அஜித் பவார் சென்ற VSR விமான நிறுவனத்தில் 2வது விபத்து .. இணைய தளம் திடீரென முடங்கியது..!

மகாராஷ்டிரா துணை முதலமைச்சரான அஜித் பவார் இன்று காலை விமான விபத்தில் உயிரிழந்தது இம்மாநில அரசியல் வட்டாரத்தில் பெரும் அதிர்ச்சியை ஏற்படுத்தியது. பாராமதி விமான நிலையத்தில் தரையிறங்க முயன்றபோது Learjet 45 விமானம் கட்டுப்பாட்டை இழந்து ரன்வேயிலிருந்து விலகி சென்று தீப்பிடித்து வெடித்தது. விமானத்தில் அஜித் பவார் உட்பட ஐந்து பேர் பயணித்தனர். இதில் இரண்டு விமானிகள், ஒரு பாதுகாப்பு அதிகாரி மற்றும் ஒரு உதவியாளர் அடங்குவர். DGCA அதிகாரப்பூர்வமாக அனைவரும் உயிரிழந்ததை உறுதிப்படுத்தியது.

அஜித் பவார் பயணித்த விமானம் VT-SSK என்ற பதிவு எண் கொண்டது. இது VSR Ventures Pvt Ltd நிறுவனத்தால் இயக்கப்பட்டது. இந்நிறுவனம் டெல்லியில் பதிவு செய்யப்பட்டு, மும்பை, போபால், ஹைதராபாத் உள்ளிட்ட இடங்களில் செயல்படுகிறது.

இந்த விமானம் மும்பையிலிருந்து காலை 8.10 மணிக்கு புறப்பட்டு, பாராமதிக்கு ஜில்லா பரிஷத் தேர்தல் பிரச்சாரத்திற்காக சென்றது. அஜித் பவார் அங்கு நான்கு பொதுக்கூட்டங்களில் கலந்துகொள்ள திட்டமிட்டிருந்தார். இந்த விபத்து காரணமாக நிகழ்ச்சிகள் அனைத்தும் ரத்து செய்யப்பட்டு உள்ளது.

இது VSR Ventures நிறுவனத்தின் கடந்த மூன்று ஆண்டுகளில் இரண்டாவது பெரிய விபத்து ஆகும். 2023 செப்டம்பர் 14 அன்று அதே Learjet 45 XR விமானம் (VT-DBL) மும்பை விமான நிலையத்தில் தரையிறங்கும்போது ரன்வேயிலிருந்து விலகி சென்றது. அப்போது விசாகப்பட்டினத்திலிருந்து வந்த விமானம் கனமழை மற்றும் குறைந்த பார்வை காரணமாக விபத்துக்குள்ளானது. அந்த சம்பவத்தில் உயிரிழப்பு இல்லை என்றாலும், விமானம் பெரிதும் சேதமடைந்தது.

அஜித் பவார் விமானம் விபத்துக்குள்ளான நிலையில் VSR ஏவியேஷன் நிறுவனத்தின் அதிகாரப்பூர்வ இணையதளம் முடங்கிய நிலையில் உள்ளது. இந்நிறுவனம் தனியார் ஜெட் சார்ட்டர், லீசிங், ஏர் அம்புலன்ஸ் சேவைகளை வழங்கி வருகிறது.

இந்நிறுவனத்தின் வாடிக்கையாளர் பட்டியலில் ஹேவெல்ஸ் இந்தியா, வெல்ஸ்பன், ஏபிஎல் அப்போலோ போன்ற நிறுவனங்கள் உள்ளன. நிறுவனத்தின் உரிமையாளர் விஜய் குமார் சிங் ஆவார்.

Learjet 45XR ஒரு மிட்சைஸ் பிசினஸ் ஜெட் ஆகும். இது வேகமான பயணத்திற்கு ஏற்ற விமானமாகும், மேலும் இது 9 பேர் வரை அமரக்கூடியது. இந்த விபத்து மகாராஷ்டிரா அரசியலில் பெரும் அதிர்ச்சியை ஏற்படுத்தியுள்ளது. அஜித் பவாரின் மறைவு அம்மாநில அரசியலை பெரிய அளவில் பாதித்துள்ளது.