அதானி குழுமத்தின் சந்தை மதிப்பு ரூ.39,000 கோடி அதிகரிப்பு.. ஏன் தெரியுமா?

அதானி எண்டர்பிரைசஸ், அதானி போர்ட்ஸ் & செஸ், அதானி கிரீன் எனர்ஜி உள்ளிட்ட பங்குகள் சற்று ஏற்றத்தினை கண்டுள்ளது. இதன் காரணமாக அதானி குழும பங்குகளின் சந்தை மதிப்பு 39,000 கோடி ரூபாய் அதிகரித்து, 7.50 லட்சம் கோடி ரூபாயாக அதிகரித்துள்ளது.

தொடர்ந்து இரண்டாவது நாளாக ஏற்றத்தினைக் கண்டு வரும் நிலையில், கடந்த அமர்வில் சந்தை மதிப்பானது 30,000 கோடி ரூபாய் எனும் அளவுக்கு ஏற்றம் கண்டது.

நல்ல விஷயம்

அதானி குழுமம் சிங்கப்பூர் மற்றும் ஹாங்காங்கில் முதலீட்டாளர்களின் நம்பிக்கையை உயர்த்துவதற்கான முயற்சிகளையும் எடுத்து வருகின்றது. அதோடு நிறுவனம் 800 மில்லியன் டாலர் கடன் வசதிக்காகவும் உறுதியான உறுதிபாட்டையும் பெற்றுள்ளதாக தெரிகின்றது. இது அதானி கிரீன் எனர்ஜி நிறுவனத்திற்கு 750 மில்லியன் டாலர் எனும் அளவிலான கடனை திரும்ப செலுத்த அளிக்கப்படலாம் என தெரிகிறது. ஆக இது நிறுவனத்தின் பங்கு விலைகள் ஏற்றம் காண காரணமாக அமைந்துள்ளது.

அதானி எண்டர்பிரைசஸ்

அதானி எண்டர்பிரைசஸ் என்ற நிறுவனத்தின் பங்கு விலையானது 10% அதிகரித்து, 1500 ரூபாய் என்ற லெவலில் காணப்படுகின்றது. இதற்கிடையில் இதன் சந்தை மூலதனம் 1,71,051 கோடி ரூபாயாக அதிகரித்துள்ளது. இது கடந்த செவ்வாய்க்கிழமையன்று 1,55,502 கோடி ரூபாயாக இருந்த நிலையில், ஒரே நாளில் 15,549.62 கோடி ரூபாய் அதிகரித்துள்ளது.

நீண்டகால வளர்ச்சிக்கு பயன்

பல்வேறு நெருக்கடிக்களுக்கு மத்தியிலும் அதானி எண்டர்பிரைசஸ் நிறுவனம், சில வணிக விரிவாக்கங்களையும் செய்துள்ளது. இது இந்த நிறுவனத்தின் நீண்டகால வளர்ச்சிக்காக பயன்படலாம் என எதிர்பார்க்கப்படுகிறது. இதுவும் இதன் வணிக விரிவாக்கத்திற்கு உதவும் எனலாம்.

அதானி போர்ட்ஸ்

இதேபோல இந்த நெருக்கடி நிலைக்கு மத்தியில் அதானி போர்ட்ஸ் மற்றும் அதானி கிரீன் எனர்ஜி பங்குகளும் ஏற்றத்தில் காணப்படுகிறது. அதானி போர்ட்ஸ் & செஸ் நிறுவனத்தின் சந்தை மதிப்பு இதுவரையில் 4277 கோடி ரூபாய் எனும் அளவுக்கு ஏற்றம் கண்டுள்ளது. இதன் மூலம் இந்த நிறுவனத்தின் சந்தை மதிப்பானது 1,32,286.91 கோடி ரூபாயாக அதிகரித்துள்ளது. இது கடந்த அமர்வில் 1,28,010 கோடி ரூபாயாக இருந்தது. இதன் பங்கு விலையானது 2.56% உயர்ந்து, 607.75 ரூபாயாக அதிகரித்து வர்த்தகமாகி வருகின்றது. எனினும் இது அதிகபட்சமாக 615.85 ரூபாயாக உச்சம் தொட்டுள்ளது.

அதானி கிரீன் எனர்ஜி

இதே அதானி கிரீன் எனர்ஜி குழுமத்தின் சந்தை மூலதனம் 3841 கோடி ரூபாய் அதிகரித்துள்ளது. இது 800 மில்லியன் டாலர் கடன் ஒப்புதலை பெற்றுள்ள நிலையில் வந்துள்ளது. இது அதன் கடனை திரும்ப செலுத்த அதானி குழுமத்திற்கு பயனுள்ள ஒன்றாக இருக்கும் என்றும் எதிர்பார்க்கப்படுகிறது.

அதானி டோட்டல் கேஸ்

இதே அதானி டோட்டல் கேஸ் நிறுவனத்தின் சந்தை மதிப்பானது இதுவரையில் அதிகபட்சமாக 714.20 ரூபாயாக உச்சம் தொட்டுள்ளது. இதன் காரணமாக 74,809.08 கோடி ரூபாயாக இருந்த சந்தை மதிப்பானது, 78,548.44 கோடி ரூபாயாக அதிகரித்துள்ளது.

அதானி டிரான்ஸ்மிஷன்

அதானி டிரான்ஸ்மிஷன் நிறுவனத்தின் சந்தை மதிப்பானது 3580.73 கோடி ரூபாய் அதிகரித்து, 75,256.71 கோடி ரூபாயாக அதிகரித்துள்ளது.

அதானி டிரான்ஸ்மிஷன் நிறுவனத்தின் பங்கு விலையானது 2.40% அதிகரித்து, 658 ரூபாயாக அதிகரித்துள்ளது.

மற்ற நிறுவனங்களின் நிலை என்ன?

அதானி பவர், அதானி வில்மர் மற்றும் அம்புஜா சிமெண்ட்ஸ் நிறுவனகள் 2000 - 3000 கோடி ரூபாய் வரையிலான சந்தை மதிப்பினை சேர்த்துள்ளன.

இதற்கிடையில் அதானி பவர் நிறுவனத்தின் பங்கு விலையானது கடந்த செவ்வாய்கிழமையன்று 5% அதிகரித்தும், இதே இன்று 4.98% அதிகரித்து, 153.75 ரூபாயாக அதிகரித்துள்ளது. இதே அதானி வில்மரின் பங்கு விலையானது 5% அதிகரித்து, 379.45 ரூபாயாகவும், இதே அதானி போர்ட்ஸ் நிறுவனத்தின் பங்கு விலையானது 2.06% அதிகரித்து, 604.80 ரூபாயாகவும் வர்த்தகமாகி வருகின்றது.