என்னது எலான் மஸ்க் பெயரில் ஆதார் கார்டா..?!! ChatGPT கொடுத்த ஷாக்.. ஆதார் மோசடிகள் அதிகரிக்கும் அபாயம்!

ஆர்ட்டிஃபிஷியல் இன்டெலிஜென்ஸ் தொழில்நுட்பத்தின் வளர்ச்சி பெருமளவில் பயன்பட்டாலும் இதனால் ஏற்படக்கூடிய ஆபத்துகளும் அதிகரிக்கத் தான் செய்கிறது. கடந்த வாரம் ஓபன் AI நிறுவனம் GPT 4O-வில் ஒரு முக்கியமான அம்சத்தை அறிமுகப்படுத்தியது. அதாவது ஜிப்ளி ஸ்டைலில் படங்களை உருவாக்க இது பயன்பட்டது. இந்த அம்சம் அறிமுகப்படுத்தப்பட்டதிலிருந்து 70 கோடிக்கும் அதிகமான படங்களை உருவாக்கியுள்ளது. தற்போது இணையவாசிகளால் அதிகம் பயன்படுத்தப்பட்டு வருகிறது. இருப்பினும் சாட் ஜிபிடி-யின் புதிய திறன்கள் பற்றிய விழிப்புணர்வு பரவ தொடங்கியதிலிருந்து.. இதைத் தவறாக பயன்படுத்துவதும் அதிகரித்து வருகிறது.

சமூக ஊடகப் பயனர்கள் பலர் சாட் ஜிபிடியின் புதிய பட உருவாக்கும் அம்சத்தை வைத்து தங்கள் புகைப்படங்களை கொண்டே போலியான ஆதார் கார்டுகளை உருவாக்க தொடங்கியுள்ளனர்.

தவறான நபர்களிடம் ஆர்டிபிசியல் இன்டெலிஜென்ஸ் தொழில்நுட்பம் சிக்கிக்கொண்டால் என்ன நடக்கும் என்பது குறித்த விவாதங்கள் நீண்ட காலமாக நடந்து வருகிறது. இந்நிலையில் சாட் ஜிபிடியின் புதிய அம்சமான போட்டோரியலிஸ்டிக் படங்களை உருவாக்குவதுதான் தற்போதைய ட்ரெண்ட்.

சமூக ஊடகங்களில் பகிரப்படும் போட்டோக்களை பார்த்துவிட்டு சாட் ஜிபிடி மூலமாக ஆதார் கார்டு போன்ற படத்தை உருவாக்க முயற்சி செய்தோம். முடிவுகள் உண்மையாகவே ஆதார் அட்டைக்கு மிகவும் நெருக்கமாக இருந்தன.

சில X தள பயனர்கள் இந்திய அடையாள அட்டையான ஆதார் கார்டில் ஓபன் AI-யின் தலைமை நிர்வாக அதிகாரியான சாம் ஆல்ட்மேன் மற்றும் டெஸ்லா தலைமை நிர்வாக அதிகாரியான எலான் மஸ்க் ஆகியோரின் படங்களை வைத்து, கியூஆர் குறியீடுடன் ஆதார் எண்ணையும் சேர்த்து ஆதார் கார்டு உருவாக்கி பகிர்ந்துள்ளனர். ஆதார் கார்டு மட்டுமல்ல சாட் ஜிபிடி போலியான பான் கார்டுகளையும் உருவாக்குகிறது.

முன்னதாக, சாட் ஜிபிடி போன்ற சாட்போட்கள் படங்களை உருவாக்க DALL-E 3-ஐ சார்ந்திருந்தன. அதாவது நீங்கள் ஒரு படத்தைப் பற்றி சாட் ஜிபிடியிடம் கேட்டால், அது உங்கள் கோரிக்கையை DALL-E 3 போன்ற ஒரு தனிப்பட்ட AI அமைப்புக்கு அனுப்பும். அந்த அமைப்பு படத்தை உருவாக்கி சாட் ஜிபிடிக்கு திருப்பி அனுப்பும். பின்னர் சாட் ஜிபிடி அதை உங்களுக்குக் காண்பிக்கும். ஆனால் GPT 4O-வில் உள்ள புதிய அம்சம் என்னவென்றால், படங்களை உருவாக்கும் திறன் அவற்றிலேயே ஒருங்கிணைக்கப்பட்டுள்ளது.

இது போன்ற பட உருவாக்கும் திறன் தொழில்நுட்ப முன்னேற்றமாக பார்க்கப்பட்டாலும் இதன் மூலம் பயனர்கள் தவறாக பயன்படுத்தக்கூடிய சாத்தியக்கூறுகளும் அதிகரித்துள்ளது. ஏனெனில் இந்த புதிய தொழில்நுட்பம் போலியான தகவல்கள் அடையாளத் திருட்டு மற்றும் பிற தீங்கு விளைவுக்கும் செயல்களுக்கு வழிவகுக்கலாம் என்ற அச்சமும் நிலவுகிறது.