விமான விபத்தில் மறைந்த Ajit Pawar சொத்து மதிப்பு எவ்வளவு தெரியுமா..?

மகாராஷ்டிரா துணை முதலமைச்சராக இருக்கும் அஜித் பவார் இன்று காலை விமான விபத்தில் உயிரிழந்தது, அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது.

தேர்தல் பிரச்சாரத்திற்காக சென்ற அஜித் பவார் பாராமதி விமான நிலையத்தில் அவர் பயணித்த பிரைவேட் ஜெட் விமானத்தை அவசரமாக தரையிறங்க முயன்றபோது விமானம் கட்டுப்பாட்டை இழந்து ரன்வேயிலிருந்து விலகி சென்று தீப்பிடித்து வெடித்தது. விபத்தில் அஜித் பவார் உட்பட விமானத்தில் பயணித்த அனைவரும் உயிரிழந்தனர்.

ஒருபக்கம் அரசியல் தலைவர்களும், அஜித் பவார் குடும்பத்தினரும் சம்பவ இடத்திற்கு விரைந்து வந்துக்கொண்டு இருக்கும் வேளையில், விபத்தின் முழு காரணம் குறித்து அதிகாரிகள் விசாரணை நடத்தி வருகின்றனர்.

அஜித் பவார் பாராமதியில் நடைபெறும் ஜில்லா பரிஷத் தேர்தல்களை முன்னிட்டு பொதுக்கூட்டங்களில் கலந்துகொள்ள சென்று கொண்டிருந்தார். அவரது நிகழ்ச்சி அட்டவணையில் காலை 10 மணி முதல் மாலை 7 மணி வரை நான்கு நிகழ்ச்சிகள் திட்டமிடப்பட்டிருந்தன. பாராமதி அவரது சொந்த ஊர் என்பதால், தேர்தல் பிரச்சாரத்திற்கு மிகுந்த முக்கியத்துவம் அளித்திருந்தார். இந்த விபத்தால் அவரது அனைத்து நிகழ்ச்சிகளும் ரத்து செய்யப்பட்டுள்ளன.

அஜித் பவார் மகாராஷ்டிராவின் மிக முக்கிய அரசியல் தலைவர்களில் ஒருவராக திகழ்ந்தார். 2024 சட்டமன்றத் தேர்தலுக்காக அஜித் பவார் தாக்கல் செய்துள்ள வேட்புமனுவில் அவர் அறிவித்த சொத்து மதிப்பு சுமார் ரூ.103.16 கோடி. மொத்த சொத்துகள் ரூ.124.55 கோடியாகவும், கடன்கள் ரூ.21.4 கோடியாகவும் உள்ளன.

இதில் அசையா சொத்துகள் ரூ.37 கோடிக்கு மேலும், அசையும் சொத்துகள் ரூ.8 கோடிக்கு மேலும் இருந்தன. இதோடு வீடுகள், விவசாய நிலங்கள், முதலீடுகள், டொயோட்டா கேம்ரி, ஹோண்டா CR-V போன்ற சொகுசு வாகனங்கள் ஆகியவை அவரது சொத்துகளில் அடங்கும்.

இந்த துயர சம்பவம் மகாராஷ்டிரா அரசியலில் பெரும் அதிர்ச்சியை ஏற்படுத்தியுள்ளது. அஜித் பவாரின் மறைவு அம்மாநில அரசியலில் தாக்கத்தை ஏற்படுத்தும் என்று அரசியல் வட்டாரங்கள் கருதுகின்றன. மக்கள் மற்றும் கட்சி தொண்டர்களிடையே ஆழ்ந்த துக்கம் நிலவுகிறது.

மகாராஷ்டிராவில் இப்போது பாஜக-வின் என்டிஏ கூட்டணி ஆட்சி நடந்து வருகிறது. பட்னாவிஸ் முதல்வராக இருக்கும் நிலையில், ஏக்நாத் ஷிண்டே மற்றும் அஜித் பவார் ஆகியோர் துணை முதல்வராக உள்ளனர். அஜித் பவாரின் மறைவை தொடர்ந்து 2வது துணை முதல்வர் பதவி யாருக்கு கிடைக்கும். இதேபோல் தேசியவாத காங்கிரஸ் கட்சியின் (NCP) தலைவர் பதவி யாருக்கு செல்லும் என்ற கேள்வியும் எழுந்துள்ளது.