிவுபடுத்தி, இந்திய எரிசக்தித் துறையில் ஒரு புதிய அத்தியாயத்தைத் தொடங்கும் என எதிர்பார்க்கப்படுகிறது.