சீன அலிபாபா-வை கைகழுவும் ஜப்பான் சாப்ட்பேங்க்..? ஜாக் மா அதிர்ச்சி..!

சீன அரசு உடனான பிரச்சனைகள் தீர்ந்த நிலையில் அலிபாபா பெரும் திட்டத்துடன் களத்தில் மீண்டும் இறங்கியுள்ளது, ஒருபக்கம் அரசு நெருக்கடி இருந்தாலும் அதை சமாளிக்கும் வகையில் புதிய திட்டத்தை தீட்டியது மட்டும் அல்லாமல் 2 வருட சரிவையும், இழப்பையும் ஈடுசெய்ய மாஸ்டர் பிளான் போட்டு உள்ளது.

இதில் முக்கியமாக அலிபாபா குழுமத்தின் வர்த்தகத்தை 6 பிரிவுகளாக உடைத்து தனித்தனி நிறுவனங்களாக பிரிப்பது மட்டும் அல்லாமல் அடுத்தடுத்து இந்த நிறுவனங்களை ஐபிஓ வெளியிட முடிவு செய்ததோடு ஹோல்டிங் நிறுவன கட்டமைப்புக்குள் சென்றுள்ளது. இது பெரும் மாற்றமாக பார்க்கப்படும் நிலையில் இதை சுற்றி பல சந்தேகம் முதலீட்டாளர்களுக்கு உள்ளது.

உலகமே பொருளாதார நெருக்கடியை சமாளிக்க முடியாமல் நாணய கொள்கையை இறுக்கி வரும் வேளையில் சீனா மட்டும் அதிகப்படியான தளர்வுடனே வைத்துள்ளது. இதுமட்டும் அல்லாமல் சீன பொருளாதாரம், நிதி நிலை வளர்ச்சி அளவுகள் குறித்து பல கேள்விகள் சுற்றிக்கொண்டு இருக்கிறது.

இந்த நிலையில் அலிபாபா தனது நிறுவனத்தை 6 ஆக உடைக்க திட்டமிட்டு உள்ளதை பாராட்டும் வேளையில் அலிபாபா நிறுவனத்தில் அதிகம் முதலீடு செய்திருக்கும் ஜப்பான் சாப்ட்பேங்க் கார்ப், அலிபாபா பங்கு இருப்பை அதிகளவில் விற்பனை செய்ய முடிவு செய்துள்ளது.

சாப்ட்பேங்க் நிறுவனத்தின் மொத்த முதலீட்டு போர்ட்போலியோவில் பெரும் பங்கை அலிபாபா கொண்டு உள்ளது. தற்போது அலிபாபா பங்குகளை சாப்ட்பேங்க் விற்பனை செய்யப்போகிறது என செய்தி வெளியான நிலையில் ஹாங்காங் சந்தையில் சுமார் 5.1 சதவீதம் வரையில் சரிந்துள்ளது. இது அலிபாபா நிறுவனர் ஜாக் மா-வுக்கு பெரும் அதர்ச்சியாக இருக்கும்.

அலிபாபா ஜாக் மா, சாப்ட்பேங்க் மசயோஷி சன் ஆகியோரும் நீண்ட கால நண்பர்கள். சாப்ட்பேங்க் 20 வருடத்திற்கு முன்பு வெறும் 20 மில்லியன் டாலர் தொகைக்கு வாங்கிய அலிபாபா பங்குகள் இன்று பல மடங்கு அதிகரித்துள்ளது. இந்த வருடம் மட்டும் சாப்ட்பேங்க் தலைவர் மசயோஷி சன் சுமார் 7.2 பில்லியன் டாலர் மதிப்பிலான பங்குகளை விற்பனை செய்தார்.

அமெரிக்க பங்குசந்தையில் சமர்ப்பிக்கப்பட்டு உள்ள அறிக்கையின் படி சாப்ட்பேங்க் அலிபாபா பங்கு இருப்பை 3.8 சதவீதம் வரையில் குறைக்க உள்ளதாக FT தெரிவித்துள்ளது. சாப்ட்பேங்க் கடந்த வருடம் அலிபாபா பங்கு இருப்பை 23.7 சதவீதத்தில் இருந்து 14.6 சதவீதமாக குறைத்தது மூலம் சுமார் 34 பில்லியன் டாலரை பெற்றது, இதை தொடர்ந்து தற்போது 3.8 சதவீதம் வரையில் குறைக்க உள்ளது.