துபாய் நிறுவனத்தை வாங்கும் அதானி.. ரியல் எஸ்டேட் துறை தான் அடுத்த டார்கெட்டா..?

இந்தியாவின் 2வது பெரும் பணக்காராக இருக்கும் கௌதம் அதானி தலைமையிலான அதானி குழுமம், துபாய் தலைமையிடமாக கொண்ட ரியல் எஸ்டேட் நிறுவனமான ஈமார் ப்ராபர்ட்டீஸின் இந்திய கிளை நிறுவனமான ஈமார் இந்தியாவை கைப்பற்றும் பேச்சுவார்த்தையில் ஈடுபட்டுள்ளதாக தகவல்கள் வெளியாகியுள்ளன.

அதானி குழுமத்தின் மீது அமெரிக்க SEC அமைப்பு வழக்கு தொடுத்ததில் இருந்து தனது செயல்பாடுகளை பெரிய அளவில் மாற்றியுள்ளது. எப்போதும் போட்டி நிறுவனங்களை வாங்கி குவிக்கும் அதானி, சமீபத்தில் அதானி வில்மார் நிறுவனத்தில் இருந்து மொத்தமாக வெளியேற முடிவு செய்த பங்குகளை விற்பனை செய்துள்ளது.

இதை தொடர்ந்து நாட்டின் உள்கட்டமைப்பு, ரியல் எஸ்டேட், சாலை திட்டங்களில் அதிகளவில் முதலீடு செய்ய திட்டமிட்டு வருவதாக தகவல் வெளியானது. இதற்கு ஏற்றார் போல் நேற்று நடந்த ஏலத்தில் தமிழ்நாட்டில் 124 கிமீ சாலை திட்டத்தை 1600 கோடி ரூபாய்க்கு வென்றது. தற்போது ஈமார் இந்தியா நிறுவனத்தை வாங்க பேச்சுவார்த்தை நடத்தி வருகிறது.

இந்த ஒப்பந்தம் வெற்றிப்பெற்றால் ஈமார் இந்தியா நிறுவனத்தில் அதானி குழுமம் 70 முதல் 100 சதவீதம் வரையிலான பங்குகளை கையகப்படுத்தும் என எதிர்பார்க்கப்படுகிறது. இந்த ஒப்பந்தத்தின் மதிப்பு ரூ.4,000 கோடி முதல் ரூ.5,000 கோடி வரை இருக்கலாம் என தெரிகிறது. இந்த பங்குகளை அதானி குழுமத்தின் ரியல் எஸ்டேட் பிரிவான அதானி ரியால்டி மூலம் மேற்கொள்ளப்பட உள்ளது. மேலும் இந்த ஒப்பந்தம் வெற்றிகரமாக நடந்தால் அதானி குழுமத்தின் வரலாற்றிலேயே மிகப்பெரிய ரியல் எஸ்டேட் ஒப்பந்தமாக இது இருக்கும்.

ஈமார் இந்தியா நிறுவனம் 2016 ஆம் ஆண்டில் எம்.ஜி.எஃப் டெவலப்மெண்ட்ஸ் லிமிடெட் நிறுவனத்திலிருந்து பிரிந்த பின்னர், டெல்லி-என்சிஆர், மொஹாலி, லக்னோ, இந்தூர், ஜெய்ப்பூர் போன்ற முக்கிய நகரங்களில் ஆடம்பர குடியிருப்பு வீடுகள் மற்றும் கமர்சியல் ஸ்பேஸ் சொத்துக்களை உருவாக்கியது.

இதில் முக்கியமாக ஈமார் எமரால்டு ஹில்ஸ், ஈமார் டிகி ஹோம்ஸ், ஈமார் பிசினஸ் டிஸ்ட்ரிக்ட் 83 போன்றவை நிறுவனத்தின் குறிப்பிடத்தக்க திட்டங்களாக விளங்குகிறது. சமீபத்தில், குர்கிராம்-ல் ரூ.1,000 கோடி முதலீட்டில் ஆடம்பர குடியிருப்பு திட்டமான அமரிஸ் என்னும் திட்டத்தை அறிமுகப்படுத்தியது.

2024 ஆம் ஆண்டில் ஈமார் இந்தியாவின் மொத்த வருவாய் ரூ.2,756.6 கோடியை எட்டியுள்ளது, இது முந்தைய ஆண்டின் ரூ.1,765.8 கோடியுடன் ஒப்பிடுகையில் கணிசமான அதிகரிப்பாகும்.

அதானி குழுமத்தின் முக்கிய துணை நிறுவனமான அதானி ரியால்டி சமீபத்திய ஆண்டுகளில் தனது ரியல் எஸ்டேட் துறையில் வேகமாக விரிவாக்கம் செய்து வருகிறது. மும்பை, புனே, அகமதாபாத், டெல்லி-என்சிஆர் உள்ளிட்ட முக்கிய நகரங்களில் சொத்துக்களை கைப்பற்றி விரிவாக்கம் செய்து வருகிறது.