ஏர் இந்தியா விபத்து: உயிரிழந்தவர்களின் குடும்பங்களுக்கு தலா ரூ.1 கோடி - டாடா குழுமம்

அகமதாபாத்: டாடா குழுமத்துக்கு ஏர் இந்தியா நிறுவனத்துக்கு சொந்தமான விமானம் அகமதாபாத்தில் விபத்துக்குள்ளாகி இருக்கிறது. விமானம் விபத்துக்குள்ளான சம்பவத்தில் விமானத்தில் பயணம் செய்த 200க்கும் அதிகமானவர்கள் உயிரிழந்து விட்டதாக அறிவிக்கப்பட்டு இருக்கிறது.

குஜராத் முன்னாள் முதலமைச்சர் விஜய் ரூபானியும் இந்த விமானத்தில் பயணம் செய்திருந்தார் அவரும் இந்த விபத்தில் இறந்து விட்டார் என தெரிவிக்கப்பட்டு இருக்கிறது .ஏர் இந்தியா விமான விபத்தில் உயிரிழந்தவர்களின் குடும்பத்திற்கு தலா ஒரு கோடி ரூபாய் வழங்கப்படும் என டாடா நிறுவனம் அறிவிப்பு வெளியிட்டுள்ளது.

அகமதாபாத்தில் இருந்து லண்டனை நோக்கி புறப்பட்ட ஏர் இந்தியா விமானம் திடீரென விபத்துக்குள்ளானது. அகமதாபாத் அருகில் இருக்கக்கூடிய ஒரு மருத்துவக் கல்லூரியின் விடுதி கட்டிடத்தில் மோதி விமானம் விபத்துக்குள்ளானது. இந்த விபத்தில் விமானத்தில் பயணம் செய்த 242 பேரும் உயிரிழந்துள்ளனர்.

இதனிடையே விமான விபத்தில் உயிரிழந்தவர்களின் குடும்பங்களுக்கு தலா ஒரு கோடி ரூபாய் இழப்பீடாக வழங்கப்படும் என டாடா குழுமங்களின் தலைவரான என். சந்திரசேகரன் அறிவித்திருக்கிறார். மேலும் மருத்துவமனையில் சிகிச்சை பெற்று வருபவர்களின் முழு மருத்துவ செலவையும் டாடா குடுமமே ஏற்கும் என்றும் அவர் தெரிவித்திருக்கிறார்.

இது தொடர்பாக டாடா குழுமம் தன்னுடைய எக்ஸ் பக்கத்தில் வெளியிட்டு இருக்க கூடிய பதிவில் ஏர் இந்தியா விமான விபத்து குறித்து நாங்கள் மிகவும் வேதனை அடைந்திருக்கிறோம், இந்த நேரத்தில் எங்களுடைய துயரத்தை வார்த்தைகளால் வெளிப்படுத்த முடியவில்லை என அதில் குறிப்பிடப்பட்டிருக்கிறது. இந்த துயரத்தில் உயிரிழந்த ஒவ்வொரு நபரின் குடும்பத்திற்கும் டாடா குழுமம் ஒரு கோடி ரூபாய் வழங்கும் என்றும் காயமடைந்தவர்களின் சிகிச்சைக்கு தேவையான மருத்துவ செலவுகளையும் டாடா குழுமமே இருக்கும் என்றும் அதில் தெரிவிக்கப்பட்டு இருக்கிறது.

இந்த விபத்தில் சிக்கி சேதம் அடைந்திருக்கும் பிஜே மருத்துவ கல்லூரியின் விடுதியை மீண்டும் கட்டுவதற்கான உதவியை டாடா குழுமம் வழங்கும் என்றும் அதில் தெரிவிக்கப்பட்டு இருக்கிறது. பாதிக்கப்பட்ட குடும்பங்களுக்கு துணையாக நாங்கள் இருக்கிறோம் என டாடா குழுமம் அந்த பதிவில் தெரிவித்துள்ளது